18th Feb2021

ປກສ ເມືອງໄຊເສດຖາຜ່ານແຜນປ້ອງກັນບັ້ນເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II

by somchan

ກອງບັນຊາການ ປກສ ເມືອງໄຊເສດຖາ ນະຄອນຫລວງວຽງຈັນ ໄດ້ຈັດກອງປະຊຸມ ຜ່ານແຜນປ້ອງກັນການປ່ອນບັດເລືອກຕັ້ງສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນນະຄອນຫຼວງ ຊຸດທີ II ໃນວັນທີ່ 16 ກຸມພາ 2021 ນີ້ໂດຍການເປັນປະທານຂອງ ພັທ ສີເພັດ ພິມມະສອນ ຫົວຫນ້າກອງບັນຊາການ ປກສ ເມືອງ ໄຊເສດຖາ ມີ ພັທ ບົວລຽນ ໄຊຍະຈັກ ຫົວຫນ້າກອງບັນຊາການທະຫານເມືອງ, ພ້ອມດ້ວຍຄະນະພັກ, ຄະນະບັນຊາ, ກອງບັນຊາການທະຫານເມືອງ, ກອງບັນຊາການ ປກສ ເມືອງ, ປກສ ກຸ່ມອ້ອມຂ້າງເຂົ້າຮ່ວມ.

ພັທ ອະນົງຄານ ຈິດຕະວົງ ຫົວຫນ້າຫ້ອງການ ປກສ ເມືອງ ໄຊເສດຖາໄດ້ຜ່ານແຜນປ້ອງກັນ ຂອງຄະນະກໍາມະການປ່ອນບັດເລືອກຕັ້ງເມືອງໄຊເສດຖາ  ວ່າດ້ວຍການປ່ອນບັດເລືອກຕັ້ງສະມາຊິກສະພາແຫ່ງຊາດຊຸດທີ 09 ແລະ ສະມາຊິກສະພາປະຊາຊົນນະຄອນຫຼວງຊຸດທີ 02 ເຂດເລືອກຕັ້ງເມືອງໄຊເສດຖາ, ທັງນີ້ກໍ່ເພື່ອເປັນການເຜີຍແຜ່ເຊື່ອມຊຶມໃຫ້ທຸກພາກສ່ວນໄດ້ຮັບຮູ້ເຂົ້າໃຈຢ່າງເລິກເຊິ່ງ ພ້ອມກັນນໍາໄປຈັດຕັ້ງປະຕິບັດຕາມແຜນການທີ່ວາງໄວ້ໃຫ້ມີຜົນສໍາເລັດ, ໂດຍສະເພາະແມ່ນຮັບປະກັນໃຫ້ບັ້ນເລືອກຕັ້ງຄັ້ງນີ້ ມີຄວາມສະຫງົບຮອບດ້ານ ເປັນລະບຽບຮຽບຮ້ອຍດີ ແລະ ບັນລຸຕາມຄາດຫມາຍທີ່ໄດ້ວາງໄວ້ຄື: ຜູ້ມີສິດປ່ອນບັດຕື່ນຕົວສະຫນັກ ໃຈໄປໃຊ້ສິດເລືອກຕັ້ງໃຫ້ໄດ້ຮ້ອຍສ່ວນຮ້ອຍ; ຮັບປະກັນບໍ່ໃຫ້ມີບັດຕາຍຮ້ອຍສ່ວນຮ້ອຍ; ແຕ່ລະໜ່ວຍປ່ອນບັດ ແລະ ເຂດເລືອກຕັ້ງ ຕ້ອງຮັບປະກັນໃຫ້ມີຄວາມສະຫງົບປອດໄພໃນວັນເລືອກຕັ້ງ ຮ້ອຍສ່ວນຮ້ອຍ. ສະເພາະພາຍໃນເມືອງໄຊເຊດຖາ ມີທັງຫມົດ 48 ບ້ານ ມີ 87ຫນ່ວຍປ່ອນບັດ ມີຜູ້ທີ່ ມີສິດປ່ອນບັດທັງຫມົດ 1 ແສນກວ່າຄົນ.

ການເລືອກຕັ້ງສະມາຊິກ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ນະຄອນຫຼວງ ແມ່ນ ຂະບວນການປະຕິບັດຫນ້າທີ່ການເມືອງ ແລະ ສິດປະຊາທິປະໄຕ ຂອງພົນລະເມືອງລາວ ໃນການເລືອກເອົາບຸກຄົນທີ່ມີມາດຕະຖານຄົບຖ້ວນເຂົ້າໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອເປັນຕົວແທນປະຕິບັດສິດອໍານາດ ຂອງປະຊາຊົນລາວບັນດາເຜົ່າ, ເປັນການສືບຕໍ່ສ້າງ ແລະ ບູລະນະລະບອບປະຊາທິປະໄຕປະຊາຊົນ ໂດຍສະເພາະ ແມ່ນການປັບປຸງບູລະນະສະພາແຫ່ງຊາດ ແລະ ສະພາປະຊາຊົນຂັ້ນແຂວງ-ນະຄອນຫຼວງ ໃນຖານະເປັນອົງການອໍານາດລັດຫນຶ່ງ ໃນລະບົບການເມືອງ ຂອງ ສປປ ລາວ ໃຫ້ນັບມື້ນັບເຂັ້ມແຂງ.

Off

Comments are closed.