07th Aug2020

ກອງປະຊຸມ ວິທະຍາສາດເພື່ອປຶກສາຫາລື ປະກອບຄໍາຄິດຄໍາ ເຫັນໃສ່ແຜນຍຸດທະສາດຄວບຄຸມ,ສະກັດກັ້ນ ແລະ ຕ້ານຢາເສບຕິດ ໄລຍະປີ 2020-2025

by somchan

ກະຊວງ ປກສ ຈັດກອງປະຊຸມ ວິທະຍາສາດເພື່ອປຶກສາຫາລື ປະກອບຄໍາຄິດຄໍາ ເຫັນໃສ່ແຜນຍຸດທະສາດຄວບຄຸມ, ສະກັດກັ້ນ ແລະ ຕ້ານຢາເສບຕິດ ໄລຍະປີ 2020-2025 ແລະ ວິໄສທັດ ຮອດປີ 2030. ຂຶ້ນໃນວັນທີ 6 ສິງຫາ 2020 ນີ້ ຢູ່ທີ່ກະຊວງ ປກສ ໂດຍການເຂົ້າຮ່ວມ

ພົຕ ປອ ທອງເຫຼັກ ມັງຫນໍ່ເມກ ຮອງລັດຖະມົນຕີ ກະຊວງ ປກສ ມີບັນດາຫົວຫນ້າ -ຮອງກົມໃຫຍ່ ກົມກອງອ້ອມຂ້າງກະຊວງ, ອົງການຈັດຕັ້ງມະຫາຊົນ, ຫ້ອງ, ສູນ, ພະແນກ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ພົຈວ ຄຳກິ່ງ ຜູ້ຍຫຼ້າມະນີວົງ ຫົວຫນ້າກົມໃຫຍ່ຕໍາຫຼວດ ໄດ້ສະຫຼຸບ ການເຄື່ອນໄຫວວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດໃນ 05 ປີ ຜ່ານມາ ແລະ ຄາດຫມ າຍສູ້ຊົນ ແຜນຍຸດທະສາດການຄວບຄຸມ, ສະກັດກັ້ນ ແລະ ຕ້ານຢາເສບຕິດໄລຍະແຕ່ ປີ 2020-2025 ແລະ ວິໄສທັດ ຮອດປີ 2030. ທ່ານໄດ້ໃຫ້ຮູ້ວ່າ: ໃນໄລຍະ 5 ປີຜ່ານມາ ເຈົ້າຫນ້າທີ່ປ້ອງກັນຄວາມສະຫງົບ ໄດ້ເອົາໃຈໃສ່ ປະຕິບັດມາດຕະການດ້ານກົດຫມາຍ ໃນການສະກັດກັ້ນ ແລະ ຕ້ານຢາເສບຕິດ ຢ່າງມີຄວາມຕັ້ງຫນ້າ ສະແດງອອກຄື: ໃນໄລຍະປີ 2015-2019 ທົ່ວປະເທດສາມາດມ້າງຄະດີຢາເສບຕິດໄດ້ 13.735 ເລື່ອງ, ຈັບຜູ້ຖືກຫາໄດ້ 20.221 ຄົນ, ສາມາດຢຶດ ຢາເສບຕິດປະເພດຢາເຣໂລອິນໄດ້ 943 ກິໂລ ກຼາມ, ກັນຊາ 10.653 ກິໂລກະກຼາມ, ຢາບ້າ 6.867 ກິໂລກຼາມ, ຢາໄອສ໌ 8.757 ກິໂລກຼາມ , ຝິ່ນ 577ກິໂລກຼາມ, ແປ້ງຝຸ່ນປະສົມຢາເສບຕິດ 21.645 ກິໂລກຼາມ ແລະ ອື່ນໆຈໍານວນຫນື່ງ.

ເຖິງວ່າເຈົ້າຫນ້າທີ່ປ້ອງກັນຄວາມສະຫງົບ ໄດ້ພ້ອມກັນເອົາໃຈໃສ່ໃນການຄວບຄຸມ, ສະກັດກັ້ນ ແລະ ຕ້ານບັນຫາດັ່ງນີ້ຢ່າງຕໍ່ເນື່ອງກໍຕາມ ແຕ່ບັນຢາເສບຕິດກໍ່ບໍ່ມີທ່ວງທ່າວ່າຈະຫຼຸດລົງ ເຊິ່ງປັດຈຸບັນທົ່ວປະເທດຍັງມີຜູ້ທີ່ມີຄວາມສຽງຕິດຢາເສບຕິດປະເພດຕ່າງໆຈໍານວນຫຼາຍຫມື່ນຄົນ ແລະ ມີຜູ້ຕິດຢາເສບຕິດທີ່ຕ້ອງການຮັບການບໍາບັດປິ່ນປົວ, ກຸ່ມສ່ຽງຢາເສບຕິດ ສ່ວນຫຼາຍແມ່ນກກຸ່ມຄົນຫວ່າງງານ, ຊາວ ຫນຸ່ມ-ເຍົວະຊົນ, ນັກຮຽນ-ນັກສຶກສາ ຕະຫຼອດຮອດກຳມະກອນ ແລະ ເຈົ້າຫນ້າທີ່ຂອງລັດ, ພ້ອມ ກັນນີ້ ບັນຫາຢາເສບຕິດມັນໄດ້ກາຍເປັນໄພອັນຕະລາຍຄຸກຄາມເຖິງຄວາມຫມັ້ນຄົງຂອງຊາດ, ຄວາມ ສະຫງົບທາງດ້ານການເມືອງ, ຄວາມເປັນລະບຽບຮຽບຮ້ອຍ ແລະ ຄວາມປອດໄພຂອງສັງຄົມ ກົດຫນ່ວງທ່ວງດຶງການສ້າງສາພັດທະນາເສດຖະກິດ-ສັງຄົມຂອງປະເທດຊາດ, ສ້າງຄວາມເສຍຫາຍ ນໍາເອົາຄວາມຫາຍານະມາສູ່ຄອບຄົວ ທັງເປັນການກໍ່ໃຫ້ເກີດບັນຫາອາຊະຍາກໍາປະເພດຕ່າງໆ, ສົ່ງຜົນກະທົບຕໍ່ບົດບາດພາບພົດອັນດີງາມຂອງປະເທດຊາດ. ຈາກສະພາບຄວາມຈິງ ແລະ ພາວະວິໄສດັ່ງກ່າວ ກະຊວງ ປກສ ຈຶ່ງໄດ້ສ້າງແຜນຍຸດທະສາດການຄວບຄຸມ, ສະກັດກັ້ນ ແລະ ຕ້ານຢາເສບຕິດຢູ່ ສປປ ລາວ ແຕ່ປີ 2020-2030 ຂື້ນ.

ຄາດຫມາຍສູ້ຊົນໃນຕໍ່ຫນ້າ ຈະສືບຕໍ່ປະຕິບັດທິດ 3 ສ້າງ ໂດຍສຸມໃສ່ຂະບວນການສ້າງບ້ານປອດຄະດີ, ຢາເສບຕິດ, ໂຮງຮຽນ-ສະຖາບັນການສຶກສາ, ໂຮງຈັກ-ໂຮງງານ, ສໍານັກງານ-ອົງການຕ່າງໆ ໃຫ້ປອດຢາເສບຕິດ, ປັບປຸງບັນດາສູນປິ່ນປົວ, ຟື້ນຟູສຸຂະພາບ ແລະ ຝຶກອົບຮົມວິຊາຊີບໃຫ້ແກ່ຜູ້ຕິດຢາເສບຕິດ ຢູ່ບັນດາແຂວງໃຫ້ດີ ຂຶ້ນກວ່າເກົ່າ. ໃຫ້ສູນກາງ ແລະ ທ້ອງຖິ່ນເປັນເຈົ້າການປຸກລະດົມຂົນຂວາຍຊອກຫາແຫຼ່ງທຶນເຂົ້າໃສ່ ບັນດາໂຄງການພັດທະນາທາງເລືອກແບບຍືນຍົງ ໃຫ້ແກ່ປະຊາຊົນຢູ່ເຂດຊົນນະບົດ. ເພີ່ມທະວີການ ໂຄສະນາ-ສຶກສາອົບຮົມ, ເຜີຍແຜ່ຜົນຮ້າຍ ແລະ ພິດໄພອັນຕະລາຍຈາກຢາເສບຕິດ ໃຫ້ທົ່ວເຖິງທຸກຊັ້ນຄົນ. ສຸມໃສ່ດໍາເນີນວຽກງານວິຊາສະເພາະຢ່າງເປັນລະບົບ, ເພີ່ມທະວີຮ່ວມມືກັບສາກົນ ພ້ອມທັງປະຕິບັດສົນທິສັນຍາສາກົນທີ່ ສປປ ລາວໄດ້ເປັນພາຄີ.

ຈາກນັ້ນ, ທ່ານ ຮອງລັດຖະມົນຕີກະຊວງ ປກສ ຍັງໄດ້ເນັ້ນຫນັກໃຫ້ທຸກພາກສ່ວນທີ່ເຂົ້າຮ່ວມກອງປະຊຸມໃນຄັ້ງນີ້ ຈົ່ງພ້ອມກັນປຶກສາຫາລື ປະກອບຄໍາຄິດຄໍາເຫັນ ແລກປ່ຽນບົດຮຽນຮ່ວມກັນຢ່າງມີວິທະຍາສາດ ເພື່ອປະກອບສ່ວນເຮັດໃຫ້ “ແຜນຍຸດທະສາດໃນການຄວບຄຸມ, ສະກັດກັ້ນ ແລະ ຕ້ານຢາເສບຕິດ ປີ 2020-2025, ວິໄສທັດຮອດປີ 2030” ມີເນື້ອໃນຄົບຖ້ວນສົມບູນ ແລ້ວພ້ອມກັນນໍາໄປຈັດຕັ້ງປະຕິບັດໃຫ້ມີຜົນສໍາເລັດ.

 

Off

Comments are closed.