12th Oct2020

ລັດຖະມົນຕີ ກະຊວງ ປກສ ລົງກວດກາໂຄງການກໍ່ສ້າງອາຄານຫຼັງໃໝ່ ກົມຕຳຫຼວດກວດຄົນເຂົ້າ-ອອກເມືອງ

by somchan

ວັນທີ 6 ຕຸລາ 2020 ນີ້ ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງ ປກສ ພ້ອມດ້ວຍຮອງລັດຖະມົນຕີ ແລະ ບັນດາຄະນະນຳກະຊວງ ໄດ້ລົງກວດກາໂຄງການກໍ່ສ້າງອາຄານຫຼັງໃໝ່ ກົມຕຳຫຼວດກວດຄົນເຂົ້າ-ອອກເມືອງ ໃຫ້ກຽດຕ້ອນຮັບໂດຍ ພົນຈັດຕະວາ ປອ ບົວວັນ ວົງສາວັນທອງ ຫົວໜ້າກົມໃຫ່ຍສັນຕິບານ ມີພະນັກງານການນຳຂັ້ນກົມ ແລະ ຕາງໜ້າບໍລິສັດຮັບເໜົາໂຄງການເຂົ້າຮ່ວມ.

ພັນໂທ ເພັດດາວົງ ແກ້ວກັນຍາ ຫົວໜ້າຫ້ອງການກົມຕຳຫຼວດກວດຄົນເຂົ້າ-ອອກເມືອງໄດ້ລາຍງານວ່າ: ໂຄງການກໍ່ສ້າງອາຄານກົມຕຳຫຼວດກວດຄົນເຂົ້າ-ອອກເມືອງ ຕັ້ງຢູ່ບ້ານດົງນາໂຊກເໜືອ ເມືອງສີໂຄດຕະບອງ ນະຄອນຫຼວງວຽງຈັນ ມີເນື້ອທີ່ດິນທັງໝົດ 2 ເຮັກຕາ, ໂດຍໄດ້ຮັບການສະໜັບສະໜູນໃຫ້ທຶນກໍ່ສ້າງຈາກລັດຖະບານ ສ ເກົາຫຼີ ໂດຍຜ່ານອົງການຮ່ວມມືສາກົນ ສ ເກົາຫຼີ, ເປັນອາຄານ 5 ຊັ້ນ ໂຄງການດັ່ງກ່າວໄດ້ເລີ່ມລົງມືກໍ່ສ້າງມາແຕ່ເດືອນ 7 ປີ 2019 ກຳນົດເວລາກໍ່ສ້າງ 27 ເດືອນ ເຊິ່ງໃນປະຈຸບັນດຳເນີນໜ້າວຽກສຳເລັດປະມານ 43% ໃນໄລຍະເວລາ 15 ເດືອນ, ຮັບເໜົາກໍ່ສ້າງໂຄງການໂດຍແມ່ນ ບໍລິສັດອຳມະຕະລາວລ້ານຊ້າງຈຳກັດ.

ຈາກນັ້ນທ່ານລັດຖະມົນຕີກະຊວງ ປກສ ກໍ່ໄດ້ເນັ້ນໜັກໃຫ້ບໍລິສັດອຳມະຕະລາວລ້ານຊ້າງຈຳກັດ ແລະ ພະນັກງານວິຊາການທີ່ປະຈຳຢູ່ສະຖານທີ່ຈົ່ງພ້ອມກັນເອົາໃຈໃສ່ຈັດຕັ້ງປະຕິບັດບັນດາໜ້າວຽກຕ່າງໆຂອງໂຄງການ ໃຫ້ມີຄຸນນະພາບ ແລະ ສຳເລັດຕາມໄລຍະເວລາຂອງສັນຍາ.

Off

Comments are closed.