12th Jan2021

ກົມໃຫຍ່ການເມືອງ ປກສ ສະຫລຸບວຽກງານປະຈຳປີ 2020 ແລະ ວາງທິດທາງແຜນການ ປີ 2021

by somchan

ກອງປະຊຸມສະຫລຸບວຽກງານປະຈຳປີ 2020 ແລະວາງທິດທາງແຜນການ ປີ 2021 ຂອງກົມໃຫຍ່ການເມືອງປ້ອງກັນຄວາມສະຫງົບ ໄດ້ຈັດ ໃນວັນທີ 12 ມັງກອນ 2021 ນີ້ ໂດຍການເປັນປະທານຂອງ ພຈົວ ປອ ສຸວັນນີ ສີສຸພາບມີໄຊ ຮອງຫົວຫນ້າກົມໃຫຍ່ການເມືອງ ປກສ ມີບັນດາ ຄະນະພັກ ຄະນະກົມ.ພະນັກງານຫລັກແຫລ່ງກົມ ກອງອ້ອມຂ້າງກົມໃຫຍ່ການເມືອງ.ແລະແຂກຖືກເຊີນເຂົ້າຮ່ວມ.

ໃນກອງປະຊຸມ ພຈົວ ປອ ສຸວັນນີ ສີສຸພາບມີໄຊໄດ້ກ່າວຕໍ່ກອງປະຊຸມວ່າ  ກອງປະຊຸມເທື່ອນີ້ ໄດ້ຮັບຟັງການປະກອບຄໍາເຫັນຂອງບັນດາສະຫາຍ ຄະນະພັກ ຄະນະບັນຊາ ກົມກອງອ້ອມຂ້າງກົມໃຫຍ່ການເມືອງ ປກສ ຕໍ່ກັບການເສີມຂະຫຍາຍດ້ານດີ ອັນທີ່ເປັນ ຜົນງານ ແລະ ຄົ້ນຄວ້າແກ້ໄຂດ້ານອ່ອນຂໍ້ຄົງຄ້າງ ທີ່ສະແດງອອກໃນບົດສະຫຼຸບວຽກງານ ປະຈຳປີ 2020 ແລະ ກຳນົດແຜນວຽກຈຸດສຸມໃນປີ 2021 ໃນການຄົ້ນຄວ້າເນື້ອໃນກອງປະຊຸມເທື່ອນີ້ ; ຈິດໃຈແມ່ນໃຫ້ມີຄວາມເປັນເອກກະພາບໃນການຕີລາຄາສະພາບການຈັດຕັ້ງຊີ້ນຳ-ນຳພາ ແລະ ການບັນຊາ, ມີຄວາມຮັບຜິດຊອບໃນການເບິ່ງ ບັນຫາໃຫ້ຖຶກກັບຄວາມເປັນຈີງ, ຍົກໃຫ້ເຫັນອັນທີ່ເຮັດໄດ້, ອັນທີ່ເປັນບົດຮຽນ ແລະ ສິ່ງຫຍໍ້ທໍ້ຄົງຄ້າງຕ່າງໆ ກໍ່ຄືການແກ້ໄຂບັນຫາຕົວຈີງ ໃຫ້ຖຶກຕ້ອງທັນສະພາບການ ແລະ ຮັບປະກັນໃຫ້ການກຳນົດແຜນວຽກຈຸດສຸມໃນຕໍ່ໜ້າ ແທດເໝາະກັບສະພາບແວດລ້ອມຕົວຈີງ ຂອງກຳລັງ ປກສ.

ຈາກນັ້ນ ພັອ ພອນເພັງ ຫລ້າບັນດິດ ຫົວຫນ້າຫ້ອງການ ກົມໃຫຍ່ການເມືອງ ປກສ ໄດ້ຜ່ານບົດສະຫລຸບຕີລາຄາວຽກງານໃນໄລຍະ 1 ປີຜ່ານມາ ຄະນະພັກຄະນະນຳກົມໃຫຍ່ ໄດ້ເອົາໃຈໃສ່ຊີນຳ-ນຳພາຄະນະພັກແຕ່ລະຂັ້ນເອົາໃຈໃສ່ຂຶ້ນແຜນພະນັກງານສືບທອດ-ປ່ຽນແທນຂັ້ນສູນກາງຄຸ້ມຄອງສຳເລັດ, ເລືອກເຟັ້ນຮັບ ກຳລັງໃໝ່ໄດ້ຫັນເຂົ້າສູ່ລະບຽບຫຼັກການ ແລະ ຄັດເລືອກໄດ້ຜູ້ທີ່ດີ , ມີມາດຖານເງື່ອນໄຂຄົບຖ້ວນ; ໄດ້ບັນຈຸຊັບຊ້ອນ , ພະນັກງານເຂົ້າໃສ່ຕຳແໜ່ງງານ, ຄົ້ນຄວ້າປັບປຸງກົງຈັກການຈັດຕັ້ງບາງຫົວໜ່ວຍ ຢູ່ ບັນດາກົມກອງ ທ້ອງຖິ່ນ ຈຳນວນ 3.735 ຕຳແໜ່ງ, ຍິງ 398 ຕຳແໜ່ງ, ໃນນັ້ນໄດ້ປະກາດດໍາລັດ ວ່າດ້ວຍການແຕ່ງຕັ້ງຮອງລັດຖະມົນຕີກະຊວງ ປກສ , ແຕ່ງຕັ້ງຫົວໜ້າ, ຮອງຫົວໜ້າຂອງບັນດາກົມໃຫຍ່, ຫ້ອງ ວ່າການ, ກົມກອງອ້ອມຂ້າງກະຊວງ ແລະ ບັນດາ ປກສ ແຂວງ ຈັດຕັ້ງພິທີປະກາດການເລື່ອນຊັ້ນ, ປະດັບຊັ້ນ, ດັດແປງຊັ້ນໃຫ້ນາຍ ແລະ ພົນຕຳຫຼວດ ທົ່ວກາໍລັງປ້ອງກັນຄວາມສະຫງົບ ຈາໍນວນ 10.142 ຄົນ, ຍິງ 1.726 ຄົນ; ຄົ້ນຄວ້າຮັບກຳລັງໃໝ່ປະຈຳປີ 2020 ຈາໍນວນ 2.000 ຄົນ ຄົ້ນຄວ້າປັບປຸງກົງຈັກການຈັດຕັ້ງບາງຫົວໜ່ວຍ ຢູ່ບັນດາກົມກອງ ທ້ອງຖິ່ນ ຈຳນວນ 3.735 ຕຳແໜ່ງ, ຍິງ 398 ຕຳແໜ່ງ, ວຽກງານສື່ມວນຊົນໄດ້ຮັບການປັບປຸງໃຫ້ດີຂຶ້ນກວ່າເກົ່າ ເຊິ່ງໄດ້ເປັນກະບອກສຽງຂອງກໍາລັງໃນການ ເຜີຍແຜ່ແນວທາງນະໂຍບາຍຂອງພັກ, ກົດໝາຍຂອງລັດ, ຜົນງານການປະຕິບັດໜ້າທີ່ວຽກງານວິຊາສະເພາະຂອງກຳລັງ ປ້ອງກັນຄວາມສະຫງົບ ຕັ້ງໜ້າເຜີຍແຜ່ການປ້ອງກັນ, ສະກັດກັ້ນ ແລະ ຄວບຄຸມການ ແຜ່ລະບາດຂອງພະຍາດປອດອັກເສບຈາກເຊື້ອຈຸລະໂລກສາຍພັນໃໝ່ (COVID-19); ເປັນເຈົ້າການຕອບຕ້ານຖ້ອຍທໍານອງບິດເບືອນຂອງພວກຄົນບໍ່ດີ ແລະ ສື່ສັງຄົມອອນລາຍທີ່ໃສ່ຮ້າຍປ້າຍສີ ພັກ-ລັດຖະບານ ແລະ ເຈົ້າ ໜ້າທີ່ທຸກພາກສ່ວນ, ປີຜ່ານມາສາມາດຜະລິດລາຍການອອກອາກາດໄດ້ 17.492 ຄັ້ງ, ແຈກຢາຍໜັງສືພີມ ປກສ ໄດ້ 750.000 ສະບັບ, ວາລະສານ 21.000 ຫົວ; ລົງເຄື່ອນໄຫວເກັບກໍາຂໍ້ມູນຂ່າວສານຢູ່ ບັນດາກົມກອງ ທ້ອງຖິ່ນ ແລະ ຂຽນເປັນຂ່າວໄດ້ 2.799 ຂ່າວ, ເປັນບົດ 1.579 ບົດ, ຮັບຂ່າວຈາກບັນດາກົມກອງ-ທ້ອງຖີ່ນ ຈໍາ ນວນ 2.375 ສະບັບ. ຊຸກຍູ້ອົງການຈັດຕັ້ງມະຫາຊົນເຄື່ອນໄຫວຕາມພາລະບົດບາດຂອງຕົນຢ່າງຕັ້ງໜ້າເປັນຕົ້ນ ຈັດຕັ້ງສະຫຼຸບ ແລະ ມອບໃບຢັ້ງຢືນການປະຕິບັດຄໍາຂວັນ, ຂໍ້ແຂ່ງຂັນ 04 ບຸກຂອງຊາວໜຸ່ມ, 03 ດີຂອງແມ່ຍິງ ແລະ 05 ເປັນເຈົ້າຂອງກຳມະບານ; ຕິດພັນກັບການສ້າງຂະບວນການແຂ່ງຂັນເຮັດສໍາເລັດໜ້າທີ່ວິຊາສະເພາະ, ອອກແຮງງານ , ອະນາໄມລວມໝູ່, ແຂ່ງຂັນກິລາ, ບໍລິຈາກເລືອດຊ່ວຍເຫຼືອສັງຄົມ ແລະ ຂະບວນການອື່ນໆຢ່າງ ເປັນຂະບວນຟົດຟື້ນ. ວຽກງານປະກັນສັງຄົມ: ໄດ້ປະກອບບຸກຄະລາ ກອນໃສ່ແຕ່ລະພະແນກ ; ພົວພັນປະສານສົມທົບກັບກອງທັບ, ກະຊວງແຮງງານ ແລະ ສະຫວັດດີການສັງຄົມ ເພື່ອ ແລກປ່ຽນບົດຮຽນກ່ຽວກັບວຽກງານປະກັນສັງຄົມຂອງກາໍລັງປ້ອງກັນຄວາມສະຫງົບ; ປັບປຸງສັບຊ້ອນຫ້ອງການ, ບ່ອນເຮັດວຽກ ແລະ ສົມທົບກັບກົມນະໂຍບາຍຈັດຕັ້ງພິທີມອບ-ຮັບວຽກງານປະກັນສັງຄົມ.

ທິດທາງແຜນການໃນຕໍ່ຫນ້າ ຈະສືບຕໍ່ຈັດຕັ້ງປະຕິບັດບັນດາແຜນການ ແຜນງານທີ່ກຳນົດໄວ້ໃຫ້ເປັນຮູບປະທຳ ແລະ ສຳເລັດຕາມກຳນົດຄາດຫມາຍ ປັບປຸງວຽກງານວິຊາສະເພາະໃຫ້ມີຄວາມຫນັກແຫນ້ນຮັດກຸມ ເພື່ອສືບຕໍ່ປະຕິບັດຫນ້າທີ່ໃຫ້ສຳເລັດຕາມການມອບຫມາຍ.

 

 

Off

Comments are closed.