30th Dec2020

ປກສ ແຂວງອຸດົມໄຊ ສະຫຼຸບວຽກງານປ້ອງກັນຄວາມສະຫງົບ ປະຈໍາປີ 2020

by somchan

ວັນທີ 25 ທັນວາ 2020, ກອງບັນຊາການ ປກສ ແຂວງອຸດົມໄຊ ໄດ້ຈັດກອງປະຊຸມສະຫຼຸບວຽກງານປ້ອງກັນຄວາມສະຫງົບ ປະຈໍາປີ 2020 ຂຶ້ນທີ່ສະໂມສອນຂອງ ກອງບັນຊາການ ປກສ ແຂວງ ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ພ້ອ ສີວອນ ໄຊຍະວົງ ຄະນະປະຈໍາພັກແຂວງ ເລຂາຄະນະພັກ ຫົວຫນ້າກອງບັນຊາການ ປກສ ແຂວງ, ມີ ຄະນະພັກ-ຄະນະ ກອງບັນຊາການ, ຄະນະຫ້ອງ, ກອງພັນ, ຄ້າຍຄຸມຂັງ-ດັດສ້າງ, ກອງບັນຊາການ ປກສ 7 ເມືອງ ແລະ ໄພະນັກງານຫຼັກແຫຼ່ງ ເຂົ້າຮ່ວມຢ່າງພ້ອມພຽງ.

ໃນກອງປະຊຸມ, ທ່ານ ພັທ ກອງແກ້ວ ຫັດສະຈັນ ຄະນະພັກ ຮອງຫົວຫນ້າກອງບັນຊາການ ປກສ ແຂວງ ໄດ້ຜ່ານຮ່າງບົດສະຫຼຸບການເຄື່ອນໄຫວວຽກງານປ້ອງກັນຄວາມສະຫງົບ ປະຈໍາປີ 2020 ຄະນະພັກ-ຄະນະບັນຊາກອງບັນຊາການ ປກສແຂວງໄດ້ສຸມໃສ່ຊີ້ນຳນຳພານັກນັກງານ-ນັກຮົບປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ ເຊິ່ງສະແດງອອກໃນປີຜ່ານມາສາມາດຂຶ້ນບັນຊີກໍານົດເປົ້າຫມາຍອາຍາ-ເສດຖະກິດ 3 ປະເພດ ລວມທັງຫມົດ 802 ຄົນ, ຍິງ 13 ຄົນ. ປີຜ່ານມາມີຄະດີທັງຫມົດ 555 ລາຍ, ຜູ້ຖືກຫາ 764 ຄົນ, ຍິງ 44 ຄົນ, ແກ້ໄຂສໍາເລັດ 434 ລາຍ, ຜູ້ຖືກຫາ 237 ຄົນ, ຍິງ 12 ຄົນ,  (ທຽບໃສ່ປີ 2019 ຫຼຸດລົງ 282 ລາຍ) ຄະດີທີ່ເກີດຂຶ້ນຫຼາຍກວ່າໝູ່ ແມ່ນບັນຫາຢາເສບຕິດ 150 ລາຍ, ຜູ້ຖືກຫາ 184 ຄົນ, ຍິງ 15 ຄົນ, ທໍາລາຍການລັກລອບປູກຝິ່ນ 52 ຈຸດ, ມີ  12.852 ເຮັກຕາ, ຍຶດຂອງກາງປະເພດເຮໂລອິນ ນໍ້າຫນັກ 152,57 ກະໂລກຣາມ, ເຄື່ອງຜະລິດຢາບ້າ 03 ເຄື່ອງ, ອາວຸດເສິກ 8 ກະບອກພ້ອມລູກກະສູນ 127 ລູກ, ລົດໃຫຍ່ 08 ຄັນ, ລົດຈັກ55 ຄັນ, ໂທລະສັບມືຖື 105 ເຄືອງ, ເງິນກີບ 170 ລ້ານກວ່າກີບ, ເງີນບາດ 134.250 ບາດ, ເງີນໂດລາ 800 ໂດລາ, ໂລຫະຄ້າຍຄືຄຳ 411,9 ກຣາມ, ຄະດີລັກຊັບພົນລະເມືອງ ມີຜົນເສຍຫາຍ ລົດໃຫຍ່ 01 ຄັນ, ລົດຈັກ 68 ຄັນ, ຄໍາ 11 ບາດ, ເຫຼັກ-ທອງໂຄງການກໍ່ສ້າງເສັ້ນທາງລົດໄຟ ລາວ-ຈີນ ຈໍານວນ 02 ໂຕນກວ່າ ແລະ ວັດຖຸມີຄ່າອື່ນໆ ອີກຈໍານວນຫນຶ່ງ ລວມຄ່າເສຍຫາຍທັງຫມົດ 04 ຕື້ກວ່າກີບ ໃນນີ້ສາມາດເກັບກູ້ຄືນມອບໃຫ້ເຈົ້າຂອງເດີມ ມີ ລົດໃຫຍ່ 01 ຄັນ, ລົດຈັກ 28 ຄັນ, ຄໍາ 3,3 ບາດ, ໄດ້ເຄື່ອນໄຫວໂຄສະນາກົດລະບຽບ ຈະລາຈອນ ຢູ່ບັນດາສໍານັກງານ-ອົງການ, ຫົວຫນ່ວຍທຸລະກິດ, ໂຮງຮຽນ, ເຂດ ຊຸມຊົນ, ກຸ່ມບ້ານ ໄດ້ 12 ຄັ້ງ, ມີຜູ້ເຂົ້າຮ່ວມ 2.122 ຄົນ, ມີຄະດີອຸປະຕິເຫດເກີດຂຶ້ນທັງຫມົດ: 243 ລາຍ (ທຽບໃສ່ ປີ 2010 ຫຼຸດລົງ 168 ລາຍ) ພາຫະນະເປ່ເພ 662 ຄັນ, ຄົນໄດ້ຮັບບາດເຈັບ 652 ຄົນ, ເສຍຊີວິດ 30 ຄົນ, ຍິງ 12 ຄົນ, ລວມມູນຄ່າເສຍຫາຍ 2 ຕື້ 800 ລ້ານກວ່າກີບ, ອັກຄີໄພເກີດຂຶ້ນທັງຫມົດ: 14 ລາຍ (ທຽບໃສ່ປີຜ່ານມາຫຼຸດລົງ 6 ລາຍ) ສາເຫດ ສ່ວນໃຫຍ່ແມ່ນໄຟຟ້າລັດວົງຈອນ, ເຮັດໃຫ້ຄົນເສຍຊີວິດ 6 ຄົນ, ລວມ ມູນຄ່າເສຍຫາຍຫນຶ່ງຕື້ກວ່າກີບ, ໂຄສະນາເຜີຍແຜ່ກົດຫມາຍ ແລະ ຜົນຮ້າຍຂອງຢາເສບຕິດ ຢູ່ບັນດາເມືອງ, ໂຮງຮຽນ ມີ 118 ບ້ານ ໃນທົ່ວແຂວງ ໄດ້ 9 ຄັ້ງ, ມີຜູ້ເຂົ້າຮ່ວມ ຮັບຟັງ 9.482 ຄົນ, ປັບປຸງ ແລະ ຂຶ້ນທະບຽນສໍາມະໂນຄົວ ໄດ້ 472 ບ້ານ 70.000 ກວ່າຄອບຄົວ, ມີ 330.000 ກວ່າຄົນ(ສາມແສນສາມໝື່ນກວ່າຄົນ), ຍິງ 168.119 ຄົນ, ບໍ່ໄດ້ຂຶ້ນທະບຽນສໍາມະໂນຄົວ 89 ຄອບຄົວ, ມີ 803 ຄົນ, ຍິງ 338 ຄົນ, ຍົກຍ້າຍມາ 160 ຄອບຄົວ ມີ 679 ຄົນ, ຍິງ 325 ຄົນ ແລະ ຍົກຍ້າຍໄປ 32 ຄອບຄົວ ມີ 242 126 ຄົນ, ພົນລະເມືອງລາວແຕ່ງງານກັບຄົນຕ່າງປະເທດຖືກຕ້ອງຕາມລະບຽບກົດຫມາຍ ມີ 112 ຄົນ(ຍີງ), ບໍ່ ຖືກຕ້ອງ 77 ຄົນ(ຍິງ) ແລະ ມີ ພົນລະເມືອງແຂວງອຸດົມໄຊ ໄປອອກແຮງງານຢູ່ຕ່າງປະເທດ ຈໍານວນ 44.578 ຄົນ ແລະ ວຽກງານວິຊາສະເພາະອື່ນໆອີກ.

ພ້ອມນັ້ນ, ໃນກອງປະຊຸມ ຍັງໄດ້ປະຕິບັດນະໂຍບາຍມອບໃບຍ້ອງຍໍ ແລະ ເລື່ອນຊັ້ນ ໃຫ້ນາຍ ແລະ ພົນຕໍາຫຼວດ ຜູ້ທີ່ມີຜົນງານດີເດັ່ນ ແລະ ຄົບມາດຖານເງື່ອນໄຂເລື່ອນຊັ້ນ ໂດຍໄດ້ ເລື່ອນຊັ້ນຂັ້ນນາຍພັນ 45 ສະຫາຍ, ຂັ້ນນາຍຮ້ອຍ 72 ສະຫາຍ, ຂັ້ນນາຍສິບ 4 ສະຫາຍ, ເລື່ອນຊັ້ນ ຊັ້ນll ຂື້ນ ຊັ້ນ I ຈໍານວນ 1 ສະຫາຍ ແລະ ມອບໃບຍ້ອງຍໍຂອງທ່ານເຈົ້າແຂວງເນື່ອງໃນໂອກາດປ້ອງກັນກອງປະຊຸມໃຫຍ່ຄັ້ງທີ IX ຂອງອົງຄະນະ ພັກແຂວງ ຈໍານວນ 203 ສະຫາຍ, ຈາກນັ້ນ ທ່ານ ພັອ ສີວອນ ໄຊຍະວົງ ແລະ ທ່ານ ພັອ ຄ່າແຮ ກັນທະນີ ໄດ້ໃຫ້ກຽດຂຶ້ນປະດັບຊັ້ນ ແລະ ມອບໃບຍ້ອງຍໍໃຫ້ບັນດາສະຫາຍ ນາຍ ແລະ ພົນຕໍາຫຼວດ ຢ່າງສົມກຽດ.

ຕອນທ້າຍຂອງກອງປະຊຸມ ທ່ານ ພ້ອ ສີວອນ ໄຊຍະວົງ ກໍໄດ້ໂອ້ລົມຕໍ່ກອງປະຊຸມ ເຊິ່ງທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດ ໃນການຈັດຕັ້ງປະຕິບັດວຽກງານປ້ອງກັນຄວາມສະຫງົບ ຂອງກອງບັນຊາການ ປກສ ແຂວງ ແລະ ຍັງໄດ້ເນັ້ນຫນັກຫຼາຍບັນຫາ ເປັນຕົ້ນແມ່ນ ໃຫ້ຄະນະພັກ-ຄະນະບັນຊາ ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດ ໃຫ້ແກ່ພະນັກງານ-ນັກຮົບ ໃນກໍາລັງໃຫ້ມີຄວາມອຸ່ນອ່ຽງທຸ່ນທ່ຽງ, ເຊື່ອຫມັ້ນຕໍ່ແນວທາງຂອງພັກ, ສູ້ຊົນເຮັດສໍາເລັດຫນ້າທີ່ວຽກງານການຈັດຕັ້ງຂັ້ນເທິງມອບຫມາຍໃຫ້, ເອົາໃຈໃສ່ເຮັດວຽກງານວິຊາສະເພາະ ໂດຍແນໃສ່ແກ້ໄຂປະກົດການຫຍໍ້ທໍ້ຕ່າງໆໃນສັງຄົມ ເຊັ່ນ: ບັນຫາຢາເສບຕິດ, ບັນຫາອຸບັຕຕິເຫດ, ບັນຫາລັກຊັບ-ຊິງຊັບພົນລະເມືອງ ແລະ ບັນຫາອື່ນໆ. ທັງນີ້, ກໍເພື່ອເຮັດໃຫ້ທົ່ວສັງຄົມ ເວົ້າລວມ, ເວົ້າສະເພາະ ກໍ່ແມ່ນ ແຂວງອຸດົມໄຊ ໃຫ້ມີຄວາມສະຫງົບ ແລະ ຄວາມເປັນລະບຽບຮຽບຮ້ອຍເປັນກ້າວໆ.

 

Off

Comments are closed.