01st Dec2020

ການນຳພັກ-ລັດ ວາງພວງມະລາ ເນື່ອງໃນໂອກາດວັນສະຖາປະນາ ສປປ ລາວ ຄົບຮອບ 45 ປີ

by somchan

ຕອນເຊົ້າວັນທີ 1 ທັນວາ 2020 ນີ້ ການນຳພັກ-ລັດ ນຳໂດຍສະຫາຍ ບຸນຍັງ ວໍລະຈິດ ເລຂາທິການໃຫ່ຍ ຄະນະບໍລິຫານງານສູກກາງພັກ, ປະທານປະເທດ ໄດ້ເຂົ້າວາງພວງມະລາ ຢູ່ທີ່ອານຸສາວະລີ ນັກຮົບນິລະນາມ, ສຸສານນັກຮົບປະຕິວັດລາວແຫ່ງຊາດ ຫຼັກ 24 ນະຄອນຫຼວງວຽງຈັນ ເນື່ອງໃນໂອກາດວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 45 ປີ ແລະ ວັນຄ້າຍວັນເກີດຂອງປະທານໄກສອນພົມວິຫານ ຄົບຮອບ 100 ປີ ເພື່ອເປັນການສະແດງຄວາມເຄົ່າລົບຮັກ, ຄວາມກະຕັນຍູັຮູ້ບຸນຄຸນ ເຖິງຄຸນງາມຄວາມດີ ແລະ ນ້ຳໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈຳນົນຂອງບັນທະບູລຸດລາວ ກໍ່ຄືບັນດານັກຮົບ ປະຕິວັດທີ່ເສຍສະຫຼະຊີວິດ ,ເລືອດເນື້ອ ເພື່ອປະເທດຊາດ ແລະ ປະຊາຊົນຢ່າງອົງອາດກ້າຫານ ພາຍໃຕ້ການຊີ້ນຳ-ນຳພາ ຂອງພັກປະຊາຊົນປະຕິວັດລາວ ຈົນໄດ້ຮັບໄຊຊະນະ ແລະ ສະຖາປະນາເປັນສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ເຊີ່ງຄຸນງາມຄວາມດີ ແລະ ຜົນງານອັນໃຫ່ຍຫຼວງດັ່ງກ່າວໄດ້ຖືກຈາລືກໄວ້ ໃນຊີວິດຈິດໃຈຂອງປ່ວງຊົນລາວທັງຊາດຕະຫຼອດໄປ.

ຈາກນັ້ນ, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ພ້ອມດ້ວຍບັນດາການນຳຂັ້ນສູງຂອງ ພັກ-ລັດ ກໍ່ໄດ້ເຂົ້າວາງກະຕ່າດອກໄມ້ ຕໍ່ໜ້າຮູບຫຼໍ່ຂອງປະທານ ໄກສອນ ພົມວິຫານ ຜູ້ນຳທີ່ແສນເຄົ່າລົບຮັກ ຂອງປ່ວງຊົນລາວທັງຊາດ ເພື່ອສະແດງຄວາມກະຕັນຍູ້ຮູ້ບຸນຄຸນ ທີ່ທ່ານໄດ້ສຸມສະຕິປັນຍາເຂົ້າໃນການນຳພາ ຂະບວນການຕໍ່ສູ້ ຕ້ານການຮຸກຮານ ຂອງຈັກກະພັດຕ່າງດ້າວ ຈົນສາມາດຍາດໄດ້ໄຊຊະນະ ພ້ອມທັງ, ນຳເອົາຄວາມຢູ່ເຢັນເປັນສຸກມາສູ່ປະຊາຊົນລາວບັນດາເຜົ່າ ເຊີ່ງຜົນງານແລະ ຄຸນງາມຄວາມດີ ຂອງທ່ານແມ່ນໄດ້ຈາລືກໄວ້ ໃນຄວາມຊົ່ງຈຳຂອງປະຊາຊົນລາວບັນດາເຜົ່າຕະຫຼອດກາລະນານ.

Off

Comments are closed.