27th Jan2021

ກອງບັນຊາການປ້ອງກັນເຄື່ອນທີ່ຈັດກອງປະຊຸມສະຫຼຸບວຽກງາານປະຈຳປີ 2020

by somchan

ກອງບັນຊາການປ້ອງກັນເຄື່ອນທີ່ ກະຊວງປ້ອງກັນຄວາມສະຫງົບ ຈັດກອງປະຊຸມສະຫຼຸບວຽກງານ ປະຈຳປີ 2020 ແລະ ທິດທາງແຜນການວຽກງານຈຸດສຸມປີ 2021. ໃນວັນທີ 27 ມັງກອນ 2021 ນີ້ ພາຍໃຕ້ການເປັນປະທານຂອງ ພົຈວ ຈັນສະແຫວງ ທິບຄູນທອງ ຄະນະປະຈຳພັກກະຊວງ, ຫົວໜ້າກອງບັນຊາການປ້ອງກັນເຄື່ອນທີ່ ແລະ ໂດຍການໃຫ້ກຽດເຂົ້າຮ່ວມຂອງ ພົນຕີ ປອ ທອງເຫຼັກ ມັງໜໍ່ເມກ ຄະນະປະຈຳພັກກະຊວງ, ປະທານກວດກາພັກ, ຮອງລັດຖະມົນຕີກະຊວງປ້ອງກັນຄວາມສະຫງົບມີບັນດາຄະນະພັກ, ພະນັກງານຫຼັກແຫ່ງ ກົມກອງອ້ອມຂ້າງກອງບັນຊາການເຂົ້າຮ່ວມ.

ພັອ ພູນສະຫວັນ ພັນທະເສນາ ຮອງຫົວໜ້າກອງບັນຊາການປ້ອງກັນເຄື່ອນທີ່ ໄດ້ຜ່ານບົດສະຫຼຸບຕີລາຄາໃນການນຳພາເຄື່ອນໄຫວເຮັດໜ້າທີ່ວຽກງານວິຊາສະເພາະທີ່ໄດ້ຮັບມອບໝາຍ ໃນ 1 ປີ ຜ່ານມາ ເປັນຕົ້ນດ້ານດີ ຜົນງານ ຄະນະພັກ-ຄະນະບັນຊາແຕ່ລະຂັ້ນ ໄດ້ເອົາໃຈໃສ່ໃນການສຶກສາອົບຮົມ ການເມືອງແນວຄິດ ໃຫ້ນາຍ ແລະ ພົນຕຳຫຼວດ  ແລະ ຕິດພັນກັບການຈັດຕັ້ງປະຕິບັດໜ້າທີ່ວຽກງານວິຊາສະເພາະ ເຊັ່ນ: ໄດ້ອອກກວດກາລາດຕະເວນ ໄດ້ 5 ພັນກວ່າຄັ້ງ, ກັກຜູ້ຕ້ອງສົງໄສໄດ້ 119 ຄົນ, ຍຶດຢາບ້າ 1 ແສນກວ່າເມັດ, ປືນ 3 ກະບອກ, ລົດໃຫຍ່ 10 ຄັນ, ລົດຈັກ 104 ຄັນ, ກວດກູ້ວັດຖຸ ລະເບີດໄດ້ 9 ໜ່ວຍ, ປ້ອງກັນແຂກຕ່າງປະເທດທີ່ມາຢ້ຽມຢາມ ແລະ ເຮັດວຽກຢູ່ ສປປ ລາວ ໄດ້ 100 ກວ່າຄັ້ງ, ປ້ອງກັນກອງປະຊຸມລະດັບຊາດ-ລະດັບສາກົນ, ປ້ອງກັນໂຄງການກໍ່ສ້າງເສັ້ນທາງລົດໄຟລາວ-ຈີນ, ປ້ອງກັນຜູ້ນຳພັກ-ລັດ, ງານບຸນປະເພນີສຳຄັນຕ່າງໆຂອງພັກຂອງຊາດ 900 ກວ່າຄັ້ງ, ແມ່ນຮັກສາໄດ້ຄວາມສະຫງົບປອດໄພຮ້ອຍສ່ວນຮ້ອຍ. ພ້ອມນີ້ ຍັງໄດ້ຈັດສົ່ງພະນັກງານ ນາຍ ແລະ ພົນຕຳຫຼວດໄປຍົກລະດັບທາງດ້ານທິດສະດີ ບຳລຸງວຽກງານວິຊາສະເພາະຢູ່ພາຍໃນ ແລະ ຕ່າງປະເທດໄດ້ 138 ຄົນ. ໄດ້ຄົ້ນຄວ້າເລື່ອນຊັ້ນໃຫ້ນາຍ ແລະ ພົນຕຳຫຼວດ ຜູ້ທີ່ມີຜົນງານ ແລະ ຄົບມາດຖານເງື່ອນໄດ້ 478 ຄົນ ແລະ ອື່ນໆ.

ໃນກອງປະຊຸມບັນດາຜູ້ແທນເຂົ້າຮ່ວມຕາງໜ້າແຕ່ລະກົມກອງອ້ອມກອງບັນຊາການ ຍັງໄດ້ປະກອບຄຳເຫັນໃຫ້ບົດສະຫຼຸບ ແລະ ທິດທາງວຽກງານຈຸດສຸມ ປີ 2021 ດ້ວຍຄວາມຮັບຜິດຊອບສູງ ແລະ ເຕັມໄປດ້ວຍເນື້ອໃນທີ່ມີຄວາມໝາຍສຳຄັນ.

Off

Comments are closed.