17th Dec2020

ແຂວງອັດຕະປື ຈັດພິທີອະໄພຍະໂທດ-ຜ່ອນໂທດ ແລະ ປ່ອຍຕົວນັກໂທດ ປະຈຳປີ 2020

by somchan

ວັນທີ 16 ທັນວາ 2020 ນີ້ ແຂວງອັດຕະປື ໄດ້ຈັດພິທີປະກາດອະໄພຍະໂທດ-ຜ່ອນໂທດ ແລະ ປ່ອຍຕົວນັກໂທດ ປະຈຳປີ 2020 ຢູ່ທີ່ຄ້າຍຄຸມຂັງ – ດັດສ້າງ ກອງບັນຊາການ ປກສ ແຂວງອັດຕະປື ໂດຍການເຂົ້າຮ່ວມ ຂອງ ທ່ານ ສົມພົງ ສີຊານົນ ຫົວໜ້າອົງການໄອຍະການປະຊາຊົນແຂວງ ທັງເປັນຮອງປະທານ ຄະນະກຳມະການອະໄພຍະໂທດຂັ້ນແຂວງ, ແລະ ພັອ ບັນດິດ ສີວິໄລ ຮອງກອງບັນຊາການ ປກສ ແຂວງ, ມີພະນັກງານຈາກອົງການໄອຍະການປະຊາຊົນ ແຂວງ, ສານປະຊາຊົນແຂວງ, ພະແນກພົວພັນຕ່າງປະເທດ ຄ້າຍຄຸມຂັງ – ດັດສ້າງ ເຂົ້າຮ່ວມ.

ພັທ ກິຕັນ ຟອງສຸວັນ ຫົວໜ້າຄ້າຍຄຸມຂັງ*ດັດສ້າງ ປກສ ແຂວງ  ໄດ້ລາຍງານ ກ່ຽວກັບການເຄື່ອນໄຫວຈັດຕັ້ງປະຕິບັດນະໂຍບາຍ ຂອງວຽກງານອະໄພຍະໂທດ ຫຼຸດຜ່ອນໂທດ ແລະ ປ່ອຍຕົວນັກໂທດ ປະຈຳປີ 2020 ເຊິ່ງທ່ານໄດ້ລາຍງານສະພາບຂອງນັກໂທດ, ຕ້ອງຫາ ແລະ ຜູ້ຖືກດັດສ້າງ ເປັນຕົ້ນ: ສະພາບການຄຸ້ມຄອງ ນັກໂທດ, ຕ້ອງຫາ ແລະ ຜູ້ຖືກດັດສ້າງ  ຢູ່ທີ່ຄ້າຍຄຸມຂັງ – ດັດສ້າງ ປກສ ແຂວງ. ຈາກນັ້ນ,  ພັອ ບັນດິດ ສີວິໄລ ຮອງຫົວໜ້າກອງບັນຊາການ ປກສ ແຂວງ ກໍ່ໄດ້ຜ່ານລັດຖະດຳລັດ ຂອງປະທານປະເທດ ສາທາລະນະລັດ ປະຊາທິປະໄຕ ປະຊາຊົນລາວ ວ່າດ້ວຍການອະໄພຍະໂທດ ແກ່ນັກໂທດທີ່ມີຄວາມກ້າວໜ້າໃນຂອບເຂດທົ່ວປະເທດ ເນື່ອງໃນໂອກາດວັນຊາດ ທີ 2 ທັນວາ ຄົບຮອບ 45 ປີ ເຊິ່ງໃນນັ້ນ, ມີນັກໂທດຂອງຄ້າຍຄຸມຂັງ – ດັດສ້າງ ປກສ ແຂວງອັດຕະປື ທີ່ມີເງື່ອນໄຂໃຫ້ອະໄພຍະໂທດ ຫຼຸດຜ່ອນໂທດ ຈຳນວນ 36 ຄົນ, ຍິງ 5 ຄົນ, ຄົນຕ່າງປະເທດ 1 ຄົນ ແລະ ມີນັກໂທດທີ່ມີເງື່ອນໄຂໃຫ້ອະໄພຍະໂທດ ປ່ອຍຕົວ ຈຳນວນ 11 ຄົນ, ຍິງ 2 ຄົນ.

Off

Comments are closed.