30th Nov2020

ການນຳພັກ-ລັດ ຮ່ວມຊົມການຊ້ອມຮົບສະແດງປະສານຍີງລູກປືນແທ້  ສະຫຼອງວັນຊາດທີ 2 ທັນວາ ຄົບຮອບ 45 ປີ

by somchan

ໃນວັນທີ 30 ພະຈິກ 2020 ທີ່ສະໜາມຫັດແອບວິທະຍາຄານກົມມະດໍາ ກອງທັບປະຊາຊົນ ປະຕິວັດລາວ ໄດ້ຈັດຊ້ອມຮົບສະແດງປະສານຍີງລູກປືນແທ້ສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 45 ປີ ໂດຍມີ ສະຫາຍ ບຸນຍັງ ວໍລະຈິດ ກຳມະການກົມການເມືອງສູນກາງພັກ ເລຂາທິການໃຫຍ່ ຄະນະບໍລິຫານສູກກາງພັກ ປະຊາຊົນ ປະຕິວັດລາວ, ປະທານປະເທດແຫ່ງ ສປປ ລາວ,   ສະຫາຍ ທອງລຸນ ສີສຸລິດ ກຳມະການກົມການເມືອງສູນການພັກ, ນາຍົກລັດຖະມົນຕີ ແຫ່ງ ສປປ ລາວ, ສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນການພັກ, ລັດຖະມົນຕີ ກະຊວງປ້ອງກັນປະເທດ, ມີບັນດາລັດຖະມົນຕີ ພ້ອມດ້ວຍແຂກພາຍໃນ ແລະ ຕ່າງປະເທດເຂົ້າຮ່ວມ.

ສະຫາຍ ພົນຈັດຕະວາ ພັນແສງ ບຸນພັນ ຫົວໜ້າກົມອົບຮົມ ກົມໃຫຍ່ເສນາທິການກອງທັບ ກອງທັບປະຊາຊົນ ປະຕິວັດລາວ ທັງເປັນຄະນະຊີ້ນຳລວມ ການຝຶກຊ້ອມການສະເຫຼີມສະຫຼອງວັນຊາດ ທີ 2 ທັນວາ ໄດ້ລາຍງານໃຫ້ຮູ້ວ່າ: ການສະແດງປະສານຍີງລູກປືນແທ້ໃນຄັ້ງນີ້ ໂດຍແມ່ນໃຊ້ລູກປືນແທ້ໃນການຊ້ອມຍີງຄັ້ງນີ້ກໍ່ເພື່ອສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 45 ປີ ໃຫ້ມີບັນຍາກາດຟົດຟື້ນ, ເປັນການຢັ້ງຢືນຄືນໃນການຮັດແອບຂອງພະນັກງານນັກຮົບ, ຕີລາຄາການບັນຊາສູ້ຮົບຂອງນາຍທະຫານບັນຊາແຕ່ລະຂັ້ນໃຫ້ມີຄວາມຊຳນານ ທັງໃນພາກທິດສະດີ ແລະ ການປະຕິບັດຕົວຈິງ ແລະ ອື່ນໆ

ສຳລັບລາຍການສະແດງຊ້ອມຮົບປະສານຍີງລູກປືນແທ້ ໃນຄັ້ງນີ້ປະກອບມີ 8 ລາຍການຄື: ການຍິງປືນອາກາໃສ່ເປົ້າໝາຍ, ຍີງປືນສັ້ນຍີງຊາຍໃສ່ຈານເຫຼັກໄລຍະ 30 ແມັດ ແລະ 100 ແມັດ, ການສະແດງຂອງກຳລັງສືບຂ່າວສະເພາະກິດສົມທົບກັບກຳລັງທະຫານປ້ອງກັນອາກາດ, ກຳລັງກອງຫຼອນເຮັດໜ້າທີ່ກອບກູ້ຊ່ວຍເຫຼືອຕົວປະກັນ, ການນຳໃຊ້ກຳລັງຕີພິເສດດັບສູນສັດຕູຢູ່ສະຖານທີ່ພັກຊົ່ວຄາວ, ການນຳໃຊ້ກຳລັງທະຫານປ້ອງກັນອາກາດໃຊ້ເຮືອບິນຮົບຍິງເປົ້າໝາຍຈາກເທີງອາກາດລົງສູ້ໜ້າດິນ, ການນຳໃຊ້ລົດຫຸ້ມເກາະຍີງເປົ້າໝາຍເທີງອາກາດ, ການນຳໃຊ້ກຳລັງທະຫານຮາບລົດຫຸ້ມເກາະບຸກໂຈມຕີຖານທີ່ໜັ້ນຂອງສັດຕູ ແລະ ການສະແດງສວນສະໜາມຂອງເຮືອບິນຮົບຈຳນວນ 16 ລຳ.

ໃນໂອກາດນີ້, ສະຫາຍ ບຸນຍັງ ວໍລະຈິດ  ໄດ້ສະແດງຄວາມຍ້ອງຍໍ້ຊົມເຊີຍ ຕໍ່ການສະແດງດັ່ງກ່າວ ຊຶ່ງ ເປັນການປະກອບສ່ວນໃນການສ້າງຂະບວນການ ຂໍ່ານັບຮັບຕ້ອນວັນຊາດທີ 2 ທັນວາ ໃຫ້ມີບັນຍາຟົດຟື້ນ ຮັກສາໄດ້ຄວາມປອດປອດໄພ ເຊິ່ງການສະແດງດັ່ງກ່າວ ໄດ້ສ່ອງແສງໃຫ້ເຫັນເຖິງ ການຕໍ່ສູ້ປົດປ່ອຍອັນພິລະອາດຫານຂອງ ກອງທັບປະຊາຊົນ ປະຕິວັດລາວ ກໍຄືບັນປະຊາຊົນລາວບັນດາເຜົ່າໃນເວລານັ້ນ.

Off

Comments are closed.