10th Sep2020

ແພດໝໍ ປກສ ເຂັ້ມງວດປ້ອງກັນໂຄວິດ 19 ໄລຍະດໍາເນີນກອງປະຊຸມ

by somchan

ໃນໄລຍະດຳເນີນກອງປະຊຸມໃຫຍ່ຜູ້ແທນ ຄັ້ງທີ V ຂອງອົງຄະນະພັກກະຊວງປ້ອງກັນຄວາມສະຫງົບ ທີ່ຈັດຂຶ້ນໃນລະຫວ່າງວັນທີ 9-10 ກັນຍາ 2020 ນີ້, ບັນດາແພດໝປກສເວົ້າລວມ, ເວົ້າສະເພາະແມ່ນ ກົມເສນາຮັກ ກົມໃຫຍ່ພະລາທິການ ໄດ້ສົມທົບກັບຫ້ອງວ່າການກະຊວງ ປກສ ໃນການປ້ອງກັນພະຍາດໂຄວິດ 19 ໃນໄລຍະດໍາເນີນກອງປະຊຸມໃຫຍ່ ຢ່າງເຂັ້ມງວດ ເພື່ອຮັບປະກັນບໍ່ໃຫ້ມີການແຜ່ລະບາດຂອງເຊື້ອພະຍາດດັ່ງກ່າວ.

ພັທ ນາງ ບຸນຮັກ ພາມີໄຊ ຫົວໜ້າພະແນກຮັກສາສຸຂະພາບ ກົມບໍລິຫານ ຫ້ອງວ່າການກະຊວງ ປກສ ໃຫ້ສໍາພາດວ່າ: ການກະກຽມຄວາມພ້ອມໃນການປ້ອງກັນ ການສະກັດກັ້ນການແຜ່ລະບາດຂອງພະຍາດໂຄວິ 19 ແມ່ນທາງກົມເສນາຮັກ ໄດ້ສົມທົບກັບຫ້ອງວ່າການກະຊວງ ປກສ ກໍຄືພະແນກຮັກສາສຸຂະພາບ ໂດຍມີການວາງກຳລັງແພດໝໍລົງກວດ ຈໍານວນ 6​ ຄົນ ແລະ ພະນັກງານວິຊາການຊ່ວຍວຽກອີກຈໍານວນໜຶ່ງ ເຊິ່ງຈະປະຈໍາຢູ່ 5 ຈຸດຄື: ດ້ານໃນ-ດ້ານນອກກອງປະຊຸມ, ດ້ານໜ້າກະຊວງ, ດ້ານຂ້າງ(ເບື້ອງທະນາຄານລາວ-ຫວຽດ) ແລະ ດ້ານຂ້າງ(ເບື້ອງຕໍ່ໜ້າວັດທາດຝຸ່ນ) ພ້ອມດຽວກັນນັ້ນ, ກໍມີແພດໝໍຈໍານວນ 2 ຄົນປະຈໍາຢູ່ໂຮງແຮມເພື່ອກວດຜູ້ແທນທີ່ມາແຕ່ຕ່າງແຂວງ; ສໍາລັບການກວດແມ່ນຈະມີການວັດແທກອຸ່ນຫະພູມ, ລ້າງມືດ້ວຍເຈວ ຫຼື ເຫຼົ້າ 70 ພ້ອມທັງຢາຍຜ້າປິດປາກໃຫ້ທຸກທ່ານທີ່ເຂົ້າຮ່ວມກອງປະຊຸມ; ຄຽງຄູ່ກັນນັ້ນ, ກໍຈະມີຢາຮັບໃຊ້ສຸກເສີນ ພ້ອມທັງມີລົດອາບຸລົງ(ລົດແພດ)ໄວ້ບໍລິການເພື່ອປ້ອງກັນການເກີດເຫດສຸກເສີນ ຫຼື ຖ້າຮ້າຍແຮງກໍຈະໄດ້ນໍາສົ່ງໂຮງໝໍ.

ການເຂັ້ມງວດຂອງແພດໝໍ ປກສ ໃນການປ້ອງກັນສະກັດກັ້ນການແຜ່ລະບາດຂອງພະຍາດໂຄວິດ 19 ນີ້ ບໍ່ສະເພາະແຕ່ໄລຍະດຳເນີນກອງປະຊຸມໃຫຍ່ເທົ່ານັ້ນ ແຕ່ທາງກົມເສນາຮັກແມ່ນໄດ້ມີການເຂັ້ມງວດກວດມາຕະຫຼອດ ແລະ ຍັງຈະສືບຕໍ່ສະກັດກັ້ນ ແລະ ການກວດພະຍາດດັ່ງກ່າວນີ້ເພື່ອຮັບປະກັນບໍ່ໃຫ້ມີການຕິດເຊື້ອພະຍາດດັ່ງກ່າວ.

Off

Comments are closed.