07th Aug2020

ທ່ານ ຮອງນາຍົກລັດຖະມົນຕີ ລົງຢ້ຽມຢາມ ສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ, ສູນກາງສະຫະພັນແມ່ຍິງລາວ

by somchan

ໃນວັນທີ 31 ກໍລະກົດ 2020 ຜ່ານມາ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກໍາມະການຕ້ານການຄ້າມະນຸດລະດັບຊາດ ໄດ້ລົງຢ້ຽມຢາມສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ, ສູນກາງສະຫະພັນແມ່ຍິງລາວ ໃຫ້ກຽດຕ້ອນຮັບໂດຍ ທ່ານ ນາງ ບັນດິດ ປະທຸມວັນ ຮອງປະທານຄະນະບໍລິຫານສູນກາງສະພັນແມ່ຍິງລາວ ທັງເປັນຮອງປະທານຄະນະກໍາມະການຕ້ານການຄ້າມະນຸດລະດັບຊາດ, ມີ ພັອ ປອ ເພັງສະຫວັນ ທິບພະວົງໄຊ ຮອງຫົວໜ້າກົມໃຫຍ່ຕໍາຫຼວດ ຫົວໜ້າກອງເລຂາຄະນະກໍາມະການຕ້ານການຄ້າມະນຸດດັບຊາດ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດດັ່ງກ່າວ ທ່ານ ນາງ ບຸນເຫຼືອ ຈັນທະພົມມາ ຫົວໜ້າສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ ສູນກາງສະຫະພັນແມ່ຍິງລາວ, ໄດ້ລາຍງານສະພາບ ຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ຄົງຄ້າງ ໃນການປະຕິບັດວຽກງານ ປົກປ້ອງຊ່ວຍເຫຼືອຜູ້ຖືກເຄາະຮ້າຍ ຈາກການຄ້າມະນຸດໃນໄລຍະຜ່ານມາ ເປັນຕົ້ນແມ່ນການຊ່ວຍເຫຼືອທາງດ້ານສະຖານທີ່ພັກເຊົາ, ດ້ານກົດໝາຍ, ການແພດ, ການສຶກສາ ແລະ ການຝຶກອົບຮົມວິຊາຊີບ. ພ້ອມດຽວກັນນັ້ນ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກໍາມະການຕ້ານການຄ້າມະນຸດລະດັບຊາດ ໄດ້ເນັ້ນໜັກ ພະນັກງານພາຍໃນສູນໃຫ້ມີແນວຄິດອຸ່ນອ່ຽງ, ເຊື່ອໝັ້ນຕໍ່ການນຳພາຂອງພັກ-ລັດ ພ້ອມນັ້ນທ່ານຍັງໄດ້ລົງຢ້ຽມຢາມ, ໃຫ້ກໍາລັງໃຈ ຢ່າງໃກ້ຊິດຕິດແທດກັບຜູ້ຖືກເຄາະຮ້າຍຈາກການຄ້າມະນຸດ ທີ່ສູນໃຫ້ຄໍາປຶກສາ ແລະ ປົກປ້ອງແມ່ຍິງ-ດັກນ້ອຍ ທີມາພັກເຊົາຢູ່ສູນດັ່ງກ່າວເພື່ອຟື້ນຟູສະພາບກາຍ, ສະພາບຈິດໃຈ ຝຶກອົບຮົມວິຊາຊີບ, ເພື່ອເຮັດໃຫ້ຜູ້ຖືກເຄາະຮ້າຍມີຄວາມຮູ້ຄວາມສາມາດ ກ່ອນທີ່ສົ່ງກັບຄືນສູ່ຄອບຄົວ, ນອກຈາກນັ້ນ ທ່ານ ຍັງໄດ້ມອບເຄື່ອງອຸປະໂພກ, ບໍລິໂພກ ແລະ ເຄື່ອງໃຊ້ທີ່ຈໍາເປັນໃຫ້ແກ່ສູນໃຫ້ຄໍາປຶກສາ ແລະ ປົກປ້ອງແມ່ຍິງ-ດັກນ້ອຍ ລວມມູນຄ່າ 30 ລ້ານກີບ.

Off

Comments are closed.