26th Oct2020

ລັດຖະມົນຕີ ປກສ ຕ້ອນຮັບການເຂົ້າຢ້ຽມຂ່ຳນັບອຳລາ ເອກອັກຄະລັດຖະທູດ ແຫ່ງອົດສະຕາລີ

by somchan

ໃນວັນທີ 26 ຕຸລານີ້ ພົທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫົງບ ໄດ້ຕ້ອນຮັບການເຂົ້າຢ້ຽມຂ່ຳນັບອຳລາ ຂອງທ່ານ ເຈນ ເບີນາດ ຄາລາໂຊ ເອກອັກຄະລັດຖະທູດ ຜູ້ມີອຳນາດເຕັມ ແຫ່ງອົດສະຕາລີ ປະຈຳ ສປປລາວ ໃນໂອກາດທີ່ທ່ານສຳເລັດໜ້າ ໂອກາດນີ້ທ່ານໄດ້ສະແດງຄວາມຂອບໃຈຕໍ່ທ່ານລັດຖະມົນຕີທີ່ໃຫ້ການຕ້ອນຮັບໃນຄັ້ງທີ່ ພ້ອມທັງກ່າວວ່າ:

ໃນໄລຍະດຳລົງຕຳແໜ່ງເປັນເອກອັກຄະລັດຖະທູດອົດສະຕາລີ ປະຈຳສປປລາວ ໄດ້ເຮັດໜ້າທີ່ເສີມຂະຫຍາຍສາຍພົວພັນຮ່ວມມືດ້ານຕ່າງໆລະຫ່ວາງສອງປະເທດ, ກໍຄືສອງກະຊວງປ້ອງກັນຄວາມສະຫົງບແມ່ນມີການພົວພັນເຊີ່ງກັນ ແລະ ກັນ ເປັນສາຍພົວພັນທີ່ແໜ້ນແຟ້ນ ເປັນຕົ້ນແມ່ນວຽກງານກວດຄົນເຂົ້າອອກເມືອງ, ວຽກງານປາບປາມຢາເສບຕິດ, ວຽກງານຕາມຊາຍແດນ ແລະ ອື່ນໆ.

ພ້ອມດຽວກັນນີ້ ພົທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫົງບ ໄດ້ສະແດງຄວາມຕ້ອນຮັບ ແລະ ຕີລາຄາສູງຕໍ່ຜົນງານທີ່ທ່ານເຈນ ເບີນາດ ຄາລາໂຊ ໄດ້ປະຕິບັດຕະຫຼອດໄລຍະຜ່ານມາ ເຊີ່ງເປັນການເສີມຂະຫຍາຍສາຍພົວພັນລາວ-ອົດສະຕາລີ ໃຫ້ມີຄວາມແໜ້ນແຟ້ນຂຶ້ນກ່ວາເກົ່າ ພ້ອມນີ້ທ່ານລັດຖະມົນຕີຍັງໄດ້ສະແດງຄວາມຂອບໃຈຕໍ່ການທູດກໍ່ຄືລັດຖະບານອົດສະຕາລີ ທີ່ໄດ້ຊ່ວຍເຫຼືອດ້ານວຽກງານວິຊາສະເພາະຂອງກຳລັງປ້ອງກັນຄວາມສະຫົງບຕະຫຼອດມາ, ພ້ອມທັງອວຍພອນໃຫ້ທ່ານຈົ່ງປະສົບຜົນສຳເລັດໃນໜ້າທີ່ວຽກງານອັນໃໝ່ຂອງທ່ານ.

ໃນວັນດຽວກັນນີ້ ພົທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫົງບ ຍັງໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ນາງ ທອງ ໂສກຸນເທບຣີ ເອກອັກຄະລັດຖະທູດ ຜູ້ມີອຳນາດເຕັມແຫ່ງຣາຊະອານາຈັກກຳປູເຈຍ ປະຈຳສປປລາວ ຄົນໃໝ່. ໃນໂອກາດນີ້ ທ່ານລັດຖະມົນຕີ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ໄດ້ຕີລາຄາສູງຕໍ່ສາຍພົວພັນລະຫວ່າງສອງປະເທດ ເພື່ອສືບຕໍ່ສາຍພົວພັນຮ່ວມມືລາວ-ກຳປູເຈຍໃຫ້ມີຄວາມແໜ້ນແຟ້້ນຂຶ້ນກ່ວາເກົ່າ ໂດຍສະເພາະແມ່ນການພົວພັນລະຫ່ວາງສອງກະຊວງປ້ອງກັນຄວາມສະຫົງບລາວ ແລະ ກະຊວງພາຍໃນກຳປູເຈຍ ທີ່ໄດ້ມີການຮ່ວມມືກັນສະກັດກັ້ນບັນຫາຕ່າງໆທີ່ກໍ່ຄວາມບໍ່ສະຫົງບລະຫ່ວາງສອງປະເທດ ເປັນຕົ້ນ ບັນຫາຄົນເຂົ້າອອກເມືອງຜິດກົດໝາຍ, ບັນຫາຄ້າມະນຸດ, ບັນຫາຢາເສບຕິດ, ບັນຫາຄວາມບໍສະຫົງບລຽບຕາມຊາຍແດນ ແລະ ອື່ນໆ ເພື່ອເຮັດໃຫ້ສອງປະເທດມີຄວາມສະຫົງບ ຄວາມເປັນລະບຽບຮຽບຮ້ອຍ.

Off

Comments are closed.