08th Feb2021

ທ່ານເຈົ້າແຂວງ ໄຊຍະບູລີ ຢ້ຽມຢາມ ແລະ ເຮັດວຽກຢູ່ເມືອງ ຫົງສາ

by somchan

ໃນວັນທີ 6 ກຸມພາ 2021 ນີ້, ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມຄະນະ ໄດ້ລົງຢ້ຽມຢາມ ແລະ ເຮັດວຽກ ຢູ່ເມືອງ ຫົງສາ, ໃຫ້ການຕ້ອນຮັບ ໂດຍທ່ານ ຄໍາຫຼ້າ ຜີວວັນນາ ເຈົ້າເມືອງ ຫົງສາ ພ້ອມດ້ວຍການນໍາຂອງເມືອງໃຫ້ການຕ້ອນຮັບຢ່າງອົບອຸ່ນ.

ໂອກາດນີ້ ທ່ານ ເຈົ້າແຂວງ ໄດ້ຮັບຟັງລາຍງານວຽກງານ ການຜະລິດລະດູແລ້ງ, ການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19, ການກະກຽມເລືອກຕັ້ງ ສະມາຊິກສະພາແຫ່ງຊາດ ແລະ ສະມາຊິກສະພາຂັ້ນແຂວງ, ຈາກການນຳເມືອງຫົງສາ ໃນນີ້ການປູກພືດລະດູແລ້ງປີນີ້ເມືອງ ຫົງສາ ແມ່ນປະຕິບັດໄດ້ 820,35 ເຮັກຕາ, ໄດ້ແກ່ການປູກເຂົ້ານາແຊງ, ຜັກບົ່ວ-ຜັກທຽມ, ສາລີຫວານ, ໝາກເຜັດ-ໝາກເຂືອ, ໝາກແຕງ, ໝາກຖົ່ວ, ໝາກອື ແລະ ພືດຜັກຕ່າງໆ,  ວຽກງານປ້ອງກັນ, ຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ແມ່ນໄດ້ປະຕິບັດຕາມມາດຕະການຂອງຄະນະສະເພາະກິດແຫ່ງຊາດຢ່າງເຂັ້ມງວດ, ເອົາໃຈໃສ່ຕິດຕາມການເຂົ້າ-ອອກຂອງປະຊາຊົນຕາມຂອບເຂດບ້ານທີ່ມີຊາຍແດນຕິດຈອດກັບປະເທດເພື່ອນບ້ານຢ່າງເປັນປົກກະຕິ, ສ່ວນວຽກງານເລືອກຕັ້ງແມ່ນໄດ້ມີຄວາມພ້ອມຮອບດ້ານເຊັ່ນ: ສໍາເລັດການແຕ່ງຕັ້ງອານຸກໍາມະການເລືອກຕັ້ງ, ການເຜີຍແຜ່ເອກະສານກ່ຽວກັບການເລືອກຕັ້ງ, ການເກັບກໍາຂໍ້ມູນສະຖິຕິຂອງພົນລະເມືອງຜູ້ມີສິດປ່ອນບັດ, ການກະກຽມດ້ານອຸປະກອນ, ສະຖານທີ່ ແລະ ອື່ນໆ, ຊຶ່ງທົ່ວເມືອງ ຊຽງຮ່ອນ ມີໜ່ວຍປ່ອນບັດທັງໝົດ 35 ໜ່ວຍ, ຜູ້ມີສິດປ່ອນບັດເລືອກຕັ້ງທັງໝົດ 19.687 ຄົນ, ຍິງ 9.545  ຄົນ.

ໂອກາດດັ່ງກ່າວ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ກໍ່ໄດ້ເນັ້ນໜັກໃຫ້ການນໍາຂອງເມືອງຈົ່ງເອົາໃຈໃສ່ຕໍ່ວຽກງານການເລືອກຕັ້ງ, ເຮັດໃຫ້ການເລືອກຕັ້ງຄັ້ງນີ້ໄດ້ຮັບຜົນສໍາເລັດຕາມແຜນການ, ຮັກສາໃຫ້ໄດ້ຄວາມສະຫງົບປອດໄພຮອບດ້ານ, ເອົາໃຈໃສ່ເຝົ້າລະວັງຢ່າງເຂັ້ມງວດຕໍ່ການລະບາດຂອງພະຍາດໂຄວິດ-19, ກວດກາແຮງງານລາວທີ່ກັບຈາກຕ່າງປະເທດ ໃຫ້ເຂົ້າສູນກັກກັນ, ເອົາໃຈໃສ່ຊຸກຍູ້ສົ່ງເສີມປະຊາຊົນປູກພືດລະດູແລ້ງໃຫ້ຫຼາຍຢູ່ແຕ່ລະທ້ອງຖິ່ນທີ່ເຫັນວ່າມີຄວາມເໝາະສົມ, ເອົາໃຈໃສ່ປົກປັກຮັກສາປ່າໄມ້ ເປັນຕົ້ນແມ່ນປ່າຕົ້ນນໍ້າ, ຊຸກຍູ້ໃຫ້ປະຊາຊົນສ້າງຄັນຄູກັນນໍ້າຢູ່ບັນດາຫ້ວຍ ເພື່ອກັກເກັບນໍ້າໄວ້ຮັບໃຊ້ແກ່ການຜະລິດລະດູແລ້ງ ແລະ ບໍລິໂພກ, ເອົາໃຈໃສ່ເຝົ້າລະວັງ, ປ້ອງກັນ ແລະ ສະກັດກັ້ນບໍ່ໃຫ້ມີໄຟໄໝ້ລາມປ່າຢ່າງເດັດຂາດ ແລະ ໄລຍະດຽວກັນນີ້ ທ່ານເຈົ້າ ແຂວງ ໄຊຍະບູລີ ພ້ອມຄະນະຍັງໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ ເມືອງ ເງີນ ແລະ ເມືອງ ຊຽງຮ່ອນຕື່ມອີກ.

 

 

Off

Comments are closed.