26th Nov2020

ພິທີສະເຫຼີມສະຫຼອງວັນສ້າງຕັ້ງວິທະຍາຄານສັນຕິບານປະຊາຊົນຄົບຮອບ 25 ປີ

by somchan

ວິທະຍາຄານສັນຕິບານປະຊາຊົນ,ໄດ້ຈັດຕັ້ງສະເຫລີມສະຫລອງວັນສ້າງຕັ້ງວິທະຍາຄານ ຄົບຮອບ 25ປີ (ວັນທີ 27 ພະຈິກ 1995-27 ພະຈິກ 2020) ໃນວັນທີ 26 ພະຈິກ 2020 ນີ້, ໂດຍການເປັນປະທານຂອງ ພົຈວ ປອ ວັນສົມ ສີສົມບັດ ອຳນວຍການວິທະຍາຄານສັນຕິບານປະຊາຊົນ ເປັນກຽດເຂົ້າຮ່ວມຂອງ ພົຕ ວັນທອງ ກອງມະນີ ເລຂາຄະນະພັກກະຊວງ ຫົວໜ້າກົມໃຫ່ຍການເມືອງປກສ, ມີຄະນະພັກ-ຄະນະອຳນວຍການ, ພະນັກງານຄູ-ອາຈານ ແລະ ນັກສຶກສາເຂົ້າຮ່ວມ.

ພົຈວ ປອ ວັນສົມ ສີສົມບັດ ໄດ້ກ່າວວ່າ ວິທະຍາຄານສັນຕິບານປະຊາຊົນໃນໃນເມື່ອກ່ອນ ມີຊື່ເອີ້ນວ່າ ວິທະຍາຄານປ້ອງກັນຄວາມສະຫງົບແຫ່ງຊາດ ສ້າງຕັ້ງຂື້ນໃນວັນທີ 27 ພະຈິກ 1995, ໄດ້ເປີດຮຽນຮຸ່ນທຳອິດ ໃນວັນທີ່ 13 ທັນວາ1995 (ເຊິ່ງກົງກັບວັນຄ້າຍວັນເກີດ ຂອງທ່ານປະທານໄກສອນ ພົມວິຫານ ຄົບຮອບ 75 ປີ ແລະເນື່ອງໃນໂອກາດສະເຫຼີມສະຫຼອງວັນສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 20 ປີ ) ໂດຍໄດ້ປ່ຽນຊື່ມາເປັນວິທະຍາຄານສັນຕິບານປະຊາຊົນ ໃນປີ 2019 ນັບແຕ່ໄດ້ຮັບການສ້າງຕັ້ງເປັນຕົ້ນມາ ວິທະຍາຄານປ້ອງກັນຄວາມສະຫງົບແຫ່ງຊາດ ກໍ່ຄືວິທະຍາຄານສັນຕິບານປະຊາຊົນໃນປະຈຸບັນ

ກໍໄດ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ; ໂດຍໃນໄລຍະຕົ້ນຂອງການສ້າງຕັ້ງໄດ້ແບ່ງອອກເປັນສອງສາຍວິຊາຮຽນຄື: ສາຍສັນຕິບານ ແລະ ສາຍຫຼວດ, ໃນນັ້ນສາຍສັນຕິບານມີ 2 ຂະແໜງຄື: ຂະແໜງສືບຂ່າວ ແລະ ຂະແໜງສືບສວນ-ສອບສວນຄະດີ, ຍ້ອນຄວາມພະຍາຍາມ-ຄວາມເອົາໃຈໃສ່ຢາງມີຄວາມຮັບຜິດຊອບສູງ ຂອງຄະນະພັກ-ຄະນະອໍານວຍການ ແລະ ພະນັກງານ, ຄູ-ອາຈານ; ໄລຍະຕໍ່ມາຈຶ່ງໄດ້ມີການປັບປຸງ ແລະຂະຫຍາຍຂະແໜງ ວິຊາສະເພາະສາຍສັນຕິບານເພີ່ມຕື່ມເປັນ 6 ຂະແໜງການຄື: ຂະແຫນງພື້ນຖານສັນຕິບານ, ຕ້ານນັກສືບ, ສືບສວນ-ສອບສວນຄະດີລະເມີດຄວາມສະຫງົບຂອງຊາດ, ຕ້ານປະຕິການ, ປ້ອງກັນພາຍໃນ, ຄຸ້ມຄອງລັດກ່ຽວກັບຄວາມສະຫງົບຂອງຊາດ. ສະເພາະສາຍຕໍາຫຼວດໃນເບື້ອງຕົ້ນມີ 3 ຂະແໜງວິຊາຮຽນຄື: ຂະແໜງສຶບຂ່າວອາຍາ, ຂະແໜງສອບສວນຄະດີ ແລະ ຂະແໜງຄຸ້ມຄອງບໍລິຫານ, ມາຮອດປີ 2008-2009 ໄດ້ກໍ່ສ້າງລົງເລິກ 4 ຂະແໜງວິຊາສະເພາະຕື່ມຄື: ຈະລາຈອນ, ຄຸມຂັງ-ດັດສ້າງ, ຕຳຫຼວດເສດຖະກິດ, ຕໍາຫຼວດສະກັດກັ້ນ-ຕ້ານຢາເສບຕິດ ແລະ ຍັງມີບັນດາວິຊາສະເພາະວິທະຍາສາດພື້ນຖານ ຈໍານວນໜື່ງ,

ປີ 2008 ວິທະຍາຄານ ປກສ ແຫ່ງຊາດ ຫຼື ວິທະຍາຄານສັນຕິບານປະຊາຊົນໃນປະຈຸບັນ ໄດ້ຮັບອະນຸຍາດເປີດການສອນ-ການຮຽນ ລະດັບປະລິນຍາໂທນິຕິສາດສາຂາອາຍາວິທະຍາ ແລະ ສືບສວນ-ສອບສວນຄະດີອາຍາ, ຍ້ອນການເຕີບໃຫຍ່ ຂະຫຍາຍຕົວຢ່າງບໍ່ຢຸດຢັ້ງທາງດ້ານການຈັດຕັ້ງ , ບຸກຄະລາກອນ ກໍ່ຄືຖັນແຖວພະນັກງານ-ຄູອາຈານ ແລະ ຄວາມຮຽກຮ້ອງຕ້ອງການເພື່ອກໍ່ສ້າງພັດທະນາກໍາລັງປ້ອງກັນຄວາມສະຫງົບໃຫ້ເຕີບໃຫຍ່ ເຂັ້ມແຂງ, ຕອບສະໜອງໄດ້ຄວາມຮຽກຮ້ອງຕ້ອງການຂອງໜ້າທີ່ການເມືອງ, ມາຮອດປີ 2012 ໄດ້ແຍກສາຍຕໍາຫຼວດ ອອກເປັນວິທະຍາຄານໜຶ່ງຕ່າງຫາກ ຕັ້ງຢູ່ບ້ານດອນຕີ້ວ ເປັນສະຖາບັນການສຶກສາຊັ້ນສູງ ແຫ່ງທີ 2 ຂຶ້ນ ເອີ້ນວ່າ: ວິທະຍາຄານຕໍາຫຼວດປະຊາຊົນ ຕະຫຼອດໄລຍະຜ່ານມາ  ສາມາດພັດທະ ນາ-ກໍ່ສ້າງຖັນແຖວກຳລັງ ປກສ ໄດ້ຫຼາຍຮຸ່ນ, ຫຼາຍລະດັບຄື : ລະບົບກໍ່ສ້າງປະລິນຍາຕີມີທັງໝົດ 25 ຮຸ່ນ, ປະລິນຍາຕີຕໍ່ເນື່ອງ 18 ຮຸ່ນ, ລະບົບປະລິນຍາໂທ 12 ຮຸ້ນ, ລະບົບຊັ້ນສູງເລັ່ງລັດ 6 ເດືອນ ແລະ 8 ເດືອນ 8 ຮຸ່ນ, ບຳລຸງຊັ້ນສູງວິຊາສະເພາະ ປກສ ສໍາລັບເປົ້າຫມາຍພະນັກງານການນຳຂັ້ນເມືອງ, ພະແນກ, ລະບົບ 4 ເດືອນ 3 ຮຸ່ນ, ສືບຕໍ່ສ້າງຊັ້ນກາງວິຊາສະເພາະ ປກສ ແລະຕຳຫຼວດ ຮຸ່ນທີ 18-19 ສໍາເລັດຕາມແຜນການ.

ໂອກາດນີ້  ຜູ້ເຂົ້າຮ່ວມກໍ່ໄດ້ຮັບຊົມການແດງຂອງນັກສຶກສາ ເປັນຕົ້ນ ການຮ້ອງເພງລວມໝູ່ຊາຍ-ຍິງ, ການເດີນສວນສະໜາມຂອງກ້ອນກຳລັງເຫຼົ່າຮົບນັກສຶກສາວິທະຍາຄານສັນຕິບານປະຊາຊົນ, ຮັບຊົມການສະແດງຝຶກແອບມວຍ-ກິລາ ແລະ ລະຄອນສັ້ນ, ຮັບຊົມການສະແດງຂອງໜ່ວຍສີລະປະ – ວັນນະຄະດີ, ພ້ອມທັງຮັບຊົມການສະແດງຈັດຮູບແບບຕົວໜັງສືສັນຍາລັກ ວປສ 25 ປີ.

Off

Comments are closed.