15th Jan2021

ຜົນສຳເລັດກອງ​ປະ​ຊຸມ​​ໃຫຍ່​ຜູ້​ແທນ​ທົ່ວປະ​ເທດຄັ້ງທີ 11 ຂອງ​ພັກປະຊາຊົນປະຕິວັດລາວ

by somchan

ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນປະຕິວັດລາວໄດ້ປິດລົງດ້ວຍຜົນສຳເລັດຢ່າງຈົບງາມ,  ສະຫາຍ ສຈ ປອ ກິ​ແກ້ວ ​ໄຂ​ຄຳ​ພິທູນ ​ກົມ​ການ​ເມືອງ, ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ 11 ໄດ້ຖະແຫຼ່ງກ່ຽວກັບຜົນສຳເລັດຂອງກອງປະຊຸມ ໃນວັນທີ 15 ມັງກອນ 2021 ນີ້ ວ່າ: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນປະຕິວັດລາວ​ແມ່ນດຳເນີນເປັນເວລາ 3 ວັນ, ​ເຊິ່ງ​ໄດ້​ໄຂ​ຂື້ນ​ຢ່າງ​ເປັນ​ທາງ​ການ​ໃນ​ວັນ​ທີ 13 ​ແລະ ປິດ​ລົງຢ່າງສະຫງ່າງາມ​ໃນ​ວັນ​ທີ 15 ມັງກອນ 2021.

ກອງປະຊຸມຄັ້ງນີ້ແມ່ນພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກສະໄໝທີ 10, ມີກຳມະການກົມການເມືອງ, ຄະນະເລຂາທິການ, ກຳມະການສູນກາງພັກ ສະໄໝທີ 10, ມີນັກປະຕິວັດອາວຸໂສ, ວິລະຊົນແຫ່ງຊາດ ພ້ອມດ້ວຍບັນດາຄະນະຜູ້ແທນສົມບູນຈຳນວນ 768 ສະຫາຍ, ຍິງ 116 ສະຫາຍທີ່ໄດ້ຖືກຄັດເລືອກໃຫ້ຕາງໜ້າອົງຄະນະພັກຂະແໜງ ການ, ອົງການ ແລະ ທ້ອງຖິ່ນໃນຂອບເຂດທົ່ວປະເທດ ແລະ ແຂກຖືກເຊີນຈຳນວນ 147 ສະຫາຍ ທີ່ຕາງໜ້າໃຫ້ແກ່ພາກສ່ວນຕ່າງໆທັງພາກລັດ ແລະ ເອກະຊົນ ກໍ່ຄືປະຊາຊົນລາວບັນດາເຜົ່າເຂົ້າຮ່ວມ.

​ກອງປະຊຸມດຳ​ເນີນ​ໄປ​ດ້ວຍ​ບັນຍາກາດ​ແຫ່ງ​ຄວາມ​ປິ​ຕິ​ຊົມ​ຊືນ​ຂອງທົ່ວ​ພັກ, ທົ່ວ​ລັດ, ທົ່ວ​ກຳລັງ​ປະກອບ​ອາວຸດ ​ແລະ ຂອງ​ປວງ​ຊົນ​ລາວ​ບັນດາ​ເຜົ່າທັງຊາດ, ​ເຕັມ​ໄປ​ດ້ວຍ​ຄວາມ​ໝາຍ​ຄວາມ​ສຳຄັນ​ແຫ່ງ​ການຈັດຕັ້ງປະຕິບັດ​ແນວ​ທາງ​ນະ​ໂຍບາຍ​ຂອງ​ພັກ​ເຂົ້າ​ສູ່​ລວງ​ເລິກ, ປະ​ເທດ​ຊາດ​ມີ​ຄວາມ​ໝັ້ນຄົງ, ຮັບປະກັນ​ສະຖຽນ​ລະ​ພາບ​ທາງ​ດ້ານ​ການ​ເມືອງ, ສັງຄົມ​ມີ​ຄວາມ​ສະຫງົບ, ​ເປັນ​ລະບຽບ​ຮຽບຮ້ອຍ, ປະຊາຊົນ​ມີ​ຊີວິດ​ການ​ເປັນ​ຢູ່​ທີ​ດີ​ຂື້ນ. ກອງ​ປະຊຸມ​ໄດ້​ຮັບ​ຟັງ ​​ແລະ ຮັບຮອງ​ເອົາຮ່າງ​ລາຍ​ງານ​ການ​ເມືອງ​ຂອງຄະນະບໍລິຫານງານສູນກາງພັກສະໄໝທີ 10 ​ແລະ ຮ່າງ​ແຜນ​ພັດທະນາ​ເສ​ດຖະກິດ-ສັງຄົມ​ແຫ່ງ​ຊາດ 5 ປີ​ ຄັ້ງທີ 9 ​,ບັນດາຄະນະ​ຜູ້​ແທນ​ທີ່​ເຂົ້້າຮ່ວມ​ກອງ​ປະຊຸມ​ໄດ້​ສຸມ​ທຸກ​ເຫືອ​ແຮງ​ສະຕິ​ປັນຍາ​ເຂົ້າ​ໃນ​ການ​ປະກອບ​ຄຳ​ຄິດ​ຄຳ​ເຫັນ, ຄົ້ນຄ້ວາ ​ແລະ​ ຕົກລົງ​ເອົາ​ຫຼາຍ​ບັນຫາ​ທີ​ສຳຄັນ​ຂອງ​ພັກ-ຂອງ​ຊາດ,​ ​ ກອງ​ປະຊຸມ​ໄດ້​​ເປັນ​ເອກະ​ພາບ​ກັນ​ຮັບຮອງ​ເອົາ​ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນປະຕິວັດລາວ.

ພ້ອມ​ນີ້, ບັນດາຄະນະ​ຜູ້​ແທນທີ່​ເຂົ້າຮ່ວມ​ໄດ້​ໃຊ້​ສິດ​ປະ​ຊາ​ທິປະ​ໄຕ​ປ່ອນ​ບັດ​ເລືອກ​ຕັ້ງ​ເອົາ​ຄະນະບໍລິຫານງານສູນກາງພັກສະໄໝທີ 11 ເພື່ອສືບ​ຕໍ່​ນຳພາ​ປະ​ເທດ​ຊາດ​​ໃຫ້​ມີ​ການ​ພັດທະນາ​ຢ່າງຮອບດ້ານ​ຕາມ​ທິດກ້າວ​ຂື້ນ​ສູ່​ຈຸດໝາຍ​ສັງຄົມ​ນິຍົມ,  ​ໃນ​ນີ້​ເລືອກ​ໄດ້​ກຳມະການ​ສູນ​ກາງ​ພັກ​ຈຳນວນ 71 ສະຫາຍ, ຍິງ 12 ສະຫາຍ,  ກຳມະການ​ສຳຮອງ​ສູນ​ກາງ​ພັກ 10 ສະຫາຍ, ຍິງ 2 ສະ​ຫາຍ. ກອງ​ປະຊຸມ​ຄັ້ງປະຖົມ​ມະ​ລືກ​ຂອງຄະນະບໍລິຫານງານສູນກາງພັກສະໄໝທີ 11 ​ໄດ້​ເປັນ​ເອກະສັນ​ເລືອກ​ຕັ້ງ​ເອົາ ສະຫາຍ ທອງ​ລຸນ ສີ​ສຸ​ລິດ ​ເປັນ​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ ​ແລະ ​​ເລືອກ​ຕັ້ງ​​ກົມ​ການ​ເມືອງສູນ​ກາງ​ພັກ​ 13 ສະຫາຍ, ຄະນະ​ເລຂາທິການ​ສູນ​ກາງ​ພັກ 9 ສະ​ຫາຍ, ກອງ​ປະຊຸມ​ໄດ້​ເລືອກ​ຕັ້ງ​ເອົາ ສະຫາຍ ປອ ບຸນ​ທອງ ຈິດ​ມະນີ ​ເປັນ​ຜູ້​ປະຈຳການ​ຄະນະ​ເລ​ຂາ​ທິການ​ສູນ​ກາງ​ພັກ, ​ເຫັນ​ດີ​ເອກະ​ພາບ​ເລືອກ ສະຫາຍ ປອ ຄຳ​ພັນ ພົມ​ມະ​ທັດ ​ເປັນ​ປະທານ​ຄະນະກວດກາສູນ​ກາງ​ພັກ ​ແລະ ​ເລືອກ​ຮອງ​ປະທານຄະນະກວດກາສູນ​ກາງ​ພັກ 6 ສະຫາຍ.

 

 

Off

Comments are closed.