09th Nov2020

ຮອງນາຍົກລັດຖະມົນຕີ ລົງຕິດຕາມແກ້ໄຂສະພາບນ້ຳຖ້ວມ ຢູ່ແຂວງສະຫວັນນະເຂດ

by somchan

ໃນລະຫວ່າງວັນທີ 5-6 ພະຈິກ 2020 ນີ້ ຄະນະກຳມະການຄຸ້ມຄອງໄພພິບັດຂັ້ນສູນກາງ, ນຳໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທືນ, ທັງເປັນປະທານຄະນະກຳມະການຄຸ້ມຄອງໄພພິບັດຂັ້ນສູນກາງ ລົງພົບປະຢ້ຽມຢາມປະຊາຊົນ ທີ່ໄດ້ຮັບຜົນກະທົບຈາກໄພພິບັດທາງທຳມະຊາດ ຢູ່ແຂວງສະຫວັນນະເຂດ ພ້ອມທັງມອບເຄື່ອງອຸປະໂພກ-ບໍລິໂພກທີ່ຈຳເປັນ ແລະ ເງີນຈຳນວນໜຶ່ງ ເພື່ອແກ້ໄຂສຸກເສີນເບື້ອງຕົ້ນໃຫ້ຄອບຄົວທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ່ເມືອງຈຳພອນ ແລະ ເມືອງສອງຄອນ ແຂວງສະຫວັນນະເຂດ.ເພື່ອຕິດຕາມສະພາບການຕົວຈິງ, ຮັບຟັງການລາຍງານຜົນເສຍຫາຍ, ຄວາມຕ້ອງການໃນການຊ່ວຍເຫຼືອແກ້ໄຂຟຶ້ນຟູ ແລະ ວຽກງານອື່ນໆ ລວມທັງເປັນການໃຫ້ກຳລັງໃຈປະຊາຊົນ ທີ່ໄດ້ຮັບຜົນກະທົບ ໂດຍການຕ້ອນຮັບຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ.

ແຂວງສະຫວັນນະເຂດ ໄດ້ຮັບຜົນກະທົບຢ່າງໜັກໜ່ວງ ຈາກໄພພິບັດນ້ຳຖ້ວມ ເຊິ່ງເຮັດໃຫ້ 8 ເມືອງ ຄື: ເມືອງພິມ, ເຊໂປນ, ວິລະບູລີ, ນອງ, ຈຳພອນ, ຊົນນະບູລີ, ສອງຄອນ ແລະ ທ່າປາງທອງ ຖືກນ້ຳຖ້ວມໝັກມີ 143 ບ້ານ ເຊິ່ງເຮັດໃຫ້ເຮືອນເປ່ເພທັງໝົດ 120 ຫຼັງ, ເລົ້າເຂົ້າຖືກຖ້ວມເສຍຫາຍ 558 ຫຼັງ ແລະ ມີຜູ້ເສຍຊີວິດ 2 ຄົນ, ໃນນັ້ນໜັກໜ່ວງຫຼາຍທີ່ສຸດ ແມ່ນເມືອງເຊໂປນ ມີທັງໝົດ 51 ບ້ານ.ນອກຈາກນີ້, ຍັງມີເນື້ອທີ່ນາ 23,000 ກວ່າເຮັກຕາຖືກນ້ຳຖ້ວມເສຍຫາຍ, ໜອງປາ 2,700 ໜອງ, ສັດລ້ຽງ 6,000 ກວ່າໂຕ, ຊົນລະປະທານ 53 ໂຄງການ, ເສັ້ນທາງຖືກຜົນກະທົບເສຍຫາຍ 72 ເສັ້ນ, ຂົວ 12 ແຫ່ງ, ສຸກສາລາ 8 ແຫ່ງ, ໂຮງຮຽນຖືກຢຸດການຮຽນ 115 ແຫ່ງ, ວັດ 21 ແຫ່ງ, ຕະຫຼາດ 1 ແຫ່ງ, ເຮືອເສຍຫາຍ 59 ລຳ ແລະ ອື່ນໆ.

ໃນໂອກາດດັ່ງກ່າວນີ້ ທ່ານຮອງລັດຖະມົນຕີຍັງໄດ້ສະແດງຄວາມຍ້ອງຍໍ ຊົມເຊີຍຕໍ່ທຸກພາກສ່ວນໃນສັງຄົມ ທີ່ໄດ້ຮ່ວມແຮງຮ່ວມໃຈສາມັກຄີການຊ່ວຍເຫຼືອບັນດາຄອບຄົວທີ່ໄດ້ຮັບຜົນກະທົບຈາກໄພນ້ຳຖ້ວມໃນຄັ້ງນີ້, ສຳລັບພັກ-ລັດ ກໍ່ຄືຄະນະກຳມະການຄຸ້ມຄອງໄພພິບັດຂັ້ນສູນກາງ ກໍ່ໄດ້ມີຄວາມເປັນຮ່ວມເປັນໄຍ, ຕິດຕາມຂໍ້ມູນຂ່າວສານສະພາບການເປັນປະຈຳ ພ້ອມທັງໄດ້ມີການປຸກລະດົມການປະກອບສ່ວນທຶນຮອນ, ອາຫານ, ນ້ຳດື່ມ, ຢາປົວພະຍາດ ແລະ ເຄື່ອງອຸປະໂພກຕ່າງໆ ເພື່ອນຳມາໃຫ້ການຊ່ວຍເຫຼືອ, ນອກນີ້ຍັງຈະສືບຕໍ່ລະດົມທືນຕື່ມອີກ ເພື່ອນຳໃຊ້ເຂົ້າໃນການຟື້ນຟູສະພາບ ແລະ ຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມໃຫ້ກັບຄືນສູ່ສະພາບປົກກະຕິໂດຍໄວ, ນອກນີ້ທ່ານຮອງນາຍຍົກລັດຖະມົນຕີຍັງໄດ້ຮຽກຮ້ອງໃຫ້ອົງການປົກຄອງຂັ້ນຕ່າງໆ ເອົາໃຈໃສ່ນຳພາເຈົ້າໜ້າທີ່ ແລະ ອົງການຈັດຕັ້ງຕ່າງໆສືບຕໍ່ໃຫ້ການຊ່ວຍເຫຼືອເບິ່ງແຍງປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ພ້ອມທັງເອົາໃຈໃສ່ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ, ເອົາໃຈໃສ່ຕິດຕາມເຝົ້າລະວັງ ແລະ ປ້ອງກັນພະຍາດຫຼັງນ້ຳຖ້ວມ.

Off

Comments are closed.