12th Oct2020

ກອງປະຊຸມໃຫຍ່ຄັ້ງທີ III ຂອງສະມາຄົມສິລະປະແຄນລາວ ກະຊວງຖະແຫຼງ ຂ່າວ ວັດທະນະທຳ ແລະ ທ່ອງທ່ຽວ   

by somchan

ກອງປະຊຸມໃຫຍ່ຄັ້ງທີ III ຂອງສະມາຄົມສິລະປະແຄນລາວ ກະຊວງຖະແຫລງ ຂ່າວ ວັດທະນະທຳ ແລະ ທ່ອງທ່ຽວ ໄດ້ຈັດໃນວັນທີ 8 ຕຸລາ 2020 ນີ້ ພາຍໄຕ້ການເປັນປະທານຂອງ ທ່ານ ສຈ ປອ ຈະເລີນ ເຍຍປາວເຮີ ກຳມະການ ສູນກາງພັກ ປະທານຄະນະ ຂົນຂວາຍສ້າງຕັ້ງ ສະມາຄົມ ສິລະປະແຄນລາວ ເປັນກຽດເຂົ້າຮ່ວມຂອງ ທ່ານ ສຈ ປອ ກິແກ້ວ ໄຂຄຳພິທູນ ເລຂາທິການສູນກາງພັກ ລັດຖະມົນຕີ ກະຊວງ ຖະແຫລງຂ່າວ ວັດທະນະທຳ ແລະ ທ່ອງທ່ຽວ , ທ່ານ ສົມສະຫວາດ ເລັ່ງສະຫວັດ ອາດີດກຳມະການກົມການເມືອງສູນກາງພັກ ອາດີດຮອງນາຍຍົກລັດຖະມົນຕີ ມີທ່ານຫົວຫນ້າ-ຮອງປະທານສະໂມສອນ ສິລະປະແຄນລາວ ຕາງຫນ້າ ຈາກກະຊວງ ອົງການທຽບເທົ່າ ຕົວແທນຈາກສະມາຄົມສິລະປະແຄນລາວທົ່ວປະເທດ ແລະ ສື່ມວນຊົນເຂົ້າຮ່ວມ.

ທ່ານ ສຈ ປອ ຈະເລີນ ເຢຍປາວເຮີ ໄດ້ກ່າວວ່າ: ແຄນ ແມ່ນ ເຄືອງດົນຕີປະຈຳຊາດລາວ ເຊີ່ງເກີດຈາກພູມປັນຍາ ຂອງບັນພະບູລຸດລາວ ໄດ້ປະດິດສ້າງຂື້ນມາ ໃຊ້ເປົ່າຕາມປະເພນີ  ຫຼື ປະສານກັບສຽງຂັບສຽງລຳ ທ້ອງຖີ່ນ ດ້ວຍສຽງສຳນຽງຈັ່ງວະຕ່າງໆ ຢ່າງກົມກືນອ່ອນຊອນ ມ່ວນຊື້ນ ຊື່ງເປັນຫຼັກ ຖານປະຫວັດສາດ ຢືນຢັນໄດ້ວ່າ:  ຢູ່ບ່ອນໃດມີແຄນ ສຽງແຄນ ຢູ່ບ່ອນນັ້ນມີຄົນລາວ ມີແຄນຕ້ອງມີຂັບມີລຳຢູ່ນຳກັນຄືເງົາຕາມຕົວ ຕິດພັນກັບວິຖີຊີວິດ ແລະ ວັດທະນາທຳ ຂອງຄົນລາວບັນດາເຜົ່າ ມາແຕ່ດືກດຳບັນ, ໃນອາດິດ ເຖີງປະເທດລາວ ຈະຖືກເປັນຫົວເມືອງຂື້ນກັບຕ່າງຊາດມາຫຼາຍຮ້ອຍປີກໍ່ຕາມ, ແຕ່ແຄນ ແລະ ສຽງແຄນລາວ ຍັງຝັງເລີກໃນຈິດໃຈ ແລະ ຕິດພັນກັບວິຖີຊີວິດ ວັດທະນາທຳ ແລະ ຮິດຄອງປະເພນີອັນດີງາມ ຂອງຄົນລາວ ແລະ ຊາດລາວ ຈົນເຖີງທຸກມື້ນີ້ ພັກ-ລັດເຮົາ ຢາມໃດກໍ່ຖືສຳຄັນຕໍ່ແຄນ ແລະ ການຂັບລຳທ້ອງຖີ່ນຕ່າງໆຂອງປະເທດ ໂດຍສະເພາະກະຊວງຖະແຫຼງຂ່າວ ວັດທະນາທຳ ແລະ ທ່ອຽທ່ຽວ ບໍ່ວ່າຢາມໃດກໍ່ໄດ້ເອົາໃຈໃສ່ສົ່ງເສີມ ແລະ ໃຫ້ການຊີ້ນຳວຽກສີລະປະ ວັດທະນາທຳ ທີເປັນເອກກະລັກຂອງຊາດລາວ ທີ່ຕິດພັນກັບແຄນ ແລະ ສຽງແຄນຂອງຊາດລາວ ຜ່ານການເຄື່ອນໄຫວຢ່າງຕັ້ງໜ້າໃນໄລຍະ 15 ປີ ຂອງຄະບໍລິຫານງານ ສະມາຄົມສິລະປະແຄນລາວ 2 ສະໄຫມ ທີ່ຜ່ານມາ, ໄດ້ປະກອບສ່ວນສໍາຄັນເຂົ້າໃນການເຄື່ອນໄຫວຮັບໃຊ້ສັງຄົມຕາມບົດບາດຂອງຕົນ ພາຍຫຼັງທີ່ອົງການອຸຍແນສ ໂກ ໄດ້ຮັບຮອງເອົາສຽງແຄນລາວ ເປັນມໍຣະດົກ ວັດທະນະທໍານາມມະທໍາຂອງຄົນເຊື້ອ ຊາດລາວ ແລະ ເປັນມໍຣະດົກວັດທະນະທໍານາມ ມະທໍາຂອງມວນມະນຸດໂລກ ໃນວັນທີ 7 ທັນວາ ປີ 2017 ຜ່ານມາ, ສະມາຄົມສິລະປະແຄນລາວ ໄດ້ເຕົ້າໂຮມ ຫມໍແຄນ, ຫມໍຂັບ ຫມໍລໍາຕ່າງໆ ແລະ ຊ່າງແຄນ ໃຫ້ກວ້າງຂວາງ ຕັ້ງຫນ້າປະກອບສ່ວນປົກປັກຮັກສາ ແລະ ເສີມຂະຫຍາຍ ແຫຼ່ງວັດຖເຮັດແຄນ, ມູນເຊື້ອແຄນ ແລະ ສຽງແຄນເຊື້ອຊາດລາວ ມໍຣະ ດົກໂລກ ໃຫ້ ຍືນຍົງຄົງຢູ່ຄູ່ຄົນລາວ ຊາດລາວ ແລະ ຊາວໂລກຕະຫຼອດໄປ.

ເພື່ອສືບຕໍ່ສົ່ງເສີມມູນເຊື້ອວັດທະນະທໍາອັນດີງາມຂອງຊາດ ສະມາຄົມສິລະປະແຄນ ລາວໃນຕໍ່ຫນ້າ ຈະສືບຕໍ່ ປັບປຸງການຈັດຕັ້ງສະມາຄົມສິລະປະແຄນລາວ ໃຫ້ເຂັ້ມແຂງ ມີ ຄວາມສາມາດ ນໍາພາ-ຊີ້ນໍາເຄື່ອນໄຫວວຽກງານຕາມ ພາລະບົດບາດທີ່ໄດ້ກໍານົດໄວ້. ໂອກາດນີ້ກໍ່ໄດ້ຮັບຮອງ ເອົາຄະນະບໍລິຫານງານສະມາຄົມ ສີລະປະແຄນລາວຊຸດໃໝ່ ເພື່ອສືບຕໍ່ຊີ້ນຳ-ນຳພາສະມາຄົມຕື່ມອີກ.

 

 

Off

Comments are closed.