25th Feb2021

ສືບຕໍ່ວຽກງານກໍ່ສ້າງຮາກຖານການເມືອງຕິດພັນກັບການສ້າງບ້ານ ແລະ ຄອບຄົວປ້ອງກັນຄວາມສະຫງົບດີ ຢູ່ບ້ານນໍ້າກ້ຽງ ເມືອງນາຊາຍທອງ

by somchan

ກອງບັນຊາການ ປກສ ເມືອງນາຊາຍທອງ ນະຄອນຫຼວງວຽງຈັນ ໄດ້ຈັດກອງປະຊຸມສືບຕໍ່ວຽກງານກໍ່ສ້າງຮາກຖານການເມືອງ ຕິດພັນກັບການສ້າງບ້ານຄອບຄົວ ແລະ ບ້ານປ້ອງກັນຄວາມສະຫງົບດີ ຢູ່ບ້ານນໍ້າກ້ຽງ ເມືອງນາຊາຍທອງ ນະຄອນຫຼວງວຽງຈັນ, ໃນວັນທີ 25 ກຸມພາ 2021, ໂດຍການເປັນປະທານຂອງ ພັທ ບຸນມີ ກັນຕີຍາວົງ ຮອງຫົວໜ້າກອງບັນຊາການ ປກສ ເມືອງນາຊາຍທອງ, ມີຫົວໜ້າ ປສກ ກຸ່ມ, ພະນັກງານກໍ່ສ້າງຮາກຖານ ແລະ ປະຊາຊົນພາຍໃນບ້ານເຂົ້າຮ່ວມ.

ທ່ານ ບົວລຽນ ອິນທະວົງ ນາຍບ້ານ ນໍ້າກ້ຽງ ໄດ້ຜ່ານບົດສະຫຼຸບການເຄື່ອນໄຫວວຽກງານປ້ອງ ກັນຄວາມສະຫງົບຂອງບ້ານວ່າ: ບ້ານ ນໍ້າກ້ຽງ ມີ 37 ໜ່ວຍ, 512 ຫຼັງຄາເຮືອນ, ມີ 594ຄອບຄົວ, ມີພົນລະເມືອງ 2330 ຄົນ, ໄດ້ຂຶ້ນສຳມະໂນຄົວແລ້ວ 1860 ຄອບຄົວ, ແລະ ບໍ່ທັນໄດ້ຂຶ້ນສຳມະໂນຄົວ ມີ 455 ຄົນ ຜ່ານມາອົງການປົກຄອງບ້ານໄດ້ນໍາພາປັບປຸງກໍາລັງ ປກຊ-ປກສ ໃຫ້ເຂັ້ມແຂງ ຊີ້ນຳ-ນຳພາຫັນເອົາແນວທາງປ້ອງກັນຊາດ ປ້ອງກັນຄວາມສະຫງົບລົງເຜີຍແຜ່ແລະສືກສາອົບຮົມໃຫ້ປະຊາຊົນບັນດາເຜົ່າພາຍໃນບ້ານຮັບຮູ້, ເຂົ້າໃຈ ແລະ ປະກອບສ່ວນຢ່າງຕັ້ງໜ້າ, ພ້ອມນີ້ຍັງໄດ້ເອົາໃຈໃສ່ຕິດຕາມກວດກາ ກຸ່ມເປົ້າໝາຍ ພ້ອມທັງກຳນົດຈຸດຫຼໍ່ແຫຼມເພື່ອກວດກາແລະ ບັນຈຸກຳລັງ ປກຊ-ປກສ ເຂົ້າໃສ່ ເຮັດໃຫ້ບ້ານມີຄວາມສະຫງົບປອດໄພ

ໂອກາດນີ້, ພັທ ບຸນມີ ກັນຕີຍາວົງ ໄດ້ເນັ້ນໜັກບັນດາພະນັກງານທີ່ລົງເຮັດວຽກງານຕົວຈິງ ຕ້ອງໄດ້ເພີ່ມທະວີຄວາມຮັບຜິດຊອບໃຫ້ສູງ ແລະ ເອົາໃຈໃສ່ການລົງເກັບກໍາຂໍ້ມູນຕ່າງໆຈາກໜ່ວຍ 10 ຫຼັງຄາເຮືອນໃຫ້ຖືກຕ້ອງຊັດເຈນ, ຖືກກັບຕົວຈິງ, ທັງນີ້ກໍ່ເພື່ອເປັນການສືບຕໍ່ຜັນຂະຫຍາຍ ວຽກງານປ້ອງກັນຊາດ – ປ້ອງກັນຄວາມສະຫງົບ ໃຫ້ລົງສູ່ຮາກຖານບ້ານ ຕິດພັນກັບ ວຽກງານສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ຢູ່ບ້ານ ນໍ້າກ້ຽງ ໃຫ້ຖືກຕາມທິດຊີ້ນຳ ແລະ ຖືກຕາມ 5 ມາດຖານການສ້າງຄອບຄົວ,6 ມາດຖານສ້າງບ້ານປ້ອງກັນຄວາມສະຫງົບດີ ໃຫ້ເປັນຂະບວນການຟົດຟື້ນ ແລະ ເຮັດສຳເລັດຕາມທິດທາງແຜນການທີ່ວາງໄວ້.

Off

Comments are closed.