02nd Feb2021

ກອງປະຊຸມສະຫຼຸບວຽກງານພະລາທິການ ປກສ ປະຈໍາປີ 2020

by somchan

ກອງປະຊຸມສະຫຼຸບວຽກງານພະລາທິການປ້ອງກັນຄວາມສະຫົງບປະຈໍາປີ 2020 ແລະ ທິດທາງແຜນການວຽກງານຈຸດສຸມປີ 2021. ໄດ້ຈັດໃນວັນທີ 1 ກຸມພານີ້ ໂດຍການເປັນປະທານຂອງ ພົຈວ ຫນູດີ ມີໄຊຍະລາດ ຄະນະປະຈໍາພັກກະຊວງ ຫົວຫນ້າກົມໃຫຍ່ພະລາທິການ ກະຊວງປ້ອງກັນຄວາມສະຫົງບ, ມີຄະນະກົມ, ກົມກອງອ້ອມຂ້າງ, ພະນັກງານຫຼັກແຫຼ່ງ, ບັນດາ ປກສ ແຂວງທົ່ວປະເທດ ແລະ ແຂກຖືກເຊີນເຂົ້າຮ່ວມ.

ພົຈວ ທອງສຸກ ຍ່າເອີລາວລີ ຮອງຫົວຫນ້າກົມໃຫຍ່ພະລາທິການ ກະຊວງ ປກສ ໄດ້ສະຫຼຸບການຈັດຕັ້ງປະຕິບັດວຽກງານພະລາທິການໃນ 1 ປີ ຜ່ານມາ ມີຜົນສໍາເລັດຫຼາຍດ້ານເປັນຕົ້ນແມ່ນ ວຽກງານປັບປຸງກໍ່ສ້າງຂະເເຫນງພະລາທິການ ຈັດຕັ້ງປັບປຸງບັນດານິດ ກໍາຂອງກົມກອງວິຊາສະເພາະ ເພື່ອຮັບປະກັນພະລາທິການຮອບດ້ານ ຮັບໃຊ້ກໍາລັງປ້ອງກັນຄວາມສະຫງົບ ໃຫ້ສອດຄ່ອງ ແລະ ສົມຄູ່ກັບຄວາມຮຽກຮ້ອງຕ້ອງການຂອງຫນ້າທີ່ການເມືອງ, ຈັດຕັ້ງລົງເຄື່ອນໄຫວຊຸກຍູ້, ຕິດຕາມ, ກວດກາວຽກງານພະລາທິການ ປະຈໍາປີ 2020 ໄດ້ 12 ກົມກອງ, ຄົ້ນຄວ້າສ້າງນິຕິກໍາລະບຽບກໍາລັງພະລາທິການສໍາເລັດວຽກງານການເງິນ ເອົາໃຈໃສ່ຈັດຕັ້ງປະຕິບັດແຜນງົບປະມານ ທີ່ໄດ້ຮັບອະນຸມັດຖືກຕ້ອງຕາມລະບຽບກົດຫມາຍ, ມີການປະຢັດ ມັດທະຍັດ, ຄຸ້ມຄອງ ຢ່າງຮັດກຸມ ແລະ ທັນກັບຄວາມຮຽກຮ້ອງຕ້ອງການຂອງວຽກງານ, ຮັບປະກັນການເບີກຈ່າຍ ເງິນເດືອນ ປົກກະຕິ , ເງິນເຄື່ອນໄຫວວິຊາສະເພາະທັນກັບເວເວລາ, ຮັບປະກັນງົບປະມານ ຮັບໃຊ້ວຽກງານ ບໍລິຫານໃຫ້ເປັນປົກກະຕິ ພ້ອມທັງຊຸກຍູ້, ຕິດຕາມ ບັນດາກົມກອງໃນການຈັດຕັ້ງປະຕິບັດເກັບລາຍຮັບໄດ້ ເກີນແຜນ ແລະ ລວມສູນຢູ່ພະລາທິການແຕ່ລະຂັ້ນ, ການຄຸ້ມຄອງລາຍຈ່າຍ ໄດ້ຄ່ອຍຫັນເຂົ້າສູ່ລະບຽບຫຼັກການເທື່ອລະກ້າວ ແລະ ມີການປະຢັດມັດທະຍັດດີພໍສົມຄວນ. ໄດ້ຈັດຕັ້ງປະຕິບັດວຽກງານກໍ່ສ້າງ-ສ້ອມ ແປງພື້ນຖານໂຄງລ່າງຂອງກໍາລັງປ້ອງກັນຄວາມສະຫງົບ ໃຫ້ສອດຄ່ອງກັບສະພາບຕົວຈິງ, ຕອບສະຫນອງດ້ານງົບປະມານ ເຂົ້າໃນວຽກງານກໍ່ສ້າງ-ສ້ອມແປງສໍານັກງານ, ຫ້ອງການ, ລະບົບຄ້າຍຄຸມຂັງ, ໂຮງຮຽນ , ໂຮງໝໍ ແລະ ໂຄງການວິຊາສະເພາະຂອງກໍາລັງປ້ອງກັນຄວາມສະຫງົບ, ໄດ້ຮັບອະນຸມັດ. ໂຄງການລົງທຶນຂອງລັດ 54 ໂຄງການມູນຄ່າ 73 ຕື້ກ່ວາກີບ, ຈັດຕັ້ງປະຕິບັດຕົວຈິງ 62 ຕື້ກ່ວາກີບ, ຈັດຕັ້ງມອບ-ຮັບໂຄງການ 2020 ຈໍານວນ 3 ໂຄງການ, ຈັດຕັ້ງປະຕິບັດໂຄງການກໍ່ສ້າງ-ສ້ອມແປງ ທີ່ໄດ້ຮັບອະນຸມັດຈາກຂັ້ນເທິງ ແລະ ໂຄງການມທີ່ຖືກຜົນກະທົບ ຈາກລົມພາຍຸ ມີ 9 ໂຄງການ ມູນຄ່າ 600 ລ້ານກ່ວາກີບ, ຈັດຕັ້ງສະຫຼຸບສັງລວມບັນຊີທີ່ດິນທີ່ກະຊວງປ້ອງກັນຄວາມສະຫງົບຄຸ້ມຄອງນໍາໃຊ້ 1.232 ຕອນ,ເນື້ອທີ່ 11,261 ເຮັກຕາ ເປັນເຈົ້າການຊຸກຍູ້ , ຕິດຕາມການເຄື່ອນໄຫວສ້າງລາຍຮັບຂອງແຕ່ລະຫົວຫນ່ວຍທຸລະກິດ, ເອົາໃຈໃສ່ ຊີ້ນໍາ, ຊຸກຍູ້, ປຸກລະດົມບັນດາກົມກອງຂອງກໍາລັງປ້ອງກັນຄວາມສະຫງົບ ເພື່ອເຮັດການຜະລິດ-ທຸລະກິດ, ສຸມໃສ່ຜະລິດກະສິກໍາ, ປູກຝັງ-ລ້ຽງສັດ, ບໍລິການ, ຕາມເງື່ອນໄຂ, ທ່າແຮງ ແລະ ຄວາມສາມາດຂອງກົມກອງ ສ້າງລາຍຮັບເພີ່ມ ໃຫ້ກໍາລັງປ້ອງກັນຄວາມສະຫງົບ ເພື່ອແກ້ໄຂຊີວິດການເປັນຢູ່ຂອງນາຍ ແລະ ພົນຕໍາຫຼວດ ແລະ ວຽກງານອື່ນໆ, ໃນກອງປະຊຸມບັນດາຜູ້ເຂົ້າຮ່ວມກອງປະຊຸມໄດ້ ພ້ອມກັນປະກອບຄໍາຄິດເຫັນເພື່ອເຮັດໃຫ້ການຈັດຕັ້ງປະຕິບັດວຽກງານພະລາທິການມີຄວາມສອດ ຄ່ອງ ແລະ ທັນກັບຄວາມຮຽກຮ້ອງຕ້ອງການຂອງວຽກງານ. ກອງປະຊຸມຈະໄດ້ດໍາເນີນເປັນເວລາ 2 ວັນຈຶ່ງສໍາເລັດ.

 

Off

Comments are closed.