09th Sep2020

ພິທີເປີດສະຖານີໂທລະພາບກອງທັບປະຊາຊົນລາວ

by somchan

ພິທີເປີດສະຖານີ ໂທລະພາບກອງທັບ ປະຊາຊົນລາວ ໄດ້ຈັດຂຶ້ນ ໃນວັນທີ 9 ກັນຍາ 2020 ນີ້ ໂດຍການໃຫ້ກຽດເຂົ້າຮ່ວມຂອງ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ມີ ທ່ານ ເຈຍສາຍຕົງ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມແຫ່ງ ສປ ຈີນ ປະຈຳ ສປປ ລາວ ພ້ອມດ້ວຍຜູ້ຕາງໜ້າຈາກກະຊວງຖະແຫຼງຂ່າວ  ວັດທະນາທຳ ແລະ ທ່ອງທ່ຽວ, ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ບັນດາຄະນະພັກ-ຄະນະບັນຊາ ແລະ ພະນັກງານ-ນັກຮົບ ສະຖານີວິທະຍຸ-ໂທລະພາບກອງທັບເຂົ້າຮ່ວມ.

ໃນໂອກາດນີ້ ພົນຕີ ສອນທອງ ພົມມາວົງ ຮອງຫົວໜ້າກົມໃຫຍ່ການເມືອງກອງທັບ ໄດ້ລາຍງານກ່ຽວກັບການກໍ່ສ້າງ ແລະ ເປີດນຳໃຊ້ສະຖານີໂທລະພາບກອງທັບປະຊາຊົນລາວ ໄດ້ລົງມືກໍ່ສ້າງມາແຕ່ທີ 1 ມີນາ ປີ 2018 ໂດຍບໍລິສັດ ຫອມສົມບັດ ກໍ່ສ້າງ ເປັນຜູ້ຮັບເໝົາ ດ້ານຕຶກອາຄານ ຫ້ອງການ ແລະ ບໍລິສັດ ພັດທະນາ ເຕັກໂນໂລຢີລາວ ຈຳກັດ ແມ່ນຮັບເໝົາດ້ານເຄື່ອງເອເລັກໂຕນິກຮັບໃຊ້ ລວມມູນຄ່າ 11 ຕື້ກວ່າກີບ, ຊຶ່ງສົ່ງສັນຍານອອກອາກາດຜ່ານທາງຊ່ອງ 7 ໃນລະບົບດາວທຽມຂອງບໍລິສັດລາວ-ເອເຊຍປາຊິຟິກ ຫຼື ລາວແຊັດ 1.

ສະຖານີໂທລະພາບກອງທັບປະຊາຊົນລາວ ສ້າງຕັ້ງຂຶ້ນເພື່ອເປັນກະບອກສຽງອັນສຳຄັນ ໃຫ້ແກ່ການເຜີຍແຜ່ແນວທາງນະໂຍບາຍຂອງພັກ-ລັດ ກໍ່ຄືວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ, ການພັດທະນາເສດຖະກິດ-ສັງຄົມຂອງຊາດ, ຕອບສະໜອງຂໍ້ມູນຂ່າວສານ ທີ່ຖືກຕ້ອງ, ຊັດເຈນ ແລະ ວ່ອງໄວ ເພື່ອຮັບໃຊ້ສັງຄົມຢ່າງແທ້ຈິງ.

ໂອກາດດັ່ງກ່າວ ບັນດາຜູ້ເຂົ້າຮ່ວມຍັງໄດ້ພ້ອມກັນທ່ຽວຊົມພາຍໃນສະຖານີ ແລະ ຕັດແຖບຜ້າເປີດນ້ຳໃຊ້ສະຖານີໂທລະພາບກອງທັບປະຊາຊົນລາວອີກດ້ວຍ.

Off

Comments are closed.