28th Aug2020

ຕຳຫຼວດຈະລາຈອນ ຍາດໄດ້ຜົນງານ ແລະ ຜົນສຳເລັດຫຼາຍດ້ານ

by somchan

ກົມຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ຈັດກອງປະຊຸມ 6 ເດືອນຕົ້ນປີ ແລະ ທິດທາງແຜນການວຽກງານຈຸມສຸມ 6 ເດືອນທ້າຍປີ 2020. ໃນວັນທີ 27 ສິງຫາ 2020 ພາຍໃຕ້ການເປັນປະທານຂອງ ພັອ ກົງສີ ສຸວັນນຕຸ້ມ ຫົວໜ້າກົມຕຳຫຼວດຈະລາຈອນ ໃຫ້ກຽດເຂົ້າຮ່ວມຂອງ ພົຈວ ປອ ທອງສະຫວັດ ວົງສະຫວັດ ຮອງຫົວໜ້າກົມໃຫຍ່ຕຳຫຼອດ ມີຄະນະກົມ, ພະນັກງານ-ນັກຮົບ ແລະ ແຂກຖືກເຊີນເຂົ້າຮ່ວມ.

ພັທ ແກ້ວມາລາ ແສງທອງ ຮອງຫົວໜ້າກົມຕຳຫຼວດຈະລາຈອນ ໄດ້ສະຫຼຸບຕິລາຄາໃນການຈັດຕັ້ງປະຕິບັດ ໜ້າທີ່ວຽກງານວິຊາສະເພາະໃນ 6 ເດືອນຜ່ານມາ ພະນັກງານ-ນັກຮົບກຳລັງຕຳຫຼວດຈະລາຈອນ ແມ່ນຍາດໄດ້ຜົນງານ ແລະ ຜົນສຳເລັດຫຼາຍດ້ານ ສະແດງອອກ ໄດ້ເອົາໃຈໃສ່ປ້ອງກັນເປີດທາງ ໃຫ້ຜູ້ນຳພັກ-ລັດ, ແຂກພາຍໃນ ແລະ ຕ່າງປະເທດ, ປ້ອງກັນຈັດລະບຽບກອງປະຊຸມ, ວັນບຸນສຳຄັນຕ່າງໆຂອງຊາດໃນຂອບເຂດທົ່ວປະເທດ ໄດ້ 400 ກວ່າຄັ້ງ, ມີ 200 ກວ່າ ແຮງງານ, ລົງກວດກາການສັນຈອນຕາມເສັ້ນທາງຫຼວງແຫ່ງຊາດ, ເສັ້ນທາງຫຼັກຂອງແຕ່ລະແຂວງໄດ້ 200 ກວ່າຄັ້ງ, ມີ 10,000 ກວ່າແຮງງານ, ຈັດສັນຄວາມເປັນລະບຽບຕາມສາຍທາງ, ຕະຫຼາດ, ຊຸມຊົນ ໄດ້ 400 ກວ່າຄັ້ງ ຕິດປ້າຍລົດໃນຂອບເຂດທົ່ວປະເທດ ໄດ້ 50,000 ກ່ວາຄັ້ງ ແລະ ອື່ນໆ.

ພ້ອມດຽວກັນນີ້ ຜູ້ເຂົ້າຮ່ວມກອງປະຊຸມ, ຍັງໄດ້ປະກອບຄຳເຫັນໃສ່ບົດສະຫຼຸບ ແລະ ທິດທາງແຜນການວຽກງານຈຸດສຸມໃນຕໍ່ໜ້າດ້ວຍຄວາມຮັບຜິດຊອບສູງ ເພື່ອປັບປຸງຈຸດອ່ອນຂໍ້ຄົງຄ້າງ ທີ່ຍັງເຮັດບໍ່ທັນໄດ້ດີໃນໄລຍະຜ່ານມາ ໃຫ້ມີເນື້ອໃນຄົບຖ້ວນສົມບູນ ແລະ ພ້ອມກັນນຳໄປປັບປຸງຈັດຕັ້ງປະຕິບັດ ເຂົ້າໃນໜ້າທີ່ວຽກງານວິຊາສະເພາະຕົວຈິງຢູ່ໃນຄວາມຮັບຜິດຊອບຂອງຕົນໃຫ້ໄດ້ຮັບໝາກຜົນສຸງສຸດ.

Off

Comments are closed.