03rd Nov2020

ຈັບເປົ້າໝາຍຄ້າຂາຍຢາເສບຕິດ ພ້ອມຢາບ້າ 473.256 ເມັດ ແລະ ຫົວຕອກຢາບ້າ 87 ຫົວ

by somchan

ວັນທີ 22 ຕຸລາ 2020, ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ປກສ ແຂວງອຸດົມໄຊ ໄດ້ສົມທົບອຳນາດການປົກຄອງບ້ານ ແລະ ພາກສ່ວນກ່ຽວຂ້ອງ ເຂົ້າກວດຄົ້ນເຮືອນເປົ້າໝາຍຄ້າຂາຍຢາເສບຕິດ ຢູ່ 3 ຈຸດ ຢູ່ ເຂດບ້ານດອນໄຊ ແລະ ບ້ານພູຂຽວ ເມືອງໄຊ ແຂວງອຸດົມໄຊ. ສາມາດກັກຕົວເປົ້າໝາຍໄດ້ 1 ຄົນ ຊື່ທ້າວ ຈີນູລີ ອາຍຸ 29 ປີ ປະຊາຊົນ ຢູ່ບ້ານດອນໄຊ ພ້ອມຢາເສບຕິດປະເພດບ້າ 473,256 ເມັດ ໜັກ 53,5 ກິໂລກຼາມ ແລະ ຫົວຕອກຢາບ້າ 87 ຫົວ.

ເຈົ້າໜ້າທີ່ຕຳຫຼວດແຂວງອຸດົມໄຊ ໃຫ້ຮູ້ວ່າ:  ຜ່ານການກວດຄົ້ນເຮືອນເປົ້າໝາຍ ຈຸດທີ1 ຢູ່ເຂດບ້ານດອນໄຊ ພົບຢາບ້າ 34.000 ເມັດ ໜັກ 3,8 ກິໂລກຼາມ, ເຮໂຣອິນ 1 ຫໍ່ ໜັກ 153 ກຼາມ, ແປ້ງຝຸ່ນສີຂາວ ແລະ ສີແດງ ໜັກ 2,5 ກິໂລກຼາມ, ເຄື່ອງອັດ ຢາບ້າ 1 ເຄື່ອງ ແລະ ພົບຢາບ້າ 439.000 ເມັດ ໜັກ 49,5 ກິໂລກຼາມ ໃນລົດເກງສີດຳ ໝາຍເລກທະບຽນ ນມ 9000 ກໍາແພງນະຄອນ,  ພ້ອມເຮໂຣອິນ 1 ແທ່ງ ໜັກ 387 ກຼາມ ແລະ ກວດຄົ້ນຈຸດທີ 2 ພົບແປ້ງຝຸ່ນສີຂາວ1 ຖົງ ໜັກ 3,3 ກິໂລກຼາມ, ຈຸດທີ 3. ຢູ່ບ້ານພູຂຽວ ເມືອງໄຊ ໄດ້ກວດກາພົບເຫັນຢາບ້າ 256 ເມັດ ນ້ຳໜັກ 25,7 ກຼາມ, ແປ້ງຝຸ່ນສີຂາວ ໜັກ 210,7 ກຼາມ. ລວມເຄື່ອງຂອງກາງທີ່ກວດກາພົບ ແລະ ຢຶດໄດ້ທັງໝົດ ມີຢາບ້າ 473.256 ເມັດ ໜັກ 53,5 ກິໂລກຼາມ,ເຮໂຣອິນ ໜັກ 540 ກຼາມ,ແປ້ງຝຸ່ນປະສົມໃນການຜະລິດເສບຕິດ ໜັກ 6 ກິໂລກຼາມ, ເຄື່ອງອັດຢາບ້າ 1 ເຄື່ອງ ແລະ ຫົວຕອກຢາບ້າ 87 ຫົວ.

ປັດຈຸບັນຄະດີຢາເສບຕິດດັ່ງກ່າວ, ເຈົ້າໜ້າທີ່ວິຊາສະເພາະ ປກສ ແຂວງອຸດົມໄຊ ກໍາລັງດໍາເນີນການສືບສວນ-ສອບສວນຂະຫຍາຍຜົນຫາຜູ້ຮ່ວມຂະບວນການ ເພື່ອຕິດຕາມກັກຕົວດຳເນີນຄະດີຕາມກົດໝາຍ.

Off

Comments are closed.