22nd Dec2020

ນະຄອນຫລວງວຽງຈັນ ລົງຕິດຕາມຊຸກຍູ້ການຈັດຕັ້ງ ແລະ ການເຄື່ອນໄຫວວຽກງານຕ້ານການຄ້າມະນຸດ

by somchan

ຄະນະກຳມະການຕ້ານການຄ້າມະນຸດ ນະຄອນຫລວງວຽງຈັນ ລົງຕິດຕາມຊຸກຍູ້ການຈັດຕັ້ງແລະ ການເຄື່ອນໄຫວວຽກງານຕ້ານການຄ້າມະນຸດຂອງຄະນະກຳມະການຕ້ານການຄ້າມະນຸດເມືອງຫາດຊາຍ ໃນວັນທີ 22 ທັນວາ 2020ນີ້ ໂດຍການເປັນປະທານຂອງ ພັອ ສຸກພະຈັນ ບຸດດາຄຳ ຫົວຫນ້າກອງນັນຊາການ ປກສ ນະຄອນຫລວງວຽງຈັນ ຮອງປະທານຄະນະກຳມະການຕ້ານການຄ້າມະນຸດ ນະຄອນຫລວງວຽງຈັນ ມີ ທ່ານຄຳແກ່ງ ດວງພະຈັນ ປະທານຄະນະກຳມະການຕ້ານການຄ້າມະນຸດ ເມືອງຫາດຊາຍຟອງ,ມີບັນດາຄະນະກຳມະການ-ອານຸກຳມະການຕ້ານການຄ້າມະນຸດເມືອງຫາດຊາຍຟອງ,ປກສເມືອງ ປກສ ກຸ່ມອຳນາດການປົກຄອງບ້ານ60ບ້ານເຂົ້າຮ່ວມ.

ພັທ ແສງທອງ ເກື້ອບຸນລ່ຳ ຫົວຫນ້າກອງບັນຊາການ ປກສ ເມືອງຫາດຊາຍຟອງໄດ້ກ່າວໃນກອງປະຊຸມວ່າ: ບັນຫາການຄ້າມະນຸດ ເປັນອາດຍາກໍາຂ້າມຊາດ, ເປັນການລະເມີດສິດທິພື້ນຖານຂອງຄວາມເປັນ ມະນຸດ ຂັ້ນຮ້າຍແຮງ ສົ່ງຜົນກະທົບໂດຍກົງທາງດ້ານຮ່າງກາຍ ແລະ ຈິດໃຈ ຂອງຜູ້ຖືກເຄາະຮ້າຍ, ຕໍ່ຄອບຄົວ, ສັງຄົມ ແລະ ການພັດທະນາສ້າງສາປະເທດຊາດ, ສະເພາະເມືອງ ຫາດຊາຍຟອງ ໄດ້ມີ ຄວາມພະຍາຍາມເອົາໃຈໃສ່ຊີ້ນໍາໃນການເຄື່ອນໄຫວວຽກງານດັ່ງກ່າວມາຕະຫຼອດ, ອັນທີ່ພົ້ນເດັ່ນແມ່ນການແກ້ໄຂ ບັນຫາການ ຄ້າ-ຂາຍປະເວນີ ການຫມັ້ນຫມາຍແອບແຝງ, ການແຕ່ງດອງແອບແຝງ, ການໃຫ້ຖືພາ, ການເອົາເດັກໄປເປັນລູກລ້ຽງ ,ການເປີດບໍລິສັດຈັດຫາຄູ່, ການຕວົະຍວົະຫຼອກລວງໄປອອກແຮງງານຢູ່ຕ່າງປະເທດ ການບັງຄັບໃຫ້ເປັນໂສເພນີ ແລະ ອື່ນໆ.

ໃນ 1 ປີ ຜ່ານມາໄດ້ຕິດຕາມກວດກາ ຮ້ານກິນດື່ມ 9 ຮ້ານ,ຮ້ານບັນເທີງ 20 ຮ້ານ,ຮ້ານເສີມຄວາມງາມ 49 ຮ້ານ,ເຮືອນພັກ 16 ຫລັງ, ໂຮງແຮມ 5 ຫລັງ ມີຄະດີຄ້າມະນຸດເກີດຂື້ນ 1 ເລື່ອງ ຕໍ່ກັບຜູ້ຖືກເຄາະຮ້າຍທາງພະແນກແຮງານແລະສະຫວັດດີການສັງຄົມສົບທົບກັບສູນການສະຫະພັນແມ່ຍີງລາວໄດ້ໃຫ້ການຊ່ວຍເຫລືອແລະບຳບັດ ໃຫ້ຄຳປຶກສາທາງດ້ານກົດຫມາຍ, ຝຶກວິຊາຊີບແລະນຳກັບຄືນສູ່ຄອບຄົວ ຕາມພາລະບົດບາດ

ໃນຕໍ່ຫນ້າຈະສືບຕໍ່ ເຜີຍແຜ່ໂຄສະນາລະບຽບກົດຫມາຍ ສະຫນອງຂໍ້ມູນຂ່າວສານວຽກງານຕ້ານການຄ້າມະນຸດໃຫ້ປະຊາຊົນພາຍໃນບ້ານໃຫ້ຮັບຮູ້ຢ່າງທົ່ວເຖີງ ສືບຕໍ່ຕິດຕາມຊຸກຍູ້ການຈັດຕັ້ງປະຕິບັດວຽກງານຕ້ານແລະສະກັດກັ້ນການຄ້າມະນຸດ ພ້ອມທັງສະຫລຸບຖອດຖອນບົດຮຽນເປັນແຕ່ລະໄລຍະ,ຂື້ນບັນຊີເປົ້າຫມາຍຄ້າມະນຸດ ພ້ອມທັງສຶກສາອົບຮົມຕໍ່ຜູ້ທີ່ເປັນເປົ້າຫມາຍຄ້າ-ຂາຍຕາມ ຈຸດຫລໍ່ແຫລມຕ່າງໆ ໃຫ້ຍຸດເຊົາ ແນ່ໃສ່ເຮັດໃຫ້ພາຍໃນເມືອງມີຄວາມສະຫງົບແລະເປັນລະບຽບຮຽບຮ້ອຍດີ.

Off

Comments are closed.