19th Oct2020

ຜົນສໍາເລັດ ຂອງກອງປະຊຸມຄົບຄະນະ ບໍລິຫານງານສູນກາງພັກຄັ້ງທີ 11 ສະໄຫມທີ X

by somchan

ກອງປະຊຸມຄົບຄະນະຄັ້ງທີ 11 ສະໄຫມທີ X ຂອງຄະນະບໍລິຫານງານສູນກາງພັກ ໄດ້ດໍາເນີນ ຢ່າງເປັນທາງການ ແຕ່ວັນທີ 12 ເຖິງວັນທີ 16 ຕຸລາ 2020 ຢູ່ສໍານັກງານ ສູນກາງພັກ, ພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ,ປະທານປະເທດ ມີບັນດາ ກໍາມະການກົມການເມືອງສູນກາງພັກ, ຄະນະເລຂາທິການສູນກາງ ພັກ, ທີ່ປຶກສາຄະນະບໍລິຫານ ງານສູນກາງພັກ, ກໍາມະການສູນກາງພັກ ສົມບູນ ແລະ ສໍາຮອງ ພ້ອມທັງເລຂາ ຄະນະພັກ ກະຊວງ-ອົງການ ແລະ ເລຂາພັກແຂວງ ເຂົ້າຮ່ວມຢ່າງພ້ອມພຽງ.

ກອງປະຊຸມ ໄດ້ຄົ້ນຄວ້າຕີລາຄາສູງ ຕໍ່ການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ X ຂອງ ພັກ ກໍຄືແຜນພັດທະນາ ເສດຖະກິດ-ສັງຄົມ 5 ປີຄັ້ງທີ VIII ທີ່ມີຜົນສໍາເລັດເປັນຢ່າງດີ, ເຮັດໃຫ້ ປະເທດຊາດ ສືບຕໍ່ຮັກສາໄດ້ສະຖຽນລະພາບ ທາງດ້ານການເມືອງຢ່າງຫນັກແຫນ້ນ, ສັງຄົມມີຄວາມ ສະຫງົບ ໂດຍພື້ນຖານ, ແນວທາງປ້ອງກັນຊາດ-ປ້ອງກັນ ຄວາມສະຫງົບ ທົ່ວປວງຊົນຮອບດ້ານ ໄດ້ ຮັບການຈັດຕັ້ງ ປະຕິບັດຢ່າງຕັ້ງຫນ້າ, ຮັກສາໄດ້ຄວາມເປັນເອກະລາດ, ອໍານາດອະທິປະໄຕ ແລະ ລະບອບປະຊາທິປະໄຕ ປະຊາຊົນ ໄວ້ໄດ້ຢ່າງຫມັ້ນຄົງ ແລະ ຫນັກແຫນ້ນ; ເສດຖະກິດເຖິງວ່າ ບໍ່ບັນລຸໄດ້ ຕາມຄາດຫມາຍ ແຜນການທີ່ວາງໄວ້ ແຕ່ກໍ່ຍັງສືບຕໍ່ຂະຫຍາຍຕົວຢ່າງຕໍ່ເນື່ອງ; ບັນດາໂຄງການລົງທຶນ ໃຫຍ່ໆ ເຊັ່ນ: ໂຄງການສ້າງ ເສັ້ນທາງລົດໄຟ ລາວ-ຈີນ, ໂຄງການທາງດ່ວນ, ໂຄງການພັດທະນາ ແລະ ຂຸດຄົ້ນພະ ລັງງານ-ບໍ່ແຮ, ໂຄງການກໍ່ສ້າງເຂດ ເສດຖະກິດພິເສດ ຕິດພັນກັບການຈັດສັນ “ໃດເມືອງ ຊົນນະບົດ, ໂຄງການສົ່ງເສີມດ້ານການທ່ອງທ່ຽວ ແລະ ໂຄງການສໍາຄັນອື່ນໆ ກໍໄດ້ສືບຕໍ່ຈັດຕັ້ງ ປະຕິບັດ ໄປຕາມແຜນທີ່ກໍານົດໄວ້; ການພັດທະນາທາງດ້ານພື້ນຖານວັດຖຸເຕັກນິກ, ທາງດ້ານ ວັດທະນະທໍາ-ສັງຄົມ, ການແກ້ໄຂ ຄວາມທຸກຍາກ ຂອງປະຊາຊົນ ໄດ້ຮັບການພັດທະນາ ແລະ ເອົາໃຈໃສ່ແກ້ໄຂຢ່າງຕັ້ງຫນ້າ ແລະ ມີຜົນສໍາເລັດເປັນກ້າວໆ; ການປະຕິບັດ ມາດຕະການຕ້ານ-ປ້ອງ ກັນ ພະຍາດ ໂຄວິດ-19 ກໍໄດ້ດໍາເນີນດ້ວຍຜົນສໍາເລັດ ໃນລະດັບດີສົມຄວນ.

ກອງປະຊຸມເປັນເອກະພາບ ຕໍ່ບັນດາທິດທາງ ມາດຕະການກະຕຸ້ນ ແລະ ຍູ້ແຮງການເຕີບໂຕ ຂອງ ເສດຖະກິດ-ສັງຄົມ ໂດຍສະເພາະໃນໄລຍະ ທີ່ເສດຖະກິດ ຖືກຜົນກະທົບຈາກພະຍາດ ໂຄວິດ19 ໄດ້ພະຍາຍາມປັບປຸງ ສະພາບແວດລ້ອມຂອງການລົງທຶນ ໃຫ້ມີຄວາມສອດຄ່ອງ ແລະ ສືບຕໍ່ຍູ້ ແຮງການຜະລິດ ເປັນສິນຄ້າຕາມທ່າແຮງ ຂອງແຕ່ລະຂະແຫນງການ ແລະ ແຕ່ລະທ້ອງຖິ່ນ, ມີການ ປັບປຸງການຄຸ້ມຄອງ ແລະ ສົ່ງເສີມການຜະລິດສິນຄ້າ ເພື່ອຊົມໃຊ້ພາຍໃນ ແລະ ສົ່ງອອກ ເພື່ອສ້າງລາຍ ຮັບແຫ່ງຊາດໃຫ້ເພີ່ມຂຶ້ນ, ເອົາໃຈໃສ່ແກ້ໄຂ ການເຄື່ອນໄຫວທຸລະກິດ, ການບໍລິການ, ການແບ່ງຂັ້ນ ຄຸ້ມຄອງ ແລະ ການປະສານງານ ລະຫວ່າງສູນກາງພັກ ແລະ ທ້ອງຖິ່ນ ໃຫ້ມີຄວາມກົມກຽວຫລາຍຂຶ້ນ; ກົນ | ໄກການບໍລິຫານທີ່ມີ ຫລາຍຂອດຫລາຍຂັ້ນ ເລີ່ມມີການປັບປຸງແກ້ໄຂ; ສຸມໃສ່ແກ້ໄຂຫນີ້ສິນ ສາທາລະນະ, ເລັ່ງປັບປຸງລັດວິສາຫະກິດ ຈໍານວນຫນຶ່ງເຮັດໃຫ້ການດໍາເນີນທຸລະກິດ ມີປະສິດທິຜົນດີ ຂຶ້ນ, ລວມທັງເອົາໃຈໃສ່ສະກັດກັ້ນ ແລະ ແກ້ໄຂການຮົ່ວໄຫລ ຂອງງົບປະມານຢ່າງເຂັ້ມງວດ; ຄຸ້ມ ຄອງການປະຕິບັດ ລະບຽບລາຍຈ່າຍບໍລິຫານ ກໍຄືການລົງທຶນຂອງລັດ ຢ່າງມີຈຸດສຸມ ແນໃສ່ສ້າງການ ຫັນປ່ຽນ ທີ່ແທ້ຈິງໃນຊຸມປີຕໍ່ຫນ້າ.

ການກະກຽມ ກອງປະຊຸມສະໄມສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ແລະ ການ ກະກຽມດໍາເນີນການເລືອກຕັ້ງ ສະມາຊິກສະພາແຫ່ງຊາດ ຊຸດທີ IX; ສະພາປະຊາຊົນແຂວງຊຸດທີ II. ທັງນັ້ນກໍເພື່ອແນໃສ່ສ້າງການ ຫັນປ່ຽນທີ່ແຂງແຮງ ແລະ ເລິກເຊິ່ງໃນການຍົກສູງປະສິດ ທິພາບການເຄື່ອນໄຫວປະຕິບັດ ພາລະບົດບາດ, ຫນ້າທີ່ຂອງສະພາແຫ່ງ ຊາດ ແລະ ສະພາປະຊາຊົນແຂວງ ໃນເງື່ອນໄຂໃຫມ່ ໃຫ້ພົ້ນເດັ່ນຂຶ້ນຕື່ມ.

ກອງປະຊຸມ ໄດ້ປະກອບຄໍາເຫັນໃສ່ຮ່າງ ລາຍງານການເມືອງ ທີ່ຈະສະເຫນີຕໍ່ກອງປະຊຸມໃຫຍ່ ຄັ້ງ ທີ XI ຂອງພັກ ໂດຍເນັ້ນຫນັກໃສ່ບັນຫາທີ່ເປັນທັດສະນະພື້ນຖານ, ລັກສະນະນໍາ ຫນ້າຂອງພັກ, ການເຕົ້າໂຮມຄວາມສາມັກຄີ ເປັນປຶກແຜ່ນ, ບັນຫາການຍຶດຫມັ້ນ ແລະ ຜັນຂະຫຍາຍແນວທາງປ່ຽນແປງໃຫມ່, ບັນຫາການປົກປັກຮັກສາ ຫມາກຜົນຂອງການປະຕິວັດ, ສ້າງການຫັນປ່ຽນໃຫມ່ ໃນການພັດທະນາ, ການຍົກສູງຄຸນນະພາບຊີວິດຂອງປະຊາຊົນ, ການນໍາເອົາປະເທດຊາດຫລຸດພົ້ນອອກຈາກຄວາມດ້ອຍພັດທະນາ ແລະ ກ້າວຂຶ້ນສູ່ຈຸດຫມາຍສັງຄົມນິຍົມ.

ພ້ອມນັ້ນ ກອງປະຊຸມຍັງໄດ້ປະກອບຄໍາເຫັນໃສ່ຮ່າງແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໂດຍສຸມໃສ່ປືກສາຫາລື ການປັບປຸງໂຄງປະກອບເສດຖະກິດ, ການກໍານົດຕົວເລກ ການເຕີບໂຕ GDP ແລະ ບັນຫາທີ່ເປັນພື້ນຖານ ໃນຂົງເຂດສັງຄົມ ເປັນຕົ້ນແມ່ນ ຂະແຫນງທີ່ພົວພັນເຖິງການສ້າງຊັບພະຍາກອນມະນຸດ ກໍຄື ສ້າງສັກກາຍະພາບ ໃຫ້ແກ່ຄົນລາວ, ການສົ່ງເສີມການສຶກສາ , ການເຂົ້າເຖິງແຫລ່ງ ສາທາລະນະສຸກ ແລະ ການສົ່ງເສີມຄວາມສາມາດ ຂອງແຮງງານລາວ, ການພັດທະນາຊົນນະບົດ ແກ້ໄຂຄວາມທຸກຍາກ ຕາມທິດສ້າງຊົນນະບົດໃຫມ່.

ກອງປະຊຸມ ຍັງໄດ້ສຸມໃສ່ຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນໍາຕໍ່ ການປັບປຸງຮ່າງກົດລະບຽບ ຂອງ ພັກປະຊາຊົນປະຕິວັດລາວ ສະໄຫມທີ XI, ຂໍ້ຕົກລົງວ່າດ້ວຍລະບອບ ແລະ ແບບແຜນວິທີເຮັດວຽກ ຂອງຄະນະບໍລິຫານງານສູນກາງພັກ, ກົມການເມືອງສູນກາງພັກ ແລະ ຄະນະເລຂາທິການ ສູນກາງພັກ ໃຫ້ສອດຄ່ອງ ແລະ ຮັບປະກັນຫລັກການນໍາພາ ຂອງພັກໃນສະພາບການໃຫມ່, ຕີລາຄາ ແລະ ໃຫ້ການຊີ້ນໍາ ການສຶບຕໍ່ກະກຽມ, ດໍາເນີນກອງປະຊຸມໃຫຍ່ ອົງຄະນະພັກຂັ້ນຕ່າງໆ ແລະ ກອງປະຊຸມໃຫຍ່ ຄັ້ງ ທີ XI ຂອງພັກ ຮັບປະກັນເຮັດໃຫ້ພັກ ມີຄວາມປອດໃສ-ເຂັ້ມແຂງ ແລະ ຫນັກແຫນ້ນ.

ໃນຕອນທ້າຍຂອງກອງປະຊຸມ ສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ໄດ້ເນັ້ນຫນັກໃຫ້ທົ່ວພັກຈົ່ງສືບຕໍ່ເສີມຂະຫຍາຍມູນເຊື້ອ ຄວາມສາມັກຄີເປັນເອກະພາບ, ເພີ່ມທະວີຄວາມເອົາໃຈໃສ, ນໍາພາ-ຊີ້ນໍາ ປະຕິບັດຫນ້າທີ່ການເມືອງ ທີ່ໄດ້ຮັບມອບຫມາຍ ໃຫ້ສູງຂຶ້ນຕື່ມອີກ. ພ້ອມກັນ ສືບຕໍ່ກະກຽມ ຄວາມພ້ອມດ້ານຕ່າງໆ ໃຫ້ແກ່ການດໍາເນີນ ກອງປະຊຸມໃຫຍ່ຂອງອົງ ຄະນະພັກແຂວງ, ກະຊວງ-ອົງການຢ່າງເປັນຂະບວນຟົດຟື້ນ, ສ້າງພື້ນຖານອັນຫນັກແຫນ້ນ ໃຫ້ແກ່ການດໍາເນີນ ກອງ ປະຊຸມໃຫຍ່ຄັ້ງທີ XI ຂອງພັກ ປະຊາຊົນ ປະຕິວັດລາວ ໃຫ້ມີຜົນສໍາເລັດ ຢ່າງຈົບງາມ.

 

 

Off

Comments are closed.