17th Feb2021

ແຂວງອຸດົມໄຊ ມອບ-ຮັບ ໜ້າທີ່ເລຂາຄະນະບໍລິຫານງານພັກແຂວງ ຜູ້ເກົ່າ ແລະ ຜູ້ໃໝ່

by somchan

ວັນທີ 16 ກຸມພານີ້ ຢູ່ທີ່ຫ້ອງວ່າການປົກຄອງແຂວງອຸດົມໄຊ ໄດ້ຈັດ ພິທີ ມອບ-ຮັບໜ້າທີ່ເລຂາຄະນະບໍລິຫານງານພັກແຂວງ-ເຈົ້າແຂວງອຸດົມໄຊ ລະຫວ່າງ ຜູ້ເກົ່າ-ຜູ້ໃໝ່ ຂຶ້ນ ໂດຍການໃຫ້ກຽດເຂົ້າຮ່ວມຂອງ ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີຜູ້ຕາງໜ້າອົງການຈັດຕັ້ງພັກຂັ້ນສູນກາງ, ກຳມະການປະຈຳພັກແຂວງ, ກຳມະການພັກແຂວງ,  ຄະນະປະຈຳສະພາປະຊາຊົນແຂວງ, ຫົວໜ້າພະແນກການ, ອົງການ, ກອງບັນຊາການທະຫານ-ກອງບັນຊາການ ປກສ , ລັດວິສາຫະກິດ ແລະ ອາດີດການນຳແຂວງອຸດົມໄຊ ເຂົ້າຮ່ວມ.

ໂອກາດນີ້ ສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ ໄດ້ຕາງໜ້າຄະນະຈັດຕັ້ງສູນກາງພັກ ຜ່ານຄຳສັ່ງຂອງກົມການເມືອງສູນກາງພັກ ແລະ ຄຳສັ່ງ ຂອງນາຍົກລັດະມົນຕີ ວ່າດ້ວຍການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່. ຍົກຍ້າຍ ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ, ເລຂາຄະນະບໍລິຫານງານພັກແຂວງອຸດົມໄຊ ຜູ້ເກົ່າ ໄປຮັບໜ້າທີ່ໃໝ່ຢູ່ຄະນະໂຄສະນາອົບຮົມສູນກາງພັກ, ຜ່ານມະຕິຕົກລົງ ຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງ ສະຫາຍ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ ຮອງເລຂາຄະນະບໍລິຫານງານພັກແຂວງ ຂຶ້ນເປັນ ເລຂາຄະນະບໍລິຫານງານພັກແຂວງອຸດົມໄຊ ແລະ ຜ່ານດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງ ສະຫາຍ ບຸນຄົງ ຫຼ້າຈຽມພອນ ເປັນຜູ້ຮັກສາການເຈົ້າແຂວງອຸດົມໄຊ ພ້ອມນັ້ນຍັງໄດ້ຜ່ານມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການບົ່ງຕົວແຕ່ງຕັ້ງ ສະຫາຍ ຄຳດີ ວົງລ້ອມ ຄະນະປະຈຳພັກແຂວງ ຂຶ້ນເປັນຮອງເລຂາຄະນະບໍລິຫານງານພັກແຂວງອຸດົມໄຊ.

 

Off

Comments are closed.