14th Oct2020

ກອງບັນຊາການ ປກສ ແຂວງອຸດົມໄຊ ສຸມໃສ່ແກ້ໄຂບັນດາເປົ້າໝາຍກໍ່ອາຊະຍາກຳ

by somchan

ໃນວັນທີ 08 ຕຸລາ 2020 ນີ້, ຢູ່ທີ່ສະໂມສອນກອງບັນຊາການ ປກສ ແຂວງອຸດົມໄຊ ໂດຍການເປັນປະທານຂອງ ພັອ ສີວອນ ໄຊຍະວົງ ຄະນະປະຈຳພັກແຂວງ  ,ເລຂາຄະນະພັກ ຫົວໜ້າກອງບັນຊາການ ປກສ ແຂວງອຸດົມໄຊ ມີຄະນະພັກ ຄະນະບັນຊາ,ພະນັກງານຫຼັກແຫຼ່ງເຂົ້າຮ່ວມຢ່າງພ້ອມພຽງ.

ພັນໂທ ປທ ສອນວິໄລ ຕຸລາທອງ ຄະນະປະຈຳພັກ ຮອງຫົວໜ້າກອງບັນຊາການ ປກສ ແຂວງອຸດົມໄຊ ໄດ້ຂື້ນຜ່ານຮ່າງແຜນການວ່າດ້ວຍການເຄື່ອນໄຫວສະກັດກັ້ນ ແລະ ແກ້ໄຂປະກົດການຫຍໍ້ທໍ້ທົ່ວແຂວງອຸດົມໄຊ ປະຈຳໄຕມາດ IV, ປີ 2020 ຈຸດປະສົງແມ່ນສຸມໃສ່ແກ້ໄຂບັນດາເປົ້າໝາຍກໍ່ອາສະຍາກຳຕ່າງໆຢູ່ໃນທົ່ວແຂວງ ,ເປັນຕົ້ນແມ່ນສຸມໃສ່ແກ້ໄຂການເຄື່ອນໄຫວກະທຳຜິດຂອງຄົນຕ່າງປະເທດ ເຊັ່ນການແຕ່ງງານກັບຄົນລາວທີ່ບໍ່ຖືກຕ້ອງ,ລັກປະກອບອາຊີບ,ເຂົ້າເມືອງຜິດກົດໝາຍ,ບັນຫາຢາເສບຕິດ,ເປົ້າໝາຍຊື້-ຂາຍ,ຜະລິດ,ປຸງແຕ່ງ,ນຳເຂົ້າສົ່ງອອກ,ຈຸດມົ້ວສຸມເສບຢາເສບຕິດ,ເປົ້າໝາຍການປູກຝິ່ນຢູ່ບັນດາພື້ນທີ່ຕ່າງໆໂດຍເລັ່ງໃສ່ເທດສະບານເມືອງໄຊ ແລະ ເມືອງທີ່ມີຄວາມສ່ຽງໃນທົ່ວແຂວງ,ເປົ້າໝາຍການເຄື່ອນໄຫວລັກຊັບ,ປຸ້ນຊັບ,ຊິງຊັບ, ຄ້າ-ຂາຍເຖື່ອນສິນຄ້າເກືອດຫ້າມການພະນັນ,ຫວຍເຖື່ອນ,ການປ່ອຍເງິນກູ້ນອກລະບົບ,ການຄ້າມະນຸດ,ບັນຫາໂສເພນີ,ຊັບພະຍາກອນທຳມະຊາດສິ່ງແວດລ້ອມ,ວຽກງານ,ສະກັດກັ້ນ ແລະ ຕ້ານອັກຄີໄຟ,ການແກ້ໄຂສະພາບອຸບັດຕິເຫດຕາມທ້ອງຖະໜົນ ແລະ ແຜນຈຸດສຸມວຽກງານອື່ນໆອີກຈຳນວນໜຶ່ງ. ຈາກນັ້ນກໍ່ໄດ້ຜ່ານແຜນປ້ອງກັນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກຕິດພັນກັບການກະກຽມສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ; ຂໍ້ຕົກລົງຂອງກອງບັນຊາການ ປກສ ແຂວງອຸດົມໄຊ ວ່າດ້ວຍການແຕ່ງຕັ້ງຄະນະຊີ້ນຳ-ບັນຊາລວມ ແລະ ແຜນບັນຈຸພະນັກງານປ້ອງກັນກອງປະຊຸມໃຫຍ່ ຄັ້ງທີ XI ຂອງພັກ,ໃນພິທີຍັງໄດ້ຜ່ານຂໍ້ຕົກລົງຂອງກະຊວງປ້ອງກັນຄວາມສະຫງົບ ວ່າດ້ວຍການອະນຸມັດໃຫ້ນາຍຕຳຫຼວດພັກການ ຮັບອຸດໜູນບຳນານ ຈຳນວນ 03 ສະຫາຍ ຈາກນັ້ນຜູ້ເຂົ້າຮ່ວມກອງປະຊຸມໄດ້ພັດປ່ຽນກັນປະກອບຄໍາຄິດເຫັນ ແລກປ່ຽນຖອດຖອນບົດຮຽນເຂົ້າໃນແຜນວຽກງານປ້ອງກັນເພື່ອເຮັດໃຫ້ການ ຈັດຕັ້ງປະຕິບັດໄດ້ຮັບຜົນສຳເລັດຕາມຈຸດປະສົງລະດັບຄາດໝາຍທີ່ວາງໄວ້.

Off

Comments are closed.