13th Jan2021

ຮອງຫົວໜ້າກົມໃຫຍ່ການເມືອງ ປກສ  ລົງຕິດຕາມກວດກາ ແລະ ຊີ້ນໍາວຽກງານປ້ອງກັນ ກອງປະຊຸມໃຫຍ່ ຄັ້ງທີ 11 ຂອງພັກ ຢູ່ດ່ານບ້ານໃໝ່ ແລະ ດ່ານບ້ານຈຳປາ

by somchan

ໃນວັນທີ 11 ມັງກອນ 2021 ພຈົວ ຄໍາສາຍ ຈັນທະວົງ ຮອງຫົວໜ້າກົມໃຫຍ່ການເມືອງ ປກສ ພ້ອມດວຍຄະນະ ໄດ້ລົງຕິດຕາມກວດກາ ແລະ ຊີ້ນໍາວຽກງານປ້ອງກັນ  ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນປະຕິວັດລາວ ຢູ່ດ່ານບ້ານໃໝ່ ແລະ ດ່ານບ້ານຈຳປາ ເມືອງສີໂຄດຕະບອງ ນະຄອນຫຼວງວຽງຈັນ ເພື່ອຮັບປະກັນໃຫ້ການດໍາເນີນກອງປະຊຸມມີຄວາມສະຫງົບ, ເປັນລະບຽບຮຽບຮ້ອຍ ແລະ ປອດໄພຮອບດ້ານ.

ສໍາລັບການລົງຕິດຕາມກວດກາ ແລະ ຊີ້ນໍາວຽກງານປ້ອງກັນຄັ້ງນີ້  ພຈົວ ຄໍາສາຍ ຈັນທະວົງ ໄດ້ຮັບຟັງລາຍງານຈາກບັນດາຄະນະຮັບຜິດຊອບປະຈຳແຕ່ລະດ່ານຕໍ່ກັບການປະຕິບັດໜ້າທີ່ວຽກງານວິຊາສະເພາະເປັນຕົ້ນແມ່ນ ກ່ຽວກັບຄວາມພ້ອມຢ່າງຮອບດ້ານໃນການປ້ອງກັນ,  ພ້ອມທັງລາຍງານເຖິງຂໍ້ສະດວກ ແລະ ຂໍ້ຫຍຸ້ງຍາກ ເພື່ອລາຍງານໃຫ້ຂັ້ນເທິງມີທິດຊີ້ນໍາເພີ່ມຕື່ມ.

ໂອກາດດັ່ງກ່າວ  ພຈົວ ຄໍາສາຍ ຈັນທະວົງ ໄດ້ສະແດງຄວາມຍ້ອງຍໍຊົມເຊີຍ ຕໍ່ກັບການກຽມພ້ອມປ້ອງກັນກອງປະຊຸມໃນທຸກດ້ານ ຂອງກໍາລັງປ້ອງກັນ ພ້ອມທັງເນັ້ນໜັກໃຫທຸກສະຫາຍ ຈົ່ງເປັນເຈົ້າການເພີ່ມທະວີຄວາມຮັບຜິດຊອບ ແລະ ສຸມໃສ່ປະຕິບັດໜ້າທີ່ວຽກງານຂອງຕົນຢ່າງຕັ້ງໜ້າ, ເຂັ້ມງວດໃນການຕິດຕາມກວດກາ ແລະສະກັດກັ້ນທຸກປະກົດການຫຍໍ້ທໍ້ທີ່ອາດຈະເກີດຂື້ນ, ທັງນີ້ກໍ່ເພື່ອຮັບປະກັນໃຫ້ການດໍາເນີນກອງປະຊຸມໃນຄັ້ງນີ້ ດໍາເນີນໄປດ້ວຍຜົນສໍາເລັດຢ່າງຈົບງາມ.

ນອກຈາກນີ້, ກໍ່ໄດ້ມີປະຊາຊົນ ແລະ ບັນດາພາກສ່ວນຕ່າງໆ ນໍາເອົາເຄື່ອງບໍລິໂພກ ເປັນຕົ້ນ ນໍ້າດື່ມ, ໝີ່ ແລະ ອື່ນໆ ມາປະກອບສ່ວນໃຫ້ແກ່ກຳລັງປະຈຳຢູ່ຈຸດປ້ອງກັນດັ່ງກ່າວຕື່ມອີກ.

Off

Comments are closed.