28th Sep2020

ຫາລືການປະຕິບັດນະໂຍບາຍຕໍ່ກໍາລັງປ້ອງກັນຄວາມສະຫງົບ

by somchan

ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມປຶກສາຫາລືປະກອບຄໍາຄິດເຫັນ ໃສ່ຮ່າງຂໍ້ຕົກລົງວ່າດ້ັ້ວຍການປະຕິບັດນະໂຍບາຍຕໍ່ ກໍາລັງປ້ອງກັນຄວາມສະຫງົບ ໃນວັນທີ 28 ກັນຍາ 2020, ໂດຍມີ ພົຕ ວັນທອງ ກອງມະນີ ຮອງເລຂາອົງຄະນະພັກກະຊວງ ຫົວໜ້າກົມໃຫຍ່ການເມືອງ ປກສ, ມີຄະນະພັກກະຊວງ, ຫົວໜ້າກົມໃຫຍ່, ວິທະຍາຄານ, ກອງບັນຊາການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ພັອ ນາງ ຈັນເດືອນ ເທພະວົງ ຫົວໜ້າກົມນະໂຍບາຍ ກົມໃຫຍ່ການເມືອງ ປກສ ໄດ້ຜ່ານຮ່າງຂໍ້ຕົກລົງວ່າດ້ວຍການປະຕິບັດນະໂຍບາຍຕໍ່ກໍາລັງປ້ອງກັນຄວາມສະຫງົບ ເຊິ່ງປະກອບມີ 14 ໝວດ, 43 ມາດຕາ; ຂໍ້ຕົກລົງສະບັບນີ້ໄດ້ກໍານົດຫຼັກການ, ລະບຽບການກ່ຽວກັບການຈັດຕັ້ງປະຕິບັດນະໂຍບາຍຂອງກະຊວງປ້ອງກັນຄວາມສະຫງົບ ຕໍ່ນາຍ ແລະ ພົນຕໍາຫຼວດ ທີ່ປະຈໍາການ ແລະ ບໍານານໃຫ້ສອດຄ່ອງກັບສະພາບຄວາມເປັນຈິງທາງດ້ານວັດຖຸ ແລະ ງົບປະມານທີ່ໄດ້ມາຈາກແຫຼ່ງລາຍຮັບຂອງກະຊວງປ້ອງກັນຄວາມສະຫງົບ ເພື່ອຊຸກຍູ້ສົ່ງເສີມ ນາຍ ແລະ ພົນຕໍາຫຼວດໃຫ້ມີຄວາມບຸກບືນຫ້າວຫັນ, ມີຄວາມອຸ່ນອ່ຽນທຸ່ນທ່ຽງ, ຍົກສູງຄວາມຮັບຜິດຊອບ, ເຮັດສໍາເລັດໜ້າທີ່ ປະກອບສ່ວນໃນພາລະກິດປົກປັກຮັກສາ ແລະ ສ້າງສາ ພັດທະນາປະເທດຊາດ; ການປະຕິບັດນະໂຍບາຍຕໍ່ກໍາລັງປ້ອງກັນຄວາມສະຫງົບ ແມ່ນການປະຕິບັດນະໂຍບາຍດ້ວຍຮູບການຕ່າງໆທາງດ້ານວັດຖຸ, ຊັບສິນ, ເງິນ, ພາຫະນະ ແລະ ນະໂຍບາຍອື່ນ ທີ່ມີຄຸນຄ່າທາງດ້ານຈິດໃຈ ຕໍ່ນາຍ ແລະ ພົນຕໍາຫຼວດທີ່ປະຈໍາການ ແລະ ບໍານານ ຜູ້ທີ່ມີຜົນງານໃນພາລະກິດປະຕິວັດຮັບໃຊ້ຊາດ, ຮັບໃຊ້ປະຊາຊົນ ທີ່ໄດ້ອຸທິດເລືອດເນື້ອເຫື່ອແຮງ, ສະຕິປັນຍາ ເຂົ້າໃນການເຮັດສໍາເລັດໜ້າທີ່ປົກປັກຮັກສາຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງດ້ານເສດຖະກິດ-ສັງຄົມ.

ໃນກອງປະຊຸມ ຜູ້ເຂົ້າຮ່ວມແຕ່ລະພາກສ່ວນແມ່ນໄດ້ຄົ້ນຄວ້າພິຈາລະນາ, ປະກອບຄໍາຄິດເຫັນໃສ່ຮ່າງຂໍ້ຕົກລົງດັ່ງກ່າວດ້ວຍຄວາມຮັບຜິດຊອບສູງ ເພື່ອຮັບປະກັນຄວາມຖືກຕ້ອງ ແລະ ສອດຄ່ອງກັບສະພາບຄວາມເປັນຈິງ ເມື່ອສໍາເລັດແລ້ວ ຈຶ່ງຈະສະເໜີໃຫ້ທ່ານລັດຖະມົນຕີກະຊວງປ້ອງກັນຄວາມສະຫງົບເຊັນຮັບຮອງ ແລະ ປະກາດໃຊ້ຢ່າງເປັນທາງການ.

Off

Comments are closed.