22nd Jan2021

ສປປ ລາວ ແລະ ຣາຊະອານາຈັກໄທ ຮັດແໜ້ນສາຍພົວພັນມິດຕະພາບ ຖານບ້ານໃກ້ເຮືອນຄຽງທີ່ດີ

by somchan

ໃນຕອນເຊົ້າຂອງວັນທີ 22 ມັງກອນ 2021, ພະນະທ່ານ ທອງລຸນ ສີສຸລິດ, (ນາຍົກລັດຖະມົນຕີ ແຫ່ງ ສປປ ລາວ ໄດ້ສົນທະນາທາງໂທລະສັບ ກັບ ພະນະທ່ານ ພົນເອກ ປຣະຢຸດ ຈັນໂອຊາ, ນາຍົກລັດຖະມົນຕີ ແຫ່ງຣາຊະອານາຈັກໄທ ເພື່ອຮັດແຫນ້ນສາຍພົວພັນມິດຕະພາບຖານ ບ້ານໃກ້ເຮືອນຄຽງທີ່ດີ ລະຫວ່າງ ສອງປະເທດ, ໃນໂອກາດດັ່ງກ່າວ, ພະນະທ່ານ ປຣະຢຸດ ຈັນໂອຊາ ໄດ້ສະແດງຄວາມຊົມເຊີຍ ຕໍ່ຜົນສໍາເລັດອັນຈົບງາມຂອງການດໍາເນີນ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງ ພັກປະຊາຊົນປະຕິວັດລາວທີ່ຫາກໍ່ສໍາເລັດລົງໃນຫວ່າງບໍ່ດົນຜ່ານມາແລະ ຍັງໄດ້ ສະແດງຄວາມຍິນດີ ແລະ ຊົມເຊີຍ ພະນະທ່ານ ທອງລຸນ ສີສຸລິດ ທີ່ໄດ້ຮັບເລືອກຕັ້ງເປັນ ເລຂາທິການ ໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ສະໄຫມທີ XI ໃນກອງປະຊຸມດັ່ງກ່າວ.

ໃນໂອກາດນີ້, ພະນະທ່ານ ທອງລຸນ ສີສຸລິດ ໄດ້ສະແດງຄວາມຂອບໃຈ ພະນະທ່ານ ປຣະຢຸດຈັນໂອຊາ ທີ່ໄດ້ຊົມເຊີຍຢ່າງຈິງໃຈຕໍ່ຜົນສໍາເລັດຂອງກອງປະຊຸມໃຫຍ່ຄັ້ງນີ້, ພ້ອມນີ້,ສອງຝ່າຍຍັງໄດ້ປຶກສາຫາລື ຮ່ວມກັນ ກ່ຽວກັບການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຖານບ້ານໃກ້ເຮືອນ ຄຽງທີ່ດີ ແລະ ກ້າວໄປສູ່ການເປັນຄູ່ຮ່ວມຍຸດທະສາດ ເພື່ອຄວາມຈະເລີນເຕີບໂຕ ແລະ ການພັດທະນາ ແບບຍືນຍົງໃນອານາຄົດ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ກໍ່ຄືເພື່ອສັນຕິພາບ,ໃນທ່າມກາງສະພາບທີ່ມີການແຜ່ລະບາດຂອງພະຍາດໂຄວິດ-19, ສອງປະເທດ ລາວ ແລະ ໄທ ຈະເພີ້ມ ທະວີການຮ່ວມມືຢ່າງແຫນ້ນແຟ້ນ ເພື່ອຮ່ວມກັນສະກັດກັ້ນ ແລະ ປ້ອງກັນການລະບາດຂອງພະຍາດ ດັ່ງກ່າວກໍ່ຄື ສົ່ງເສີມການຮ່ວມມືທາງດ້ານການຄ້າ ແລະ ການລົງທຶນ ໃຫ້ຂະຫຍາຍຕົວຍິງຂຶ້ນກວ່າເກົ່າ ເພື່ອຊ່ວຍຟື້ນຟູເສດຖະກິດທີ່ກໍາລັງໄດ້ຮັບຜົນກະທົບຈາກການລະບາດຂອງພະຍາດດັ່ງກ່າວ. ນອກນີ້,ທັງສອງຝ່າຍ ຍັງເຫັນດີຊຸກຍູ້ໃຫ້ພາກສ່ວນຕ່າງໆຂອງສອງປະເທດ ຮ່ວມກັນສະເຫຼີມສະຫຼອງວັນ ສ້າງຕັ້ງສາຍພົວພັນການທູດ ລາວ-ໄທ ຄົບຮອບ 70 ປີ ຢ່າງເປັນຂະບວນຟົດຟື້ນ ແລະ ມີຄວາມຫມາຍ ຄວາມສໍາຄັນ, ເພື່ອສ່ອງແສງໃຫ້ເຫັນເຖິງສາຍພົວພັນມິດຕະພາບຖານບ້ານໃກ້ເຮືອນຄຽງ ແລະ ການ ຮ່ວມມືທີ່ດີງາມ ລະຫວ່າງ ລາວ ແລະ ໄທ ຕະຫຼອດໄລຍະ 7 ທົດສະຫວັດຜ່ານມາ.

 

Off

Comments are closed.