17th Feb2021

ຕົ້ນປີ 2021 ມີຄົນລັກລອບເຂົ້າແຂວງ ໄຊຍະບູລີ 245 ຄົນ

by somchan

ວັນທີ 16 ກຸມພາ ຜ່ານມານີ້, ຢູ່ທີ່ຫ້ອງວ່າການປົກຄອງແຂວງ ໄຊຍະບູລີ ໄດ້ຈັດກອງປະຊຸມ ຖອດຖອນບົດຮຽນກ່ຽວກັບ ການຈັດຕັ້ງປະຕິບັດ ການປ້ອງກັນ, ຄວບຄຸມ ແລະ ໂຕ້ຕອບການລະບາດຂອງພະຍາດ ໂຄວິດ-19, ໂດຍໃຫ້ກຽດເປັນປະທານຂອງ ທ່ານ ເພັດພິໄຊ ສູນວິໄລ ຮອງເຈົ້າແຂວງ ໄຊຍະບູລີ, ເຂົ້າຮ່ວມມີ ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຂັ້ນແຂວງເຂົ້າຮ່ວມ.

ດຣ ນາງ ໄກຍະສອນ ສີດາ ຫົວໜ້າພະແນກ ສາທາລະນະສຸກແຂວງ ໄດ້ຜ່ານບົດສະຫຼຸບຜົນການຈັດຕັ້ງປະຕິບັດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ເຊິ່ງທ່ານໄດ້ກ່າວວ່າ: ແຕ່ວັນທີ 1 ມັງກອນ ຫາ 12 ກຸມພາ 2021 ນີ້, ມີຄົນເຂົ້າເມືອງຜ່ານດ່ານຕ່າງໆພາຍໃນແຂວງທີ່ຖືກຕ້ອງມີທັງໝົດ 5.623 ຄົນ, ຍິງ 327 ຄົນ, ໃນນີ້: ຄົນລາວ 1.226 ຄົນ, ຍິງ 63 ຄົນ, ຄົນໄທ 4.397 ຄົນ, ຍິງ 264 ຄົນ, ແຮງງານມີ 894 ຄົນ, ຍິງ 76 ຄົນ

ໃນນີ້: ແຮງງານຄົນລາວ 121 ຄົນ, ຍິງ 58 ຄົນ, ຄົນໄທ 773 ຄົນ, 18 ຄົນ, ຄົນຂັບລົດ ແລະ ຜູ້ຕິດຕາມຂົນສົ່ງສິນຄ້າ 4.729 ຄົນ, ຍິງ 250 ຄົນ, ໃນນີ້: ຄົນລາວ 820 ຄົນ, ຍິງ 5 ຄົນ, ຄົນໄທ 3.909 ຄົນ, ຍິງ 246 ຄົນ, ພ້ອມນີ້ຄະນະສະເພາະຍັງສາມາດກັກຕົວຄົນລັກລອບເຂົ້າເມືອງບໍ່ຖືກຕ້ອງທັງໝົດ 245 ຄົນ, ຍິງ 90 ຄົນ, ທັງໝົດແມ່ນໄດ້ເກັບຕົວຢ່າງສົ່ງສູນວິໄຈຊອກຫາເຊື້ອ ແລະ ໄດ້ເອົາເຂົ້າສູນກັກຕົວ ປະຈຸບັນທົ່ວແຂວງໄຊຍະບູລີ ມີສູນກັກຕົວບໍລິເວນທັງໝົດ 44 ແຫ່ງ ໃນນີ້ຢູ່ເທດສະບານແຂວງ 2 ແຫ່ງ ຢູ່ຂັ້ນກຸ່ມບ້ານ 3 ແຫ່ງ ແລະ ຈຸດໂຮງແຮມ-ເຮືອນພັກ 39 ແຫ່ງ, ມີຈໍານວນແຮງງານເຂົ້າສູນຈໍາກັດບໍລິເວນ 1.146 ຄົນ, ໃນນີ້: ແຮງງານໄທ 896 ຄົນ, ແຮງງານລາວ 250 ຄົນ, ແຮງງານລາວທີ່ມາແຕ່ແຂວງ ບໍ່ແກ້ວ 8 ຄົນ, ຈາກນັ້ນຜູ້ເຂົ້າຮ່ວມກໍ່ໄດ້ມີການປະກອບຄໍາຄິດ-ຄໍາເຫັນ ແລະ ຮ່ວມກັນວາງແຜນການໃນຕໍ່ໜ້າເພື່ອຮັບມືກັບແຮງງານທີ່ຈະເຂົ້າມາແຂວງ ໄຊຍະບູລີ ຜ່ານຊ່ອງທາງຕ່າງໆ, ທັງນີ້ກໍ່ເພື່ອເປັນການປ້ອງກັນບໍ່ໃຫ້ມີພະຍາດ ໂຄວິດ-19 ເຂົ້າມາລະບາດຢູ່ແຂວງ ໄຊຍະບູລີ.

Off

Comments are closed.