16th Sep2020

ຮອງນາຍົກລັດຖະມົນຕີຢ້ຽມຢາມຄ້າຍຄຸມຂັງຕານປ່ຽວ

by somchan

ໃນວັນທີ 16 ກັນຍານີ້ ທ່ານ ປອ ສອນໄຊ ສີພັນດອນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ – ການລົງທືນ, ປະທານຄະນະກຳມະການອະໄພຍະໂທດລະດັບຊາດ ພ້ອມດ້ວຍຄະນະ ກຳມະການອະໄພຍະໂທດລະດັບຊາດ ໄດ້ລົງພົບປະຢ້ຽມຢາມ ຄ້າຍຄຸມຂັງຕານປ່ຽວ ກົມຕຳຫຼວດຄຸມຂັງ-ດັດສ້າງ ກະຊວງ ປກສ. ໃຫ້ການຕ້ອນຮັບໂດຍ ພົຕ ປອ ສົມຫັວງ ທຳມະສິດ ຮອງລັດຖະມົນຕີ ກະຊວງ ປກສ, ພ້ອມດ້ວຍຄະນະກົມ,  ແລະ ພະນັກງານນັກຮົບພາຍໃນຄ້າຍ.

ພົຈວ ສົມລິດ ດາວຮຸ່ງສຸລິ ຫົວໜ້າກົມຕຳຫຼວດຄຸມຂັງ-ດັດສ້າງ ໄດ້ລາຍງານໂດຍຫຍໍ້ກ່ຽວກັບສະພາບຈຸດພິເສດຂອງຄ້າຍຄຸມຂັງຕານປ່ຽວ ແມ່ນຄ້າຍໜຶ່ງທີ່ຂຶ້ນກັບກົມຕຳຫຼວດຄຸມຂັງ-ດັດສ້າງ, ປະຈຸບັນມີນັກໂທດ ແລະ ຜູ້ຖືກດັດສ້າງ ທັງໝົດ 3 ພັນກ່ວາຄົນ, ຍິງ 265 ຄົນ. ສຳລັບການເຄື່ອນໄຫວວຽກງານຂອງເຈົ້າໜ້າທີ່ຄ້າຍຄຸມຂັງແມ່ນໄດ້ອີງໃສ່ບັນດາກົດໝາຍ ແລະ ນິຕິກຳ ເປັນຕົ້ນແມ່ນ ປະມວນກົດໝາຍອາຍາ, ກົດໝາຍວ່າດ້ວຍການດຳເນີນຄະດີອາຍາ, ກົດໝາຍວ່າດ້ວຍກຳລັງປກສ, ລັດຖະບັນຍັດຂອງປະທານປະເທດວ່າດ້ວຍການໃຫ້ອະໄພຍະໂທດ, ຂໍ້ຕົກລົງຂອງລັດຖະໝົນຕີກະຊວງ ປກສ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄ້າຍຄຸມຂັງ, ຄຳສັ່ງຂອງລັດຖະມົນຕີກະຊວງ ປກສ ວ່າດ້ວຍການເພີ່ນມທະວີວຽກງານປ້ອງກັນຄ້າຍຄຸມຂັງ-ດັດສ້າງ ແລະ ຄ້າຍກັກຂັງຊົ່ວຄາວ ໃນທົ່ວປະເທດ, ກົດລະບຽບຂອງກຳລັງຕຳຫຼວດຄຸມຂັງ-ດັດສ້າງ ແລະ ນິຕິກຳອື່ນໆ. ນອກຈາກຄຸ້ມຄອງ, ປ້ອງກັນ ແລະ ສືກສາອົບຮົມ, ແລ້ວທາງຄະນະຄຸ້ມຄອງຄ້າຍຍັງໄດ້ນຳພານັກໂທດ ທຳການຜະລິດ-ຝຶກວິຊາຊີບເຊັ່ນ: ສານຕິບເຂົ້າ, ແກະສະລັກ, ຜະລິດດິນບັອກ, ຝຶກການກໍ່ສ້າງ, ຮຽນຕັດຫຍິບເສື້ອຜ້າ ແລະ ຜະລິດຕະພັນຈຳນວນໜື່ງທີ່ນັກໂທດຜະລິດໄດ້ ແມ່ນສົ່ງອອກໄປຂາຍຕາມທ້ອງຕະຫຼາດ. ເພື່ອເປັນການແກ້ໄຂຊີວິດການເປັນຢູ່ໃຫ້ແກ່ນັກໂທດ ແລະ ສ້າງໃຫ້ເຂົາເຈົ້າມີອາຊີບ ພາຍຫຼັງພົ້ນໂທດອອກສູ່ສັງຄົມສາມາດໄປປະກອບອາຊີບໄດ້.

ໂອກາດນີ້ ທ່ານ ປອ ສອນໄຊ ສີພັນດອນ ໄດ້ໂອ້ລົມ ແລະ ເນັ້ນໜັກໃຫ້ຄະນະບັນຊາເພີ່ມທະວີການຊີ້ນຳ-ນຳພາຂອງພັກ ແລະ ການຄຸ້ມຄອງຂອງລັດ ຕໍ່ວຽກງານຄຸ້ມຄອງນັກໂທດ ແລະ ວຽກງານອະໄພຍະໂທດ, ເພີ່ມທະວີຍົກສູງຄວາມຮັບຜິດຊອບຕໍ່ວຽກງານຂອງຕົນ, ປະຕິບັດໜ້າທີ່ວຽກງານຄຸ້ມຄອງສະຖານທີ່ຄ້າຍຄຸມຂັງ ແລະ ປະຕິບັດຫຼັກການປະສານສົມທົບ ເພື່ອໃຫ້ສອດຄ່ອງຕາມລະບຽບ, ກົດໝາຍທີ່ໄດ້ກຳນົດໄວ້. ເອົາໃຈໃສ່ໃນການຄົ້ນຄ້ວາຄັດເລືອກເອົານັກໂທດທີ່ມີເງື່ອນໄຂສະເໜີໃຫ້ອະໄພຍະໂທດແຕ່ລະປີ ໃຫ້ຖືກຕ້ອງຕາມເງື່ອນໄຂ, ມີຄວາມໂປ່ງໃສ, ຍຸຕິທຳ ແລະ ທັນເວລາທີ່ກຳນົດໄວ້ໃນລັດຖະບັນຍັດວ່າດ້ວຍການອະໄພຍະໂທດ. ຜູ້ທີ່ເຮັດວຽກງານຄຸ້ມຄອງນັກໂທດ ຕ້ອງມີຄວາມໜັກແໜ້ນເຂັ້ມແຂງ, ຈົ່ງຮັກພັກດີ ເປັນເອກະພາບກັບແນວທາງນະໂຍບາຍຂອງພັກ ກົດໝາຍຂອງລັດ, ມີນ້ຳໃຈເສຍສະຫຼະ ເພື່ອຜົນປະໂຫຍດລວມຂອງຊາດ ແລະ ປະຊາຊົນບັນດາເຜົ່າຢ່າງແທ້ຈິງ.

Off

Comments are closed.