10th Sep2020

ໃຕ້ການນໍາພາຂອງອົງຄະນະພັກກະຊວງ ປກສ ເຮັດໃຫ້ການດໍາເນີນຄະດີຖືກຕ້ອງຕາມແນວທາງ-ຄວາມເປັນຈິງ

by somchan

ພາຍໃຕ້ການຊີ້ນໍາ-ນໍາພາ ຂອງອົງຄະນະພັກກະຊວງປ້ອງກັນຄວາມສະຫງົບ ໃນໄລຍະ 5 ປີຜ່ານມາ, ເຫັນໄດ້ວ່າ: ການປະຕິບັດວຽກງງານວິຊາສະເພາະ ຂອງກົມໃຫ່ຍຕຳຫຼວດ ສາມາດຍາດໄດ້ຜົນງານ ແລະ ໄຊຊະນະຫຼາຍດ້ານ ສະແດງໃຫ້ເຫັນຢ່າງຈະແຈ້ງໃນການດໍາເນີນຄະດີຕາມຂະບວນຍຸຕິທໍາ ແຕ່ສູນກາງລົງຮອດທ້ອງຖິ່ນ ເຫັນວ່າ ມີຄວາມຖືກຕ້ອງຕາມແນວທາງ, ຕາມກົດຫມາຍ, ສອດຄ່ອງກັບຫຼັກການວິຊາສະເພາະ ແລະ ຖືກຕ້ອງຕາມຄວາມເປັນຈິງ

ພົຈວ ຄໍາກິ່ງ ຜຸຍຫຼ້າມະນີວົງ ເລຂາຄະນະພັກ ຫົວຫນ້າກົມໃຫຍ່ຕໍາຫຼວດ ກະຊວງ ປກສ ໄດ້ປະກອບຄໍາຄິດເຫັນໃນໂອກາດເຂົ້າຮ່ວມກອງປະຊຸມໃຫຍ່ຜູ້ແທນ ຄັ້ງທີ V ຂອງອົງຄະນະພັກກະຊວງ ປກສ ທີ່ຈັດຂຶ້ນໃນລະຫວ່າງວັນທີ 9-10 ກັນຍາ 2020 ນີ້ວ່າ: ຜ່ານການຈັດຕັ້ງປະຕິບັດວຽກງານສະກັດກັ້ນແກ້ໄຂ ແລະ ດຳເນີນຄະດີຂອງເຈົ້າໜ້າທີ່ຕຳຫຼວດໃນໄລຍະຜ່ານມາ, ແມ່ນສາມາດຮັບປະກັນໄດ້ທາງດ້ານແນວທາງນະໂຍບາຍຂອງພັກ, ກົດຫມາຍຂອງລັດ ແລະ ຫຼັກການວິຊາສະເພາະ ເປັນການປະກອບສ່ວນອັນສໍາຄັນເຂົ້າໃນການຮັກສາຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມ, ໃນນີ້ບັນຫາອາຊະຍາກໍາທີ່ພົ້ນເດັ່ນກວ່າຫມູ່ ແມ່ນບັນຫາຢາເສບຕິດ, ສໍ້ໂກງຊັບ, ປຸ້ນຊັບ,ຊິງຊັບ, ລັກຊັບ, ການຄ້າມະນຸດ, ອຸບັດຕິເຫດຕາມທ້ອງຖະຫນົນ ແລະ ອື່ນໆ ເຊິ່ງໄດ້ສ້າງຄວາມເສຍຫາຍທາງດ້ານຊີວິດ ແລະ ຊັບສິນເປັນຈໍານວນຫຼວງຫຼາຍ; ຕໍ່ຫນ້າສະພາບການດັ່ງກ່າວ, ອົງຄະນະພັກກະຊວງປ້ອງກັນຄວາມສະຫງົບ ເວລາໃດກໍ່ເປັນຫ່ວງເປັນໃຍ ແລະ ເອົາໃຈໃສ່ຊີ້ນໍາ-ນໍາພາເຫຼົ່າຮົບວິຊາສະເພາະ ໃນການດໍາເນີນຄະດີ ຕາມຂະບວນການຍຸຕິທໍາ ແຕ່ສູນກາງລົງຮອດທ້ອງຖິ່ນ ເພື່ອຮັບປະກັນການດໍາເນີນຄະຕິຖືກຕ້ອງຕາມແນວທາງ , ຕາມກົດຫມາຍ, ສອດຄ່ອງກັບຫຼັກການວິຊາສະເພາະ ແລະ ຖືກຕ້ອງຕາມຄວາມເປັນຈິງ ຂອງເຫດການແຕ່ລະຄະດີ, ເຊິ່ງເຮັດໃຫ້ສັງຄົມຮັບຮູ້ເຂົ້າໃຈ, ໃຫ້ການຮ່ວມມື ແລະ ເຂົ້າຮ່ວມຂະບວນການໃນການແກ້ໄຂບັນຫາ

ຕ່າງໆ.

ເຖິງຢ່າງໃດກໍ່ຕາມ, ເພື່ອຮັບປະກັນການດໍາເນີນຄະດີຕາມຂະບວນການຍຸຕິທໍາໃນຕໍ່ຫນ້າ, ໃຫ້ຖືກຕ້ອງຕາມແນວທາງຂອງພັກ, ລັດຖະທຳມະນູນຂອງຊາດ ແລະ ກົດໝາຍຂອງລັດ ອົງຄະນະພັກກະຊວງປ້ອງກັນຄວາມສະຫງົບ ຍັງໄດ້ສືບຕໍ່ນໍາພາກົມກອງວິຊາສະເພາະປັບປຸງແກ້ໄຂບາງບັນຫາທີ່ເປັນ

ອຸປະສັກຕໍ່ການດໍາເນີນຄະດີຄື: ສືບຕໍ່ສຶກສາອົບຮົມການເມືອງ-ແນວຄິດໃຫ້ແກ່ນາຍ ແລະ ພົນຕໍາຫຼວດໃຫ້ມີຄຸນທາດການເມືອງຫນັກແຫນ້ນ, ສ້າງພະນັກງານທີ່ເຮັດຫນ້າທີ່ໃນການດໍາເນີນຄະດີ ມີຄວາມຮັບຮູ້, ເຂົ້າໃຈ, ສະດຸ້ງໄວຕໍ່ເຫດການຕໍ່ຫນ້າທີ່ການເມືອງ ແລະ ຕີຖອຍແນວຄິດຄອງເດີມ, ຄໍາພີນິຍົມ, ໃນຕົວສວຍໃຊ້ຫນ້າ ແລະ ຂາດຄວາມຮັບຜິດຊອບ, ເຊິ່ງແມ່ນຄວາມຈໍາເປັນ ທີ່ຕ້ອງໄດ້ແກ້ໄຂໃຫ້ມີການຫັນປ່ຽນຢ່າງທັນການ; ຕັ້ງຫນ້າອອກແຮງບຳລຸງຍົກລະດັບພະນັກງານ ທີ່ເຮັດວຽກງານດຳເນີນຄະດີຢ່າງຕໍ່ເນື່ອງ ເພື່ອກໍາແຫນ້ນເລ່ລ່ຽມ ການເຄື່ອນໄຫວ ຂອງພວກກໍ່ອາຊະຍາກໍາແຕ່ລະໄລຍະ ປັບປຸງຖານຂໍ້ມູນໃນການຄຸ້ມຄອງເປົ້າຫມາຍກະທໍາຜິດທາງອາຍາແຕ່ລະປະເພດ, ແບບແຜນການສ້າງແຜນການມ້າງລາຍຄະດີ ຂັ້ນຕອນລະອຽດແຕ່ລະບາດກ້າວ ດໍາເນີນຄະດີ, ຄວາມເອົາໃຈໃສ່ກ່ຽວກັບການເກັບກຳຂໍ້ມູນຫຼັກຖານການກະທຳຜິດຂອງຜູ້ຖືກຫາເພື່ອເຮັດ ໃຫ້ການສະຫຼຸບຄະດີຖືກຕ້ອງ, ຄົບຖ້ວນ, ຊັດເຈນ ແລະ ພາວະວິໄສ ແລະ ປັບປຸງບັນດານິຕິກໍາ ກ່ຽວກັບການດໍາເນີນ ຄະດີໃຫ້ມີຄວາມຮັດກຸມເພື່ອສະກັດກັ້ນ ແລະ ຈຳກັດບັນຫາທີ່ຈະເປັນຊ່ອງຫວ່າງໃນການດໍາເນີນຄະດີ.

ພ້ອມທັງເອົາໃຈໃສ່ຕໍ່ວຽກງານສືບສວນຂັ້ນພື້ນຖານ ເພື່ອກໍາສະພາບການຮອບດ້ານ, ເອົາໃຈໃສ່ຕິດຕາມ, ກວດກາຄຸ້ມຄອງການດໍາເນີນຄະດີຢູ່ແຕ່ລະຂັ້ນ ໃຫ້ຮັບປະກັນຄວາມຍຸຕິທໍາ ແລະ ສາມາດເຊື່ອຖືໄດ້, ສ້າງອົງການສືບສວນ-ສອບສວນ ເພື່ອຮັບປະກັນໃຫ້ແກ່ການດໍາເນີນຄະດີຕາມຂະບວນການຍຸຕິທໍາ ແລະ ສົມຄູ່ກັບຄວາມຮຽກຮ້ອງຕ້ອງການ ຂອງວຽກງານໃນໄລຍະໃຫ່ມ, ປັບປຸງກົງຈັກການຈັດຕັ້ງ ການດໍາເນີນຄະດີ ຢູ່ຂັ້ນສູນກາງ ແລະ ທ້ອງຖິ່ນ ໃຫ້ຮັບປະກັນທາງດ້ານຈໍານວນ ແລະ ຄຸນນະພາບ ເພື່ອພັດທະນາ ແລະ ປັບປຸງທາງດ້ານນິຕິກຳກົງຈັກການຈັດຕັ້ງ, ບຸກຄະລາກອນ, ພາຫະນະ-ອຸປະກອນເຕັກນິກທີ່ທັນສະໄໝ ແລະ ຄວາມຮູ້ຄວາມສາມາດທາງດ້ານວິທະຍາສາດ ຕອບສະໜອງໃຫ້ແກ່ຄວາມຮຽກຮ້ອງຕ້ອງການຂອງວຽກງານ ແລະ ສ້າງເງື່ອນໄຂເອື້ອອຳນວຍຄວາມສະດວກໃຫ້ແກ່ການປະຕິບັດໜ້າທີ່ໃນການຕ້ານ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ ໂດຍສະເພາະການດຳເນີນຄະດີຂອງເຈົ້າໜ້າທີ່ຕຳຫຼວດ ເປັນໄປຕາມທິດທາງສ້າງລັດແຫ່ງກົດໝາຍ ແລະ ຮັບປະກັນຕາມຂະບວນຍຸດຕິທຳ.

Off

Comments are closed.