22nd Jan2021

ພິທີ ມອບ-ຮັບ ທຸງໄຊນໍາໜ້າຂະບວນການ 4 ບຸກ ຂອງຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ກະຊວງ ປກສ

by somchan

ພິທີ ມອບ-ຮັບ ທຸງໄຊນໍາໜ້າຂະບວນການ 4 ບຸກ ຂອງຄະນະບໍລິຫານງານຊາວໜຸ່ມ  ກະຊວງ ປກສ ໄດ້ຈັດ ໃນວັນທີ 22 ມັງກອນ 2021 ໂດຍການເຂົ້າຮ່ວມຂອງ ສະຫາຍ ອາລຸນໄຊ ສູນນະລາດ ກໍາມະການສູນກາງພັກ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ມີ ພຈົວ ຄໍາສາຍ ຈັນທະວົງ ຮອງຫົວໜ້າກົມໃຫຍ່ການເມືອງ ປກສ ມີເລຂາຄະນະບໍລິຫານງານຊາວໜຸ່ມກະຊວງ ປກສ, ຮາກຖານຊາວໜຸ່ມ 18 ກົມກອງອ້ອມຂ້າງກະຊວງ ພ້ອມດ້ວຍສະມາຊິກຊາວໜຸ່ມເຂົ້າຮ່ວມ.

ພັທ ບຸນຈັນ ອິນພົມມາ ເລຂາຄະນະບໍລິຫານການຊາວໜຸ່ມ ກະຊວງ ປກສ ໄດ້ຂື້ນຜ່ານບົດລາຍງານການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ  ຕິດພັນກັບ 18 ຂໍ້ແຂ່ງຂັນ ຂອງຄະນະບໍລິຫານງານຊາວໜຸ່ມ ກະຊວງ ປກສ ປະຈໍາປີ 2020 ເຊີ່ງໃນໄລຍະຜ່ານມາ ຄະນະບໍລິຫານງານຊາວໜຸ່ມກະຊວງ ປກສ ໄດ້ຖືເອົາວຽກງານສຶກສາອົບຮົມການເມືອງ-ແນວຄິດ ເປັນກົກໃຫ້ແກ່ສະມາຊິກຊາວໜຸ່ມ ໃນກໍາລັງປ້ອງກັນຄວາມສະຫງົບ ເວົ້າລວມ ເວົ້າສະເພາະ ກໍ້ຄືສະມາຊິກຊາວໜຸ່ມ 18 ກົມກອງ ອ້ອມຂ້າງກະຊວງ ເພື່ອຍົກສູງຄຸນທາດການເມືອງໃຫ້ມີຄວາມໜັກແໜ້ນ, ຄຸນສົມບັດສິນທໍາປະຕິວັດ ສ້າງທັດສະນະແນວຄິດໃຫ້ແກ່ສະມາຊິກຊາວໜຸ່ມ ຕໍ່ຄວາມຮັບຮູ້ເຂົ້າໃຈທາງດ້ານແນວທາງນະໂຍບາຍຂອງພັກ, ການຈັດຕັ້ງປະຕິບັດ ແລະ ຜົນຂະຫຍາຍເນື້ອໃນ 4 ບຸກຂອງສູນກາງຊາວໜຸ່ມ ສອດຫ້ອຍເຂົ້າໃນທຸກຂົງເຂດວຽກງານວິຊາສະເພາະ ໃນໄລຍະ 1 ປີ ຜ່ານມາ ສາມາດປະກາດຮັບຮອງໜ່ວຍ 4 ບຸກ ກົມກອງອ້ອມຂ້າງ ກະຊວງ ປກສ ໄດ້ 174 ໜ່ວຍ ເທົ່າກັບ   84 ສ່ວນຮ້ອຍ ແລະ ຕິດເລຂາຄະນະຊາວໜຸ່ມ 4 ບຸກ ໄດ້ 18 ຮາກຖານ ເທົ່າກັບຮ້ອຍສ່ວນຮ້ອຍ, ການປະເມີນຜົນການຈັດຕັ້ງປະຕິບັດ ຂໍ້ແຂ່ງຂັນຂະບວນການ 4 ບຸກ ແລະ 18 ຂໍ້ແຂ່ງຂັນ ຂອງຄະນະບໍລິຫານງານຊາວໜຸ່ມກະຊວງ ປກສ ປະຈໍາປີ 2017-2019 ສາມາດປະເມີນຜົນກົມກອງທີ່ໄດ້ຮັບທຸງໄຊນໍາໜ້າຂະບວນການແຂ່ງຂັນ 4 ບຸກ 13 ກົມກອງ ເທົ່າກັບ 73 ສ່ວນຮ້ອຍ.

ຈາກນັ້ນ, ກອງປະຊຸມໄດ້ຜ່ານຂໍ້ຕົກລົງ ຂອງຄະນະບໍລິຫານງານຊາວໜຸ່ມ ກະຊວງ ປກສ  ວ່າດ້ວກຍການຢັ້ງຢືນກົມກອງ 4 ບຸກ ໃຫ້ຄະນະຊາວໜຸ່ມຮາກຖານ 18 ກົມກອງ ອ້ອມຂ້າງກະຊວງ ປກສ ປະຈໍາປີ 2019, ຂໍ້ຕົກລົງ ວ່າດ້ວຍການມອບທຸງໄຊນໍາໜ້າຂະບວນການແຂ່ງຂັນ 4 ບຸກ ໃຫ້ຄະນະຊາວໜຸ່ມຮາກຖານ 13 ກົມກອງ , ຂໍ້ຕົກລົງຂອງ ກະຊວງ ປກສ  ວ່າດ້ວຍການມອບຫຼຽນກາ ປກສ ໃຫ້ຄະນະຮັບຜິດຊອບ ແລະ ຄູຝຶກ 9 ສະຫາຍ, ຂໍ້ຕົກລົງ ວ່າດ້ວຍການຍ້ອງຍໍຄະນະຮັບຜິດຊອບ ແລະ ນັກກິລາບານເຕະ ຈໍານວນ 42 ສະຫາຍ ໂດຍການມອບຂອງ ສະຫາຍ ພຈົວ ຄໍາສາຍ ຈັນທະວົງ ຮອງຫົວໜ້າກົມໃຫຍ່ການເມືອງ ປກສ.

ນອກນັ້ນ, ກອງປະຊຸມກໍໄດ້ຜ່ານຂໍ້ຕົກລົງ ຂອງຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ  ວ່າດ້ວຍການຍ້ອງຍໍຄະນະບໍລິຫານງານຊາວໜຸ່ມ ກະຊວງ ປກສ, ຂໍ້ຕົກລົງ ວ່າດ້ວຍການມອບນາມມະຍົດກະຊວງ 4 ບຸກ 3 ປີຊ້ອນ ແລະ ຮັບທຸງໄຊນໍາໜ້າຂະບວນການແຂ່ງຂັນ 4 ບຸກ ໂດຍການມອບຂອງ ສະຫາຍ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ພ້ອມນັ້ນຄະນະບໍລິຫານງານຊາວໜຸ່ມກະຊວງ ປກສ ກໍ່ໄດ້ຂື້ນຈັບມືເພື່ອສືບຕໍ່ ປະຕິບັດຂໍ້ແຂ່ງຂັນ 4 ບຸກ.

ໂອກາດດັ່ງກ່າວ ສະຫາຍ ອາລຸນໄຊ ສູນນະລາດ ເລຂາຄະນະບໍລິຫານການສູນກາງຊາວໜຸ່ມປະຊາຊົນ ປະຕິວັດລາວ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດ ຂອງຄະນະບໍລິຫານງານຊາວໜຸ່ມກະຊວງ ປກສ ທີ່ໄດ້ເອົາໃຈໃສ່ໃກ້ຊິດຕິດແທດກັບບັນດາຮາກຖານຊາວໜຸ່ມໃນທົ່ວກະຊວງ ປກສ ເຮັດໃຫ້ວຽກງານຊາວໜຸ່ມມີທ່າຂະຫຍາຍຕົວຢ່າງບໍ່ຢຸດຢັ້ງ.

Off

Comments are closed.