23rd Oct2020

ກະຊວງປ້ອງກັນປະເທດປະດັບຫຼຽນໄຊພິລະອາດຫານໃຫ້ກົມກອງລວມໝູ່ ແລະ ບຸກຄົນທີ່ຜູ້ມີຜົນງານດີເດັ່ນ.

by somchan

ໃນວັນທີ 23 ຕຸລາ ນີ້ ກະຊວງປ້ອງກັນປະເທດ ຈັດພິທີມອບຫຼຽນໄຊພິລະອາດຫານໃຫ້ບັນດາກອງກົມ ແລະ ບຸກຄົນ ຜູ້ທີ່ມີຜົນງານດີເດັ່ນ ໃນການເຂົ້າຮ່ວມແຂ່ງຂັນກິລາທະຫານສາກົນ 2020 ໃນລະຫວ່າງວັນທີ 23 ສິງຫາ ຫາ ວັນທີ 5 ກັນຍາ 2020 ທີ່ສະຫະພັນລັດເຊຍ. ພາຍໃນການເປັນປະທານຂອງທ່ານພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ , ມີຮອງລັດຖະມົນຕີ ຫົວໜ້າກົມໃຫຍ່ ກົມກອງອ້ອມຂ້າງກະຊວງປ້ອງກັນປະເທດ ພ້ອມດ້ວຍພະນັກງານຫຼັກແຫຼ່ງ ນັກກິລາ ແລະ ແຂກຖືກເຊີນ ເຂົ້າຮ່ວມ.

 

ພົຈວ ສີພາ ດວງມາລາ ຫົວໜ້າກົມນະໂຍບາຍ ກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງຂອງລັດຖະມົນຕີ ກະຊວງປ້ອງກັນປະເທດ ວ່າດ້ວຍການມອບຫຼຽນໄຊພິລະອາດຫານ ຊັ້ນ II ແລະ ຊັ້ນ III ໃຫ້ກົມກອງລວມໝູ່ ແລະ ບຸກຄົນ, ມີ 8 ກົມກອງ ມີ 84 ສະຫາຍ.​ ໃນນີ້ ໄດ້ຮັບຫຼຽນໄຊພິລະອາດຫານຊັ້ນ II ມີ 47 ສະຫາຍ ແລະ ໄດ້ຮັບຫຼຽນໄຊພິລະອາດຫານ ຊັ້ນ III ມີ 37 ສະຫາຍ, ເລື່ອນຊັ້ນ 13 ສະຫາຍ. ໃນນີ້ເລື່ອນຊັ້ນນາຍພັນ 3 ສະຫາຍ, ນາຍຮ້ອຍ 10 ສະຫາຍ. ໃຫ້ກຽດປະດັບຫຼຽນໄຊພິລະອາດຫານໃຫ້ກົມກອງລວມໝູ່ ບຸກຄົນ ແລະ ປະດັບຊັ້ນໃນຄັ້ງນີ້ ໂດຍ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ.

ໃນໂອກາດນີ້ທ່ານຍັງໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ຜົນສຳເລັດ ທີ່ຄະນະພັກ ພະນັກງານ-ນັກຮົບ ຍາດໄດ້ໃນບັ້ນຮົບຄັ້ງນີ້ ແລະ ພ້ອມທັງຮຽກຮ້ອງໃຫ້ຄະນະພັກ, ຄະນະບັນຊາແຕ່ລະຂັ້ນ, ຕະຫຼອດຮອດພະນັກງານ-ນັກຮົບທົ່ວກອງທັບ ໂດຍສະເພາະແມ່ນບັນດາລະຮົບ ຈົ່ງເຊີດຊູນ້ຳໃຈເສຍສະຫຼະ, ອົດທົນຜ່ານຜ່າຄວາມຫຍຸ້ງຍາກຕ່າງໆ ປັບປຸງກຳລັງໃຫ້ມີຄວາມໜັກແໜ້ນເຂັ້ມແຂງ, ມີລະບຽບວິໄນເຂັ້ມງວດ, ມີບົດບາດຢືນຢູ່ແຖວໜ້າ ແລະ ເປັນແບບຢ່າງໃນທຸກວຽກງານ ໂດຍສະເພາະແມ່ນດ້ານເຕັກການທະຫານ ໃຫ້ເຂັ້ມແຂງ ແລະ ທັນສະໄໝ ຕັ້ງໜ້ານຳເອົາບົດຮຽນ ໄຫວພິບ ແລະ ປະສົບການ ທີ່ບັນດາສະຫາຍ ໄດ້ຝຶກຝົນຮ່ຳຮຽນ ທັງພາກທິດສະດີ ແລະ ພຶດຕິກຳໃນຄັ້ງນີ້ໄປນຳໃຊ້ໃນການກົມກອງໃຫ້ມີຜົນສຳເລັດສູງສຸດ. ພ້ອມທັງສືບຕໍ່ເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືກັບບັນດາເພື່ອນມິດ ໂດຍສະເພາະ ແມ່ນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມ ລະຫວ່າງສອງຊາດ ສອງກອງທັບ ລາວ-ຣັດເຊຍ ໃຫ້ໜັກແໜ້ນ ແລະ ເພີ່ມທະວີຍິ່ງໆຂຶ້ນ.

Off

Comments are closed.