17th Nov2020

ຮອງ ລມຕ ກະຊວງ ປກສ ຕ້ອນຮັບການເຂົ້າຢ້ຽມຂໍ່ານັບທີ່ປຶກສາທູດປ້ອງກັນຊາດ ສປຈີນ

by somchan

ໃນ ວັນທີ 17 ພະຈິກ 2020 ນີ້. ພົຕ ກົງທອງ ພົງວິຈິດ ຮອງລັດຖະມົນຕີກະຊວງ ປ້ອງກັນຄວາມສະຫົງບ ໄດ້ຕ້ອນຮັບການເຂົ້າຢ້ຽມຂ່ຳນັບ ແລະ ອຳລາໜ້າທີ່ຂອງ ພັອ ເສີນ ຢົງຈິງ ທີ່ປຶກສາທູດປ້ອງກັນຊາດ ສາທາລະນະລັດ ປະຊາຊົນຈີນ ປະຈຳ ສປປລາວ ຄົນເກົ່າ ແລະ ພັອ ຫຼີປິ່ງ ທີ່ປຶກສາທູດປ້ອງກັນຊາດ ສປ ຈີນ ປະຈຳ ສປປລາວ ຄົນໃໝ່.

 

ໂອກາດນີ້ ພົຕ ກົງທອງ ພົງວິຈິດ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງ ພັອ ເສີນ ຢົງຈິງ ທີໄດ້ປະຕິບັດໜ້າທີ່ອັນສຳຄັນຢູ່ ສປປລາວ ໃນໄລຍະຜ່ານມາ ໂດຍໄດ້ປະສານສົມທົບກັບກະຊວງ ປ້ອງກັນປະເທດ ແລະ ກະຊວງປ້ອງກັນຄວາມສະຫົງບ ໃນການເຮັດໜ້າທີ່ ປ້ອງກັນຄວາມສະຫົງບ ເຮັດໃຫ້ສອງປະເທດມີຄວາມສະຫົງບ ເປັນເງື່ອນໄຂໃຫ້ແກ່ປະຊາຊົນສອງຊາດ ໄປມາຫາສູ່ກັນ ແລະ ດຳເນີນທຸລະກິດຮ່ວມກັນໄດ້ຢ່າງປອດໄພ.

 

ພ້ອມດຽວກັນນີ້ ທີ່ປຶກສາທູດປ້ອງກັນຊາດ ສປຈີນ ທັງຜູ້ເກົ່າ ແລະ ຜູ້ໃໝ່ ກໍໄດ້ສະແດງຄວາມຂອບໃຈ ຕໍ່ທ່ານຮອງລັດຖະມົນຕີ ກະຊວງປ້ອງກັນຄວາມສະຫົງບ ທີ່ໃຫ້ການຕ້ອນຮັບໃນຄັ້ງນີ້ ແລະ ພ້ອມທີ່ຈະສືບຕໍ່ສາຍພົວພັນລາວ-ຈີນ ໃນທຸກໆດ້ານ ກໍຄື ກະຊວງປ້ອງກັນປະເທດ, ກະຊວງປ້ອງກັນຄວາມສະຫົງບ ເພື່ອພ້ອມກັນປະຕິບັດໜ້າທີ່ຍຸດທະສາດ ໃນການປົກປັກຮັກສາສອງປະເທດໃຫ້ມີຄວາມສະຫົງບ ແລະ ສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງສີວິໄລ ແລະ ສະຫົງບປອດໄພ ໂດຍພື້ນຖານ.

 

Off

Comments are closed.