03rd Sep2020

ກົມໃຫຍ່ຕຳຫຼວດສະຫຼຸບຖອດຖອນບົດຮຽນວຽກງານແກ້ໄຂ ປະກົດການຫຍໍ້ທໍ້ໃນນະຄອນຫຼວງວຽງຈັນ

by somchan

ກົມໃຫຍ່ຕຳຫຼວດ ກະຊວງປ້ອງກັນຄວາມສະຫົງບ ໄດ້ຈັດກອງປະຊຸມສະຫຼຸບຖອດຖອນບົດຮຽນວຽກງານແກ້ໄຂ ປະກົດການຫຍໍ້ທໍ້ໃນນະຄອນຫຼວງວຽງຈັນ ແຕ່ເດືອນມີນາ-ມິຖຸນາ ແລະ ວາງທິດທາງແຜນການທ້າຍປີ 2020. ໃນວັນທີ 1 ກັນຍານີ້ ໂດຍການເປັນປະທານຂອງ ພົຈວ ຄຳກີ່ງ ຜຸຍຫຼ້າມະນີວົງ ຫົວໜ້າກົມໃຫຍ່ຕຳຫຼວດ,ທັງເປັນຫົວໜ້າຄະນະສະເພາະກິດແກ້ໄຂປະກົດການຫຍໍ້ທໍ້ໃນນະຄອນຫຼວງວຽງຈັນ, ມີຄະນະກົມໃຫຍ່, ກົມກອງວິຊາສະເພາະອ້ອມຂ້າງ, ກົມໃຫ່ຍຕຳຫຼວດ ປກສ ນະຄອນຫຼວງວຽງຈັນ ແລະ ປກສ ເມືອງ 9 ເມືອງເຂົ້າຮ່ວມ.

ພັອ ຄຳແກ້ວ ມາໂນລາ ຫົວໜ້າກົມຕຳຫຼວດສືບຂ່າວອາຍາ, ຮອງຫົວໜ້າກອງເສນາ ໄດ້ຜ່ານບົດສະຫຼຸບວຽກງານແກ້ໄຂປະກົດການຫຍໍ້ທໍ້ ຢູ່ນະຄອນຫຼວງວຽງຈັນ. ໃນ 4 ເດືອນຜ່ານມາ ຄະນະສະເພາະກິດແກ້ໄຂປະກົດການຫຍໍ້ທໍ້ໃນນະຄອນຫຼວງວຽງຈັນ ໄດ້ສົມທົບກັບບັນດາກະຊວງ, ຂະແໜງການ, ອົງການທຽບເທົ່າ, ອຳນາດການປົກຄອງທ້ອງຖິ່ນຂັ້ນບ້ານ ໃນການແກ້ໄຂປະກົດການຫຍໍ້ທໍ້ໃນສັງຄົມຢ່າງເປັນຂະບວນການ ແລະ ມີຜົນສຳເລັດເປັນຢ່າງດີ ສາມາດແກ້ໄຂຄະດີໄດ້ຫຼາຍລາຍ. ຕັ້ງໜ້າຈັດຕັ້ງປະຕິບັດບັນດາຄາດໝາຍ ແລະ ວຽກງານຈຸດສຸມທີ່ກະຊວງກໍ່ຄື ແລະ ທິດທາງແຜນການຂອງກົມໃຫຍ່ຕຳຫຼວດ ໃຫ້ປະກົດຜົນເປັນຈິງ. ພ້ອມກັນນັ້ນກໍ່ໄດ້ຫັນເອົາບັນດາຄຳສັ່ງຕ່າງໆ ສ້າງເປັນແຜນງານອັນລະອຽດໃນການສະກັດກັ້ນ ແລະ ຕ້ານປະກົດການຫຍໍ້ທໍ້ທາງສັງຄົມ. ບັນດາກົມວິຊາສະເພາະ, ຫ້ອງຕຳຫຼວດ ປກສ ນະຄອນຫຼວງວຽງຈັນ ແລະ ປກສ ເມືອງ 9 ຕົວເມືອງ ໄດ້ເອົາໃຈໃສ່ໃນການເຄື່ອນໄຫວປົກປັກຮັກສາຄວາມສະຫົງບ ແລະ ຄວາມເປັນລະບຽບຮຽບຮ້ອຍຂອງສັງຄົມໃນນະຄອນຫຼວງວຽງຈັນໄດ້ໂດຍພື້ນຖານ. ບັນດາອົງການຈັດຕັ້ງທີ່ກ່ຽວຂ້ອງ ແລະ ຊັ້ນຄົນຕ່າງໆໃນສັງຄົມ ຕະຫຼອດຮອດພໍ່ແມ່ປະຊາຊົນໃນນະຄອນຫຼວງວຽງຈັນ ໄດ້ໃຫ້ການສະໜັບສະໜູນ ປະກອບສ່ວນເຂົ້າຮ່ວມວຽກງານສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມດ້ວຍຄວາມຕັ້ງໜ້າເຊັ່ນ: ໄດ້ຈັດຕັ້ງປະຈຳການເວນຍາມ, ເປັນຫູເປັນຕາໃຫ້ເຈົ້າໜ້າທີ່ໄດ້ດີສົມຄວນ.ໃນ 4 ເດືອນຜ່ານມາ ມີຄະດີເກີດຂຶ້ນ 940 ລາຍ, ແກ້ໄຂໄດ້ 634 ລາຍ, ກັກຕ້ອງຫາ 836 ຄົນ. ໃນນີ້ ຄະດີອາຍາເກີດຂຶ້ນ 648 ລາຍ, ກັກຕ້ອງຫາ 491 ຄົນ, ລົດຈັກເສຍ 169 ຄັນ, ລົດໃຫຍ່ 7 ຄັນ, ຄະດີຢາເສບຕິດ 268 ລາຍ, ກັກຕ້ອງຫາ 337 ຄົນ, ຄະດີເສດຖະກິດ 22 ລາຍ, ກັກຕ້ອງຫາ 1 ຄົນ ແລະ ຄະດີຄ້າມະນຸດ 2 ລາຍ, ກັກຕ້ອງຫາ 7 ຄົນ. ສາມາດຢຶດຂອງກາງໄດ້ ປືນສັ້ນ 10 ກະບອກ ພ້ອມລູກປືນ 1ພັນກ່ວາລູກ, ຢືດຢາບ້າ 1ລ້ານ 7 ແສນກ່ວາເມັດ, ນ້ຳໜັກ 173 ກິໂລກຼາມ, ຢາໄອ 1,7 ກຼາມ ແລະ ກັນຊາ 51 ກິໂລກຼາມ.

ຜົນເສຍຫາຍເງິນກີບ 3 ຮ້ອຍລ້ານກ່ວາກີບ, ເງິນບາດ 9 ລ້ານກ່ວາບາດ, ເງິນໂດລາ 1ແສນກ່ວາໂດລາ ແລະ ຊັບສິນອື່ນໆ, ເຈົ້າໜ້າທີ່ສາມາດເກັບກູ້ຄືນໄດ້ມີ ລົດໃຫຍ່ 6 ຄັນ, ລົດຈັກ 73 ຄັນ, ເງິນກີບ 2 ຮ້ອຍລ້ານກ່ວາກີບ, ເງິນບາດ 3 ແສນກ່ວາບາດ, ຄຳຮູບປະພັນ 3 ບາດ.

ໂອກາດນີ້ ບັນດາຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄຳຄິດຄຳເຫັນ ຢ່າງກົງໄປກົງມາ ໃນການຈັດຕັ້ງປະຕິບັດວຽກງານຜ່ານມາ ພ້ອມທັງເນັ້ນໜັກບັນຫາສຳຄັນຕົ້ນຕໍທີ່ຈະຕ້ອງໄດ້ສຸມໃສ່ແກ້ໄຂໃນຕໍ່ໜ້າ.

 

Off

Comments are closed.