18th Feb2021

ປກສ ເມືອງນາຊາຍທອງ ຜ່ານແຜນປ້ອງກັນ ບັ້ນເລືອກຕັ້ງ ສສຊ IX ແລະ ສສຂ ຊຸດທີ II

by somchan

ກອງບັນຊາການ ປກສ ເມືອງນາຊາຍທອງ ນະຄອນຫຼວງວຽງຈັນ ໄດ້ຈັດກອງປະຊຸມ ຜ່ານແຜນປ້ອງກັນບັ້ນເລືອກຕັ້ງ ສສຊ ຊຸດທີ IX ແລະ ສສຊ ຊຸດທີ II  ກອງບັນຊາການ ປກສ ເມືອງນາຊາຍທອງ ນະຄອນຫຼວງວຽງຈັນ ໄດ້ຈັດກອງປະຊຸມຜ່ານແຜນປ້ອງກັນບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ 9 ແລະ ສະມາຊິກສະພາປະຊາຊົນຂັ້ນແຂວງ-ນະຄອນຫຼວງວຽງຈັນຊຸດທີ 2 ໃນວັນທີ 17 ກຸມພາ 2021 ນີ້ ໂດຍການເປັນປະທານຂອງ ພັທ ບຸນມີ ກັນຕິຍາວົງ ຮອງກອງບັນຊາການ ປກສ ເມືອງນາຊາຍທອງ ມີຫົວຫນ້າພະແນກ, ຮອງພະແນກ, ປກສ ກຸ່ມ ພ້ອມດ້ວຍ ພະນັກງານ-ນັກຮົບເຂົ້າຮ່ວມ.

ພັທ ໜູທັກ ຈັນທະລັງສີ ຫົວຫນ້າຫ້ອງການກອງບັນຊາການ ປກສ ເມືອງນາຊາຍທອງ ໄດ້ຂຶ້ນຜ່ານແຜນປ້ອງກັນບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ 9 ແລະ ສະມາຊິກສະພາປະຊາຊົນຂັ້ນແຂວງ-ນະຄອນຫຼວງວຽງຈັນ ຊຸດທີ 2 ທ່ານໄດ້ກ່າວວ່າ ເພື່ອຮັບປະກັນໃຫ້ແກ່ການເລືອກຕັ້ງ ທີ່ຈະມີການຈັດຂື້ນໃນວັນ ທີ 21 ກຸມພາ 2021 ນີ້ ໃຫ້ດໍາເນີນໄປດ້ວຍບັນຍາກາດອັນເບີກບານມ່ວນຊື່ນ ຮັບປະກັນໄດ້ຄວາມສະຫງົບ, ຄວາມປອດໄພ ແລະ ຄວາມເປັນລະບຽບຮຽບຮ້ອຍ  ກອງບັນຊາການ ປກສ ເມືອງນາຊາຍທອງ ແມ່ນໄດ້ຈັດຕັ້ງແຜນງານອັນລະອຽດ ເປັນຕົ້ນແມ່ນສຸມໃສ່ປ້ອງກັນຢູ່ທຸກພື້ນທີ່ ພາຍໃນເມືອງນາຊາຍທອງ ໂດຍສະເພາະບໍລິເວນສະຖານທີ່ ປ່ອນບັດ ແລະ ສະຖານທີ່ອື່ນໆໃຫ້ຮັບປະກັນຄວາມປອດໄພ ຮອບດ້ານ ເພີ່ມທະວີສະຕິລະວັງຕົວຕໍ່ກົນອຸບາຍຂອງກຸ່ມຄົນບໍ່ດີທີ່ຈະກໍ່ຄວາມບໍ່ສະຫງົບ, ເອົາໃຈໃສ່ປ້ອງກັນຜູ້ນໍາພັກ-ລັດ ຄະນະຜູ້ແທນໃຫ້ມີຄວາມປອດໄພຮ້ອຍສວ່ນຮ້ອຍ.

ໃນໂອກາດນີ້ ພັທ ບຸນມີ ກັນຕິຍາວົງ ຮອງຫົວຫນ້າກອງບັນຊາການ ປກສ ເມືອງ ນາຊາຍທອງໄດ້ໃຫ້ສໍາພາດ ຕໍ່ນັກຂ່າວກົມສື່ມວນຊົນປ້ອງກັນຄວາມສະຫງົບວ່າ : ສໍາລັບຈຸດປ້ອງກັນຂອງເມືອງນາຊາຍທອງ ແມ່ນມີ 70 ກວ່າຈຸດປ້ອງກັນ ເຊິ່ງອະນຸກໍາມະການປ້ອງກັນຄວາມສະຫງົບ ເມືອງນາຊາຍທອງ ໄດ້ມີການປະສົມທົບກັບພາກສ່ວນທີ່ກ່ຽວຂ້ອງ ເປັນຕົ້ນ ກອງບັນຊາການທະຫານເມືອງ, ປກສ ກຸ່ມ, ອໍານາດການປົກຄອງບ້ານ ແລະ ປະຊາຊົນ ,ພ້ອມທັງໄດ້ວາງກໍາລັງໃສ່ແຕ່ລະຈຸດ ເພື່ອປ້ອງກັນ ມາຮອດປັດຈຸບັນ ເຫັນໄດ້ວ່າ ເມືອງນາຊາຍທອງ ມີຄວາມພ້ອມ ຮ້ອຍສວ່ນຮ້ອຍ ໃນການປ້ອງກັນໃຫ້ແກ່ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ 9 ແລະ ສະມາຊິກສະພາປະຊາຊົນຂັ້ນແຂວງນະຄອນຫຼວງວຽງຈັນ ຊຸດທີ 2 ທີ່ຈະຈັດຂຶ້ນ ໃນວັນທີ 21 ກຸມພານີ້ ໃຫ້ຮັບປະກັນ 3 ຄາດໝາຍໃຫ້ໄດ້ຮ້ອຍສ່ວນຮ້ອຍ.



ພ້ອມດຽວກັນນີິ້ ພັທ ພອນໄຊ ຫວ່າງຈັນດາ ຮອງຫົວໜ້າກອງບັນຊາການ ປກສ ເມືອງນາຊາຍທອງ ທີ່ຮັບຜິດຊອບວຽກງານປ້ອງກັນຢູ່ຈຸດກວດກາ ບ້ານນາດີ ໄດ້ໃຫ້ສຳພາດຕໍ່ກັບທີມງານຂ່າວສື່ມວນຊົນປ້ອງກັນຄວາມສະຫງົບ ຕື່ມວ່າ ເພື່ອຮັບປະກັນໃຫ້ແກ່ບັ້ນເລືອກຕັ້ງສະມາຊິກສະພາແຫ່ງຊາດຊຸດທີ 9 ແລະ ສະມາຊິກສະພາປະຊາຊົນຂັ້ນແຂວງ-ນະຄອນຫຼວງວຽງຈັນຊຸດທີ 2 ໃຫ້ມີຄວາມສະຫງົບ, ຄວາມປອດໄພຮອບດ້ານ ໂດຍສະເພາະແມ່ນຢູ່ຈຸດກວດກາ ບ້ານນາດີ ຄະນະອານຸກຳມະການປ້ອງກັນຄວາມສະຫງົບ ເມືອງນາຊາຍທອງໄດ້ບັນຈຸກຳລັງລົງປ້ອງກັນຢູ່ຈຸດດັ່ງກ່າວແຕ່ວັນທີ 15 ມາຮອດປະຈຸບັນນີ້ ໂດຍພື້ນຖານແລ້ວແມ່ນຮັບປະກັນຄວາມສະຫງົບປອດໄພໄດ້ຮ້ອຍສ່ວນຮ້ອຍ ແລະ ພ້ອມຈະສືບຕໍ່ເຮັດໜ້າທີ່ວຽກງານອັນມີກຽດ ທີ່ພັກ-ລັດກໍ່ຄືການ ຈັດຂັ້ນເທິງມອບໝາຍໃຫ້ມີຜົນສຳເລັດຕາມຈຸດປະສົງຄາດໝາຍ.

Off

Comments are closed.