08th Sep2020

ສປປ ລາວ ບໍ່ພົບຜູ້ຕິດເຊື້ອໂຄວິດ-19 ເພີ່ມໃໝ່

by somchan

ໃນວັນທີ 7 ກັນຍາ 2020. ດຣ ສີສະຫວາດ ສູດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຖະແຫຼງກ່ຽວກັບສະພາບການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ອັກເສບປອດຈາກເຊື້ອຈຸລະໂລກສາຍພັນໃຫມ່ COVID-19 ວ່າ: ມາຮອດ 5 ໂມງແລງ ຂອງວັນ ທີ 6 ກັນຍາ 2020, ທົ່ວປະເທດມີຜູ້ເດີນທາງເຂົ້າມາທັງໝົດ 1.809 ຄົນ, ໃນນີ້, ຜ່ານດ່ານລາວ-ໄທ 631 ຄົນ,

ດ້ານລາວ-ຈີນ 26 ຄົນ, ດ້ານລາວ-ຫວຽດນາມ 818 ຄົນ, ດ່ານລາວ-ມຽມມາ 6 ຄົນ ແລະ ຜ່ານສະໝາມບິນສາກົນ ວັດໄຕ 328 ຄົນ, ໂດຍທັງໝົດແມ່ນ ໄດ້ຮັບການແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການໄຂ້, ພ້ອມທັງໄດ້ເກັບຕົວຢ່າງທຸກຄົນມາກວດ ແລະ ນໍາສົ່ງໄປສະຖານທີ່ຈໍາກັດບໍລິເວນ ຈົນຄົບ 14 ວັນ, ປັດຈຸບັນ ຍັງມີຜູ້ຈໍາກັດ ບໍລິເວນທັງຫມົດ 2.757 ຄົນ, ຢູ່ 40 ສູນທົ່ວປະເທດ ໄດ້ເກັບຕົວຢ່າງມາ ກວດວິເຄາະທັງໝົດບໍ່ພົບຜູ້ຕິດເຊື້ອເພີ່ມ. ໝາຍຄວາມວ່າຜູ້ຕິດເຊື້ອ ຢູ່ປະເທດເຮົາຍັງ ຢູ່ທີ່ຕົວເລກສະສົມ ຈໍານວນ 22 ຄົນ, ຄະນະທີ່, ຜູ້ຕິດເຊື້ອຄົນທີ 22 ຜ່ານການກວດຄັ້ງທີ 2 ໃນວັນທີ 6 ກັນຍາ 2020 ແມ່ນຍັງພົບເຊື້ອຢູ່ ແລະ ສືບຕໍ່ປິ່ນປົວຢູ່ໂຮງໝໍມິດຕະພາບ, ໂດຍຜູ້ກ່ຽວມີສຸຂະພາບແຂງແຮງ ແລະ ບໍ່ມີພະຍາດອື່ນແຊກຊ້ອນ.

ທ່ານ ດຣ. ສີສະຫວາດ ສຸດທານີລະໄຊ ໃຫ້ຮູ້ຕື່ມວ່າ: ມາຮອດວັນທີ 7 ກັນຍາ 2020 ທົ່ວໂລກມີລາຍງານ ການລະບາດຂອງພະຍາດ COVID-19 ຫລາຍກວ່າ 27 ລ້ານຄົນ ຢູ່ 213 ປະເທດ. ໃນນີ້, ມີຜູ້ເສຍຊີວິດຫລາຍ ກວ່າ 887,000 ຄົນ, ປິ່ນປົວຫາຍດີ 19,35 ລ້ານກວ່າຄົນ, ຢູ່ຂົງເຂດອາຊີ ແມ່ນປະເທດອິນເດຍ ມີທ່າອຽງຕິດເຊື້ອເພີ່ມຂຶ້ນ, ໂດຍພຽງມື້ດຽວມີຜູ້ຕິດເຊື້ອສູງ ເຖິງ 91.723 ຄົນ.

ຕໍ່ສະພາບທີ່ໜ້າເປັນຫ່ວງດັ່ງກ່າວ, ຍັງເຫັນວ່າປະຊາຊົນຈໍານວນບໍ່ໜ້ອຍ ໄດ້ພາກັນປະໝາດ, ໂດຍບໍ່ເອົາໃຈໃສ່ປະຕິບັດວິທີປ້ອງກັນການຕິດເຊື້ອດີເທົ່າທີ່ຄວນ. ສະນັ້ນ, ຈຶ່ງຮຽກຮ້ອງມາຍັງ ທຸກພາກສ່ວນໃນສັງຄົມ ຈົ່ງສືບຕໍ່ປະຕິບັດການດໍາລົງຊີວິດ ປົກກະຕິແບບໃໝ່ ໃຫ້ກາຍເປັນຄວາມຊິ້ນເຄີຍ, ພ້ອມທັງໝັ່ນສັງເກດອາການຂອງຕົນເອງ ແລະ ຄົນຄອບຄົວຫາກຮູ້ສຶກບໍ່ສະບາຍ ໃຫ້ຮີບຮ້ອນໄປພົບແພດ ເພື່ອຮັບການປິ່ນປົວຮັກສາ ເພື່ອສະກັດກັ້ນ ການລະບາດຂອງພະຍາດ COVID-19 ບໍ່ໃຫ້ກັບຄືນມາຮອບໃໝ່ໃນປະເທດເຮົາ.

Off

Comments are closed.