22nd Oct2020

ທ່ານຮອງລັດຖະມົນຕີ ກະຊວງ ປກສ ລົງເຄື່ອນໄຫວຊີ້ນໍາວຽກງານປ້ອງກັນໂຄງການກໍ່ສ້າງທາງລົດໄຟລາວ-ຈີນ

by somchan

ວັນທີ 21 ຕຸລາ 2020  ທ່ານ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ຜູ້ຊີ້ນໍາວຽກງານປ້ອງກັນໂຄງການກໍ່ສ້າງທາງລົດໄຟລາວ-ຈີນ ພ້ອມດ້ວຍຄະນະ ລົງເຄື່ອນໄຫວຊີ້ນໍາວຽກງານປ້ອງກັນໂຄງການກໍ່ສ້າງທາງລົດໄຟລາວ-ຈີນ ຢູ່ທີ່ສະກອງບັນຊາການ ປກສ ແຂວງວຽງຈັນ ໂດຍການຕ້ອນຮັບຂອງ ພົຈວ ປອ ທອງເຄນ ບຸນໝັ້ນ ຫົວໜ້າກອງບັນຊາການ ປກສ ແຂວງວຽງຈັນ ມີຄະນະພັກ-ຄະນະກອງບັນຊາການ, ຕາງໜ້າຫ້ອງ, ກອງພັນປ້ອງກັນເຄື່ອນທີ່, ຄ້າຍຄຸມຂັງ-ດັດສ້າງ ພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.

ພັທ ສົມຄິດ ດວງພະຈັນ ຮອງຫົວໜ້າກອງບັນຊາການ ປກສ ແຂວງວຽງຈັນ ຜູ້ຊີ້ນໍາວຽກງານປ້ອງກັນໂຄງການກໍ່ສ້າງເສັ້ນລົດໄຟທາງລາວ-ຈີນ ແຂວງວຽງຈັນ ໄດ້ລາຍງານການຈັດຕັ້ງປະຕິບັດວຽກງານໃນໄລຍະຜ່ານມາ ເຊີ່ງທ່ານໄດ້ຍົກໃຫ້ເຫັນສະພາບການຄວາມບໍ່ເປັນລະບຽບຮຽບຮ້ອຍພາຍໃນ ໂຄງການກໍ່ສ້າງເສັ້ນທາງລົດໄຟ ໂດຍສະເພາະແມ່ນບັນຫາການລັກຊັບ, ການເກີດອຸປະຕິເຫດ, ການຊື້-ຂາຍຢາເສບຕິດ, ການສໍ້ໂກງແຮງງານ ແລະ ອື່ນໆ ໃນໄລຍະຜ່ານມາມີຄະດີເກີດຂື້ນ 25 ລາຍ ກັກຕົວຜູ້ກະທໍາຜິດ 16 ຄົນ ໃນນີ້ຄະດີລັກຊັບພົນລະເມືອງ ມີ 19 ລາຍ ກັກຜູ້ກະທໍາຜິດໄດ້ 10 ຄົນ ພ້ອມພາຫະນະນໍາໃຊ້ເຂົ້າໃນການລັກຊັບມີລົດຈັກ 3 ຄັນ  ແລະ ເມືອງວັງວຽງ 12 ຄັ້ງ ສ້າງຜົນເສຍຫາຍ ມີຄື: ແກັດໃສ່ເຄືອງກໍ່ສ້າງປະເພດນ໋ອດ ແລະ ເຫຼັກຂໍ້ຕໍ່ຕ່າງໆຈຳນວນ 5 ແກັດ ເຊີ່ງແຕ່ລະແກັດມີນ້ຳໜັກ 933 ກິໂລກຼາມ, ນ໋ອດຈັບລາງລົດໄຟ ຈຳນວນ 436 ຊຸດ, ນ໋ອດຈັບຂ້າງຂວາ 2.804 ຊຸດ, ເຫຼັກຂ້າງຂວາ 3 ອັນ, ເຫຼັກຄ້ຳແບບ 200 ເສັ້ນ ແລະ ລໍ້ແກ່ເຫຼັກ 2 ຄັນ, ເຫຼັກແຜ່ນ 790 ກິໂລ, ເຫຼັກງໍຍາວ 150 ຊັງຕີແມັດ 50 ​ເສັ້ນ, ຄອມພິວເຕີໂນດບຸກ 2 ເຄື່ອງ, ວັດຖຸຄ້າຍຄືຄຳ 14 ​ບາດ, ເງິນກີບທະນາຄານ 40 ກ່ວາລ້ານ ​ກີບ ແລະ ຊັບສີນອື່ນໆອີກຈຳນວນໜື່ງ ໂຄງການກໍ່ສ້າງທາງລົດໄຟທີ່ຜ່ານແຂວງວຽງຈັນ ກວມເອົາມີ​ 4 ເມືອງ ເຊັ່ນ: ເມືອງໂພນໂຮງ, ເມືອງຫີນເຫີບ, ເມືອງວັງວຽງ ແລະ ເມືອງກາສີ ມີຄວາມຍາວ 145,5 ​ກິໂລແມັດ, ມີອຸມົ້ງ 13 ຈຸດ

ໃນຕໍ່ໜ້າ ຄະນະພັກ-ຄະນະບັນຊາຈະສືບຕໍ່ ເອົາໃຈໃສ່ເຮັດວຽກງານສຶກສາອົບຮົມການເມືອງແນວຄິດໃຫ້ພະນັກງານ-ນັກຮົບ ທີ່ປ້ອງກັນຢູ່ແຕ່ລະຈຸດຢ່າງເປັນປົກກະຕິ, ສືບຕໍ່ເປັນເສນາທິການຮອບດ້ານໃຫ້ແກ່ຄະນະກອງເລຂາປ້ອງກັນໂຄງການກໍ່ສ້າງທາງລົດໄຟ, ສືບຕໍ່ລົງປັບປຸງຊັບຊ້ອນພະນັກງານປ້ອງກັນບາງຈຸດທີ່ເຫັນວ່າບໍ່ທັນຮັບປະກັນ, ສືບຕໍ່ເກັບກຳຂໍ້ມູນສະຖິຕິຈຳນວນວິຊາການ ແລະ ກຳມະກອນກໍ່ສ້າງທາງລົດໄຟ, ສືບຕໍ່ແກ້ໄຂປະກົດການຍໍ້ທໍ້ທີ່ເກີດຂຶ້ນຢູ່ພາຍໃນໂຄງການກໍ່ສ້າງທາງລົດໄຟໃຫ້ມີູຄວາມສະຫງົບ, ມີຄວາມເປັນລະບຽບຮຽບຮ້ອຍດີ.

ໂອກາດດຽວກັນນີ້ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ຜູ້ຊີ້ນໍາວຽກງານປ້ອງກັນໂຄງການກໍ່ສ້າງທາງລົດໄຟລາວ-ຈີນ, ໄດ້ໃຫ້ທິດຊີ້ນຳ ແລະ ເນັ້ນໜັກໃຫ້ ບັນດາ​ຄະນະຮັບຜິດຊອບຊີ້ນຳປ້ອງກັນ ໂຄງການກໍ່ສ້າງທາງລົດໄຟ ​ຈົ່ງ​ພ້ອມ​ກັນ​ເພີ່ມ​ທະວີ​ຍົກ​ສູງ​ຄວາມ​ເປັນ​ເຈົ້າ​ການ​ໃນ​ການ​ປ້ອງ​ກັນ​ສະກັດ​ກັ້ນ​ບັນຫາ​ປະກົດ​ການ​ຫຍໍ້​ທໍ້​ໃນ​ສັງຄົມ​ ໃຫ້​ເປັນ​ຂະ​ບວນຢ່າງ​ກວ້າງ​ຂວາງ ​ແລະ ​ເລີກ​ເຊິ​່ງ, ຈົ່ງພ້ອມກັນກຳແໜ້ນສະພາບການຕ່າງໆທີ່ອາດຈະເກີດຂື້ນໃຫ້ທັນເວລາ,​ ສຸມໃສ່ໃນການປ້ອງກັນເວນຍາມຢ່າງເປັນປົກກະຕິ ບໍ່ໃຫ້ມີປະກົດການຫຍໍ້ທໍ້ເກີດຂື້ນໃນລະຫວ່າງຂອບເຂດຄວາມຮັບຜິດຊອບຂອງໂຄງການກໍ່ສ້າງເສັ້ນທາງລົດໄຟ ລາວ-ຈີນ ທີ່ຜ່ານແຂວງວຽງຈັນ ເພື່ອຮັບປະກັນໃຫ້ແຂວງວຽງຈັນມີຄວາມສະຫງົບ ປອດໄພຮ້ອຍສ່ວນຮ້ອຍ.

Off

Comments are closed.