11th Dec2020

ຜົນສໍາເລັດຂອງກອງປະຊຸມໃຫຍ່ ຄັ້ງທີ V ອົງຄະນະພັກກະຊວງ ຖວທ

by somchan

ກອງປະຊຸມໃຫຍ່ ຄັ້ງທີ V ອົງຄະນະພັກກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ(ຖວທ) ໄດ້ອັດລົງຢ່າງເປັນທາງການ ດ້ວຍຜົນສໍາເລັດອັນສະຫງ່າງາມ ໃນຕອນບ່າຍວັນທີ 10 ທັນວາ 2020ນີ້, ຢູ່ທີ່ ນະຄອນຫລວງວຽງຈັນ ໂດຍໄດ້ເລືອກຕັ້ງເອົາຄະນະບໍລິຫານງານພັກກະຊວງ ຖວທ ສະໄຫມທີ V ຈໍານວນ 23 ສະຫາຍ ຢ່າງມີປະຊາທິປະໄຕ, ມີຄວາມຮັບຜິດຊອບສູງ ແລະ ຖືກຕ້ອງຕາມຄວາມຮຽກຮ້ອງຕ້ອງການຂອງຫນ້າທີ່ ການເມືອງໃນໄລຍະໃຫມ່ ເພື່ອເປັນຫລັກແຫລ່ງແກ່ນສານ ໃນການນໍາພາ-ຊີ້ນໍາວຽກງານ ຖວທ ຢ່າງຮອບດ້ານ ໃນ ໄລຍະ 5 ປີຕໍ່ຫນ້າ, ຂະນະດຽວກັນ, ກອງປະຊຸມຄັ້ງປະຖົມມະລຶກຂອງຄະນະພັກຊຸດໃຫມ້ ໄດ້ເປັນເອກະສັນເລືອກຕັ້ງ ເອົາ ສະຫາຍ ກິແກ້ວ ໄຂຄໍາພິທູນ ເປັນເລຂາຄະນະບໍລິຫານງານພັກກະຊວງ ຖວທ, ເລືອກເອົາສະຫາຍ ວັນສີກົວມົວ ເປັນຮອງເລຂາ ທັງເປັນປະທານກວດກາ, ສະຫາຍ ນາງ ບົວມະນີ ໄຊທິລາດ ເປັນຮອງ ປະທານກວດກາ ແລະ ຄະນະປະຈໍາ ຈໍານວນ 7 ສະຫາຍ.


ກອງປະຊຸມໃຫຍ່ ຄັ້ງທີ V ອົງຄະນະພັກກະຊວງ ຖວທ ໄດ້ດໍາເນີນເປັນເວລາຫນຶ່ງວັນເຕັມ ພາຍໃຕ້ຄໍາ ຂວັນ “ການນໍາພາເຂັ້ມແຂງ, ການຄຸ້ມຄອງສັກສິດ, ຂ່າວສານທັນສະໄຫມ ວັດທະນະທໍາສີວິໄລ ທ່ອງທ່ຽວຍືນຍົງ” ໂດຍການເປັນປະທານ ຂອງສະຫາຍ ກິແກ້ວ ໄຂຄໍາພິທູນ ເລຂາທິການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ຖວທ. ໃຫ້ກຽດເຂົ້າຮ່ວມກອງປະຊຸມ ໂດຍ ສະຫາຍນາງ ປານີ ຢາທໍ່ຕູ້ ກໍາມະການກົມການເມືອງສູນກາງ ພັກ, ປະທານສະພາແຫ່ງຊາດ, ມີອະດີດຄະນະພັກ-ຄະນະນໍາກະຊວງ ຖວທ, ແຂກທີ່ມີກຽດ, ຜູ້ແທນສົມບູນ 204 ສະຫາຍ, ເພດຍິງ 63 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ ທົ່ວອົງຄະນະກະຊວງ ຖວທ ເຂົ້າຮ່ວມ.

ຕະຫລອດໄລຍະດໍາເນີນກອງປະຊຸມ, ບັນດາຜູ້ແທນ ໄດ້ພ້ອມກັນສຸມສະຕິປັນຍາເຂົ້າໃນການ ຄົ້ນຄວ້າ, ພິຈາລະນາ ແລະ ຮັບຮອງເອົາຮ່າງບົດລາຍງານການເມືອງ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ອົງຄະນະພັກກະຊວງ ຖວທ ຄັ້ງທີ IV ໃນຕະຫລອດໄລຍະ 5 ປີຜ່ານມາ ແລະ ທິດທາງແຜນການ 5 ປີຕໍ່ຫນ້າ; ພິຈາລະນາ ແລະ ຮັບຮອງເອົາຮ່າງບົດສໍາຫລວດການນໍາພາລວມ ຂອງຄະນະບໍລິຫານງານພັກກະຊວງ ຖວທ ຄັ້ງທີ IV ຢ່າງເປັນເອກະສັນ. ພ້ອມດຽວກັນ ຜູ້ແທນກອງປະຊຸມ ຍັງໄດ້ໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງ ເອົາຄະນະບໍລິຫານງານພັກກະຊວງ ຖວທ ສະໄຫມທີ V ຢ່າງມີປະຊາທິປະໄຕ, ມີຄວາມຮັບຜິດຊອບສູງ ແລະ ຖືກຕ້ອງຕາມຄວາມຮຽກຮ້ອງຕ້ອງການຂອງຫນ້າທີ່ການເມືອງໃນໄລຍະໃຫມ່ ເພື່ອເປັນຫລັກແຫລ່ງແກນສານ ໃນການນໍາພາ-ຊີ້ນໍາວຽກງານ ຖວທ ຢ່າງຮອບດ້ານ ໃນໄລຍະ 5 ປີຕໍ່ຫນ້າ, ພ້ອມນີ້ ກອງປະຊຸມຍັງໄດ້ເລືອກເອົາຜູ້ແທນ ສົມບູນ ແລະ ສໍາຮອງ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ XI ຂອງພັກ ທີ່ຈະໄຂຂຶ້ນໃນປີຕໍ່ຫນ້ານີ້, ພ້ອມທັງໄດ້ມີ ມີການຮັບຮອງເອົາມະຕິຂອງກອງປະຊຸມໃຫຍ່ຄັ້ງນີ້ ຢ່າງເປັນເອກະສັນ.

ໂອກາດສໍາຄັນນີ້, ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງ ຊາດ ໂດຍຕາງຫນ້າໃຫ້ກົມການເມືອງສູນກາງພັກ ໄດ້ສະແດງຄວາມຊົມເຊີຍຕໍ່ຜົນສໍາເລັດ ແລະ ຫມາກຜົນ ຂອງ ອົງຄະນະພັກກະຊວງ ຖວທ ທີ່ຍາດມາໄດ້ໃນ 5 ປີຜ່ານມາ, ພ້ອມທັງສະແດງຄວາມຊົມເຊີຍມາຍັງຄະນະບໍລິຫານ ງານຊຸດໃຫມ່ ທີ່ໄດ້ຮັບການເລືອກຕັ້ງໃນຄັ້ງນີ້ ຊຶ່ງສະແດງເຖິງຄວາມເຊື່ອຫມັ້ນ ແລະ ຄວາມໄວ້ວາງໃຈຂອງຜູ້ແທນ ກອງປະຊຸມ ແລະ ເປັນການມອບຫມາຍຫນ້າທີ່ວຽກງານທີ່ສໍາຄັນ ແລະ ມີກຽດ ເພື່ອສືບຕໍ່ນໍາພາ-ຊີ້ນໍາໃນການຈັດຕັ້ງ ປະຕິບັດວຽກງານຖະແຫຼງຂ່າວ-ວັດທະນະທໍາ ແລະ ທ່ອງທ່ຽວໃນຕໍ່ຫນ້າ

 

Off

Comments are closed.