04th Jan2021

ການເຕີບໃຫ່ຍ ຂະຫຍາຍຕົວ ແລະ ຜົນງານໄຊຊະນະ ຂອງກຳລັງ ປກສ ປ້ອງກັນທີ່ຕັ້ງ ຕະຫຼອດໄລຍະ 27 ປີຜ່ານມາ

by somchan

ພົຈວ ໄຊສີ ແກ້ວສະຫງ່າ ຄະນະພັກກະຊວງ ຫົວໜ້າກອງບັນຊາການ ປ້ອງກັນທີ່ຕັ້ງ ກະຊວງປ້ອງກັນຄວາມສະຫງົບ ໄດ້ຍົກໃຫ້ເຫັນຕົ້ນກຳເນີດ, ການເຕີບໃຫ່ຍ ຂະຫຍາຍຕົວ ແລະ ຜົນງານໄຊຊະນະ ຂອງກຳລັງປ້ອງກັນຄວາມສະຫງົບ ປ້ອງກັນທີ່ຕັ້ງ ຕະຫຼອດໄລຍະຜ່ານມາ ຕໍ່ສື່ມວນຊົນປ້ອງກັນຄວາມສະຫງົບ

ໃນໂອກາດວັນສ້າງຕັ້ງ ກຳລັງປ້ອງກັນທີ່ຕັ້ງ ວັນທີ 10 ມັງກອນ ຄົບຮອບ 27 ປີ ທີ່ຈະມາເຖີງນີ້ ໂດຍທ່ານໄດ້ກ່າວວ່າ: ກຳລັງປ້ອງກັນທີ່ຕັ້ງ ມີປະຫວັດການເຕີບໃຫ່ຍຂະຫຍາຍຕົວ ມາຈາກກອງພັນ 15 ກອງທັບປົດປ່ອຍປະຊາຊົນລາວ ທີ່ຕິດພັນກັບຂະບວນການຕໍ່ສູ້ ຕ້ານຈັກກະພັດຜູ້ຮຸກຮານ ທັງເກົ່າແລະໃໝ່ ເຮັດໜ້າທີ່ຂົນຂວາຍຮາກຖານປະຊາຊົນ ພ້ອມທັງປະກອບສ່ວນຢ່າງຕັ້ງໜ້າ ເຂົ້າໃນການປົກປັກຮັກສາ ໝາກຜົນຂອງການປະຕິວັດ ກ່ອນປີ 1971 ກອງພັນ 15 ກອງທັບປົດປ່ອຍປະຊາຊົນລາວ ເຮັດໜ້າທີ່ປະຈຳຢູ່ສະໜາມຮົບນາດູ ນາແສ ປາກຊອງ ແລະ ສະໜາມຮົບອື່ນໆ ຢູ່ແຂວງ ຄຳມ່ວນ ບຸກຕີແນວຫຼັງຂອງສັດຕູ ໄດ້ຮັບໄຊຊະນະທຸກບັ້ນຮົບ ແລະ ສາມາດຍິງຍົນ ຂອງພວກສັດຕູຕົກຫຼາຍລຳ ປີ 1971-1972 ດ້ວຍຄວາມຮຽກຮ້ອງຕ້ອງການທາງດ້ານການເມືອງ ສູນກາງພັກແນວລາວຮັກຊາດ ກອງບັນຊາການທະຫານສູງສຸດ  ກອງທັບປົດປ່ອຍປະຊາຊົນລາວ ໃນເມື່ອກ່ອນ ໄດ້ມີຄຳສັ່ງຍົກຍ້າຍກອງພັນ 15 ຢູ່ແຂວງ ຄຳມ່ວນ ຂື້ນໄປເຕົ້າໂຮມຢູ່ເມືອງຊຳເໜືອ ແຂວງ ຫົວພັນ ມາຮອດວັນທີ 21 ກຸມພາ ປີ 1973 ສູນກາງພັກໄດ້ຕົກລົງ ເອົາກຳລັງເຂົ້າປະສົມຮັບຮູ້ສອງຕົວເມືອງ ເປັນກາງຄື ຫຼວງພະບາງ ແລະ ວຽງຈັນ ເພື່ອປົກປັກຮັກສາລັດຖະບານປະສົມຊົ່ວຄາວ ຄະນະມົນຕີປະສົມການເມືອງແຫ່ງຊາດ ໄດ້ຕົກລົງເອົາກຳລັງດັ່ງກ່າວ ເຂົ້າປະສົມກັບຕຳຫຼວດຝ່າຍວຽງຈັນ ເພື່ອປົກປັກຮັກສາຜູ້ນຳການປະຕິວັດ ໃນເວລານັ້ນກອງພັນ 15 ກໍ່ແມ່ນກອງພັນໜື່ງທີເປັນເປົ້າໝາຍ ທຳລາຍຂອງສັດຕູ ຈາກສະພາບການດັ່ງກ່າວ ຂັ້ນເທີ່ງຈືງຕົກລົງປ່ຽນຊື່ ກອງພັນ 15 ກອງທັບປົດປ່ອຍປະຊາຊົນລາວ  ມາເປັນກອງພັນຕຳຫຼວດ 206 ເຂົ້າມາປະສົມຢູ່ນະຄອນຫຼວງວຽງຈັນ ເຮັດໜ້າທີປ້ອງກັນສຳນັກງານ-ອົງການຈັດຕັ້ງ ຕາງໜ້າແນວລາວຮັກຊາດ ແລະ ປ້ອງກັນເຮືອນພັກ ຂອງບັນດາທ່ານຜູ້ນຳປະຕິວັດ.

ພາຍຫຼັງປະເທດຊາດໄດ້ຮັບການປົດປ່ອຍ ແລະ ສະຖາປະນາ ເປັນສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ ປີ 1975 ເປັນຕົ້ນມາ ກົມກອງດັ່ງກ່າວ ໄດ້ມີການປັບປຸງ ມາຮອດປີ 1994 ເພື່ອຕອບສະໜອງຕາມຄວາມຮຽກຮ້ອງຕ້ອງການ ຂອງໜ້າທີ່ການເມືອງໄລຍະໃໝ່ ນາຍົກລັດຖະມົນຕີ ຈື່ງໄດ້ອອກດຳລັດ ເລກທີ 03 ສ້າງຕັ້ງກອງບັນຊາການຕຳຫຼວດປະກອບອາວຸດຂື້ນ ຢ່າງເປັນທາງການ ແລະ ມາຮອດວັນທີ 21 ພຶດສະພາ 2002 ກອງບັນຊາການຕຳຫຼວດປະກອບອາວຸດໄດ້ປ່ຽນຊື່ມາເປັນກອງບັນຊາການປ້ອງກັນທີ່ຕັ້ງ ທີ່ຂື້ນກັບກະຊວງ ປກສ ໃນປະຈຸບັນ.

Off

Comments are closed.