26th Aug2020

ປະກາດແຕ່ງຕັ້ງ ຮອງປະທານ, ຜູ້ປະຈໍາການ ແລະ ຄະນະກໍາມະການ ປກຊ – ປກສ ແຂວງອັດຕະປື

by somchan

ໃນວັນທີ 25 ສິງຫາ 2020 ນີ້ ພົທ ວິໄລ ຫຼ້າຄໍາຟອງ ເລຂາທິການສູນກາງພັກ ຄະນະກໍາມະການ ປ້ອງກັນຊາດ – ປ້ອງກັນຄວາມສະຫງົບ ສູນກາງ ລັດຖະມົນຕີກະຊວງປ້ອງກັນຄວາມສະຫງົບ ໄດ້ເປັນປະທານ ໃນພປະກາດແຕ່ງຕັ້ງ ຮອງປະທານ, ຜູ້ປະຈໍາການ, ຄະນະກໍາມະການ ປກຊ – ປກສ ແຂວງອັດຕະປື,

ມີ ທ່ານ ເລັດ ໄຊຍະສອນ ເລຂາພັກແຂວງ ປະທານ ປກຊ – ປກສ ແຂວງ ເຈົ້າແຂວງອັດຕະປື, ມີ ຄະນະກໍາມະການ ປກຊ – ປກສ ແຂວງ ພ້ອມດ້ວຍບັນດາພະແນກການອ້ອມຂ້າງແຂວງເຂົ້າຮ່ວມ.

ພົຕ ສະຫວ່າງໄຊ ສິນນະວົງ ຫົວໜ້າຫ້ອງການ ຄະນະກໍາມະການ ປກຊ – ປກສ ສູນກາງ ໄດ້ຜ່ານມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງ ຮອງປະທານ, ຜູ້ປະຈໍາການ ແລະ ກໍາມະການ ຄະນະກໍາມະການ ປກຊ – ປກສ ແຂວງອັດຕະປື ໃນນີ້ໄດ້ຕົກລົງແຕ່ງຕັ້ງ: ສະຫາຍ ພັອ ບຸນຈັນ ສີຫາວົງ ເປັນຮອງປະທານ, ຜູ້ປະຈໍາການຄະນະກໍາມະການ ປກຊ – ປກສ ແຂວງ, ສະຫາຍ ພັອ ສີເວີນ ແກ້ວສີວົງສາ ເປັນຮອງປະທານ ຄະນະກໍາມະການ ປກຊ – ປກສ ແຂວງ, ສະຫາຍ ພັທ ຄໍາພູ ສາຍດອນໂຂງ ເປັນກໍາມະການ ຄະນະກໍາມະການ ປກຊ – ປກສ ແຂວງ

ໃນໂອກາດດັ່ງກ່າວນີ້  ພົທ ວິໄລ ຫຼ້າຄໍາຟອງ ໄດ້ສະແດງຄວາມຊົມເຊີຍຕໍ່ບັນດາສະຫາຍທີ່ໄດ້ຮັບ ການແຕ່ງຕັ້ງໃນຄັ້ງນີ້ ເຊິ່ງໄດ້ສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈຂອງພັກ – ລັດ ທີ່ມີຕໍ່ພະນັກງານນໍາພາ – ບັນຊາ, ແມ່ນການມອບໝາຍໜ້າທີ່ອັນໜັກໜ່ວງທີ່ມີກຽດສະຫງ່າ ເພື່ອນໍາພາຈັດຕັ້ງປະຕິບັດພາລະກິດທີ່ໄດ້ຮັບ ມອບໝາຍໃຫ້ມີຜົນສໍາເລັດ, ນອກນັ້ນ, ທ່ານຍັງໄດ້ໂອ້ລົມ ແລະ ໃຫ້ທິດຊີ້ນຳແກ່ຄະນະກໍາມະການ ປກຊ – ປກສ ແຂວງອັດຕະປື ພ້ອມດ້ວຍພະແນກການຕ່າງໆພາຍໃນແຂວງ ຈົ່ງເປັນເຈົ້າການ ໃນການປະສານສົມທົບແໜ້ນ ກັບອົງການປົກຄອງແຕ່ລະຂັ້ນ, ເຮັດໜ້າທີ່ປົກປັກຮັກສາເຂດນໍ້າແດນດິນໃຫ້ມີຄວາມຫມັ້ນຄົງ, ເອົາໃຈໃສ່ປ້ອງກັນ ສະກັດກັ້ນປະກົດຫຍໍ້ທໍ້ຕ່າງໆເຊັ່ນ: ບັນຫາຢາເສບຕິດ, ສໍ້ໂກງຊັບ, ລັກຊັບ, ອຸປະຕິເຫດຕາມທ້ອງຖະຫນົນ, ຄ້າຂາຍ ເງື່ອນ, ການເຂົ້າ – ອອກເມືອງບໍ່ຖືກຕ້ອງ, ການແກ້ໄຂຄົນຕ່າງປະເທດທີ່ມາເຄື່ອນໄຫວຜິດກົດຫມາຍ ແກ້ໄຂບັນຫາໂສເພນີ ແລະ ບັນຫາການຄ້າມະນຸດໃຫ້ຫຼຸດນ້ອຍລົງ ເພື່ອເຮັດໃຫ້ ແຂວງອັດຕະປື ມີສະຖຽນລະພາບທາງດ້ານການເມືອງ ມີຄວາມເປັນລະບຽບຮຽບຮ້ອຍທາງສັງຄົມ ແລະ ເຮັດໃຫ້ການດໍາລົງຊີວິດຂອງ ປະຊາຊົນມີຄວາມສະຫງົບປອດໄພ.

Off

Comments are closed.