20th Dec2020

ເປີດນໍາໃຊ້ທາງດ່ວນນະຄອນຫຼວງວຽງຈັນ-ວັງວຽງ ໄລຍະທີ I ເປັນທາງການ

by somchan

ພິທີເປີດນໍາໃຊ້ທາງດ່ວນນະຄອນຫຼວງວຽງຈັນ-ວັງວຽງ ໄລຍະທີ I ຂອງທາງດ່ວນນະຄອນຫຼວງວຽງຈັນຫາດ່ານຊາຍແດນບໍ່ເຕັນ-ບໍ່ຫານ ຈັດຂຶ້ນຢ່າງເປັນທາງການວັນທີ 20 ທັນວາ 2020 ຢູ່ສະຖານີເກັບເງິນ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານ ບຸນຍັງ ວໍລະຈິດ ປະທານປະເທດ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ທ່ານ ຈຽງ ຈາຍຕົງ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປ ຈີນ ປະຈໍາລາວ ພ້ອມດ້ວຍລັດຖະມົນຕີ ພາກສ່ວນກ່ຽວຂ້ອງ ນອກນີ້ຍັງມີທ່ານ ຢວນ ເຊີງ ຝ່າ ເລຂາພັກແຂວງຢຸນນານ ສປ ຈີນພ້ອມຄະນະ ກໍໄດ້ເຂົ້າຮ່ວມໃນຮູບແບບທາງໄກ.

ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ ລາຍງານໃຫ້ຮູ້ວ່າ:ເສັ້ນທາງດ່ວນນະຄອນຫຼວງວຽງຈັນ-ວັງວຽງມີຈຸດເລີ່ມຕົ້ນຢູ່ສາມແຍກສີເກີດ ແລະ ຈຸດສຸດທ້າຍຢູ່ເມືອງວັງວຽງ ມີຄວາມຍາວທັງໝົດ 109,11 ກິໂລແມັດ ກວ້າງ 23 ແມັດ 4 ຊ່ອງທາງລົດແລ່ນ 3,5 ແມັດ 2 ຊ່ອງທາງລົດແລ່ນຊຸກເສີນ 3 ແມັດ ແລະ ດອນກາງກວ້າງ 3 ແມັດ ຕັດຜ່ານ 4 ເມືອງຄື: ເມືອງນາຊາຍທອງ, ໂພນໂຮງ, ຫີນເຫີບ ແລະ ເມືອງວັງວຽງ ການອອກແບບຕາມມາດຕະຖານເຕັກນິກທາງດ່ວນຂອງ ສປ ຈີນ ແລະ ມາດຕະຖານເຕັກນິກຂອງອາຊຽນເປັນພື້ນຖານ  ມີອຸໂມງ 1 ແຫ່ງ ຂົວ 45 ແຫ່ງ ຍາວທັງໝົດ 2.408 ແມັດ ຄວາມໄວອອກແບບ 80 ຫາ 100 ກິໂລແມັດຕໍ່ຊົ່ວໂມງ ທາງເສັ້ນນີ້ປະກອບມີ ຈຸດເຊື່ອມຕໍ່ທັງໝົດ 7 ແຫ່ງ ຈຸດເກັບເງິນ 8 ແຫ່ງຄື: ນະຄອນຫຼວງວຽງຈັນ ບ້ານນາຊອນ ບ້ານບົວ ສະກ້າ, ໂພນໂຮງ, ຫີນເຫີບ, ທ່າເຮືອ ແລະ ວັງວຽງ ມີຈຸດບໍລິການ 3 ຈຸດ  ນະຄອນຫຼວງວຽງຈັນ ກິໂລແມັດທີ 2+745 ເມືອງໂພນໂຮງ ກິໂລແມັດທີ 53+940 ແລະ ເມືອງວັງວຽງ ກິໂລແມັດທີ 109+540  ຈຸດພັກລົດມີ 2 ຈຸດ ບ້ານນາຂ່າ ເມືອງໂພງໂຮງ ກິໂລແມັດທີ 22+760 ແລະ ບ້ານທ່າເຮືອ (ອ່າງງື່ມ) ເມືອງຫີນເຫີບ ກິໂລແມັດທີ 90+540 ສູນຄວບຄຸມ 2 ບ່ອນ ຄື: ສູນຄວບຄຸມເສັ້ນທາງ ແລະ ສູນຄວບຄຸມອຸໂມງ ແລະ ສູນສ້ອມແປງ 2 ບ່ອນ (ນະຄອນຫຼວງວຽງຈັນ ແລະ ວັງວຽງ) ສໍາລັບລາຄາ ລົດປະເພດ 1 ໜ້ອຍກວ່າ ຫຼື ເທົ່າກັບ 7 ບ່ອນນັ່ງ ລາຄາ 600 ກີບຕໍ່ກິໂລແມັດ ປະເພດ 2 ຂະໜາດ 8 ຫາ 19 ບ່ອນນັ່ງ 1000 ກີບຕໍ່ກິໂລແມັດ ລົດປະເພດ 3 ຂະໜາດ 20 ຫາ 39 ບ່ອນນັ່ງ 1.400 ກີບຕໍ່ຊົ່ວໂມງ ແລະ ປະເພດ 4 ຫຼາຍກວ່າ ຫຼື ເທົ່າກັບ 40 ບ່ອນນັ່ງ 2.000 ກີບຕໍ່ກິໂລແມັດ, ສຳລັບມູນຄ່າການກໍ່ສ້າງເສັ້ນທາງດ່ວນ ນະຄອນຫຼວງວຽງຈັນ-ວັງວຽງ ທັງໝົດ ປະມານ 1,3 ຕື້ໂດລາ.

ໃນພິທີທ່ານ ສອນໄຊ ສີພັນດອນ ມີຄໍາເຫັນວ່າ:ໂຄງການທາງດ່ວນ ນະຄອນຫຼວງວຽງຈັນ ຫາບໍ່ເຕັນ ແມ່ນໜຶ່ງໃນໂຄງການພັດທະນາພື້ນຖານໂຄງລ່າງບູລິມະສິດຂອງ ສປປ ລາວ ທີ່ມີລັກສະນະຍຸດທະສາດ ເປັນໂຄງການສັນຍາລັກແຫ່ງການຮ່ວມມືພາຍໃຕ້ຂໍ້ລິເລີ່ມໜຶ່ງເສັ້ນທາງໜຶ່ງແລວທາງຂອງທ່ານ ສີ ຈິ້ນ ຜິງ ແລະ ຍຸດທະສາດການຫັນປ່ຽນປະເທດທີ່ບໍ່ມີຊາຍແດນຕິດກັບທະເລເປັນປະເທດເຊື່ອມຈອດຂອງ ສປປ ລາວ ເປັນຂີດໝາຍໃໝ່ແຫ່ງມູນເຊື້ອໄມຕີຈິດມິດຕະພາບ ການເປັນຄູ່ຮ່ວມມືຍຸດທະສາດຮອບດ້ານ ໝັ້ນຄົງ ຍາວນານຕາມທິດ 4 ດີ  ແລະ ບົນຈິດໃຈຄູ່ຮ່ວມສະຕາກໍາລະຫວ່າງລາວ-ຈີນ, ຈີນ-ລາວ ເຊິ່ງເສັ້ນທາງດ່ວນໄລຍະທີ 1 ນີ້ເປັນເສັ້ນທາງທີ່ມີທິວທັດສວຍງາມ ມີທ່າແຮງທາງດ້ານການທ່ອງທ່ຽວ ທາງດ່ວນໄລຍະນີ້ຈະອໍານວຍຄວາມສະດວກສະບາຍໃຫ້ແກ່ການຄົມມະນາຄົມຂົນສົ່ງ ເສັ້ນທາງເລືອກໃຫ້ແກ່ປະຊາຊົນ ແລະ ພາກທຸລະກິດລວມໄປເຖິງນັກທ່ອງທ່ຽວທັງພາຍໃນ ແລະ ຕ່າງປະເທດ ເດີນທາງສະດວກສະບາຍ ແລະ ວ່ອງໄວ ປະກອບສ່ວນສໍາຄັນໃນການສົ່ງເສີມການທ່ອງທ່ຽວ ການຄ້າ ການລົງທຶນ ກະຕຸ້ນໃຫ້ແກ່ການຂະຫຍາຍຕົວເສດຖະກິດຂອງນະຄອນຫຼວງວຽງຈັນ ແລະ ແຂວງວຽງຈັນກໍຄື ສປປ ລາວ ນອກນີ້ລັດຖະບານຍັງໄດ້ເປີດກ້ວາງ ແລະ ສົ່ງເສີມໃຫ້ບໍລິສັດທັງພາຍໃນ ແລະ ຕ່າງປະເທດທີ່ມີທຶນຮອນ ມີຄວາມສາມາດ ມາສຶກສາສໍາຫຼວດຄວາມເປັນໄປໄດ້ ແລະ ລົງທຶນກໍ່ສ້າງທາງດ່ວນໃນຮູບແບບ BOT ນັບມື້ນັບຫຼາຍຂຶ້ນ.

ພາຍຫຼັງທີ່ເປີດນໍາໃຊ້ຢ່າງເປັນທາງການແລ້ວກໍ່ໄດ້ເປີດໃຫ້ປະຊາຊົນນໍາໃຊ້ທາງດ່ວນໂດຍບໍ່ເສຍຄ່າເປັນເວລາ 3 ວັນ ນັບແຕ່ວັນທີ 21-23 ທັນວານີ້.

Off

Comments are closed.