15th Mar2021

ມອບໃບຢັ້ງຢືນຫນ່ວຍພັກປອດໃສ ເຂັ້ມແຂງ ຫນັກແໜ້ນ ໃຫ້ກົມກອງອ້ອມຂ້າງກະຊວງ

by somchan

ກະຊວງ ປກສ ໄດ້ຈັດກອງປະຊຸມສະຫຼຸບ ຕີລາຄາການກໍ່ສ້າງ ແລະ ມອບໃບຢັ້ງຢືນຫນ່ວຍພັກປອດໃສ ເຂັ້ມແຂງ ຫນັກແໜ້ນ ປະຈໍາປີ 2020. ໃນວັນທີ່ 12 ມີນານີ້ ໂດຍການເປັນປະທານຂອງ ພົຕ ວັນທອງ ກອງມະນີ ກໍາມະການສູນກາງພັກ ຮອງເລຂາຄະນະພັກກະຊວງ ຫົວຫນ້າກົມໃຫຍ່ການເມືອງ ກະຊວງປອງກັນຄວາມສະຫົງບ, ມີຄະນະພັກກົມໃຫຍ, ກົມ ແລະ ພະນັກງານຫຼັກແຫຼ່ງກົມກອງອ້ອມຂ້າງກະຊວງເຂົ້າຮ່ວມ.

ພັອ ຫຸມພັນ ຜິວເຂັມພອນ ຫົວຫນ້າກົມພັກ ກົມໃຫຍ່ການເມືອງປ້ອງກັນຄວາມສະຫົງບໄດ້ ສະຫຼຸບຕີລາຄາການກໍ່ສ້າງຫນ່ວຍພັກປອດໃສ, ເຂັ້ມເເຂງ, ຫນັກແໜ້ນ ປະຈໍາປີ 2020 ແລະ ທິດທາງແຜນການປີ 2021. ໃນໄລຍະຜ່ານມາ ຄະນະພັກ-ຄະນະບັນຊາແຕ່ລະຂັ້ນໄດ້ເອົາໃຈໃສ່ກໍ່ສ້າງຫນ່ວຍພັກປອດໃສ, ເຂັ້ມແຂງ, ໜັກແໜ້ນ ຕາມ 5 ເນື້ອໃນ ທີ່ສູນກາງພັກວາງອອກເປັນພື້ນຖານ, ຖືເອົາການສຶກສາອົບຮົມການເມືອງ-ນໍາພາແນວຄິດເປັນກົກ, ເພີ່ມທະວີ ການປັບປຸງແຜນນໍາພາ, ວິທີ ເຮັດວຽກຂອງພັກໃຫ້ມີຄວາມເຂັ້ມງວດ ແລະ ສັກສິດ; ສະມາຊິກພັກ, ໃນກໍາລັງປ້ອງກັນຄວາມສະຫງົບລ້ວນເເລ້ວແຕ່ໄດ້ເຂົ້າຮ່ວມ ແລະ ດໍາເນີນການສໍາຫຼວດກວດກາ, ຈັດແບ່ງປະເພດ, ປະຕິບັດຫຼັກການ ຕໍານິຕິຊົມຕົນເອງ, ຕິຊົມເຊິ່ງກັນ ແລະ ກັນ ບົນພື້ນຖານຄວາມສາມັກຄີ, ຊ່ວຍເຫຼືອຫມູ່ຄະນະປຽບເຫມືອນຊ່ວຍເຫຼືອຕົນເອງ. ຄະນະພັກແຕ່ລະຂັ້ນ ສ່ວນຫຼາຍໄດ້ປະຕິບັດຫຼັກການລວມສູນປະຊາທິປະໄຕ , ນໍາພາເປັນຫມູ່ຄະນະ , ບຸກຄົນຮັບຜິດຊອບ, ເຮັດວຽກມີແຜນການ, ແຜນງານ, ໂຄງການ, ມີການຕິດຕາມກວດກາ, ຊຸກຍູ້ການຈັດຕັ້ງປະຕິບັດຕົວຈິງ, ປະຕິບັດລະບອບຮ່ວມຊິວິດການເມືອງພາຍໃນພັກ ແລະ ສະຫຼຸບລາຍງານໃຫ້ຂັ້ນເທິງເປັນປົກກະຕິ, ຮັກສາໄດ້ຄວາມສາມັກຄີພາຍໃນຄະນະພັກ, ຜ່ານການຕີລາຄາແບ່ງປະເພດສະມາຊິກພັກ ຕີລາຄາແບ່ງປະເພດຫນ່ວຍພັກປອດໃສ, ເຂັ້ມແຂງ, ຫນັກແຫນ້ນ ໄດ້ 186 ໜ່ວຍ, ທຽບໃສ່ປີ 2019 ຫນ່ວຍພັກປອດໃສ, ເຂັ້ມແຂງ, ຫນັກແໜ້ນ ເພີ່ມຂຶ້ນ 3 ຫນ່ວຍ.

ພ້ອມດຽວກັນນີ້ ກໍໄດ້ມອບໃບຢັ້ງຢືນຫນ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ກຽດມອບໂດຍ ພົຕ ວັນທອງ ກອງມະນີ ກໍາມະການສູນກາງພັກ ຮອງເລຂາຄະນະພັກກະຊວງ ຫົວຫນ້າກົມໃຫຍ່ການເມືອງປ້ອງກັນຄວາມສະຫົງບ.

ໂອກາດດັ່ງກ່າວ ທ່ານກໍໄດ້ສະເເດງຄວາມຍ້ອງຍໍຊົມເຊີຍ ແລະ ເນັ້ນຫນັກໃຫ້ຄະນະພັກ- ຄະນະບັນຊາແຕ່ລະຂັ້ນຕ້ອງປຸກລະດົມຂົນຂວາຍ ມະຫາຊົນເຂົ້າຮ່ວມວຽກງານ ປະຕິບັດ 4 ຄາດຫມາຍ, 4 ບຸກທະລຸຕິດພັນກັບຂະບວນການວຽກງານ 3 ສ້າງ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນຄັ້ງທີ V ຂອງອົງຄະນະພັກກະຊວງວາງອອກ ເຂົ້າສູ່ຊີວິດຕົວຈິງໃນນັ້ນຖືເອົາການກໍ່ສ້າງປັບປຸງຮາກຖານພັກ, ສະມາຊິກພັກ ແລະ ກົມກອງວິຊາສະເພາະໃຫ້ມີຄວາມປອດໃສ , ເຂັ້ມແຂງ, ໜັກແຫນ້ນ, ຕ້ອງຍົກສູງບົດບາດຂອງຕົນເພື່ອເຊື່ອມຊຶມບັນດາທັດສະນະຂອງພັກ, ວຽກງານປ້ອງກັນຊາດ – ປ້ອງກັນຄວາມສະຫງົບ ວຽກງານການເມືອງ, ເສດຖະກິດ, ວັດທະນະທໍາສັງຄົມ ແລະ ແນວທາງການຕ່າງປະເທດ ພ້ອມກັນຈັດຕັ້ງປະຕິບັດໃຫ້ຖືກຕ້ອງກັບສະພາບ, ເງື່ອນໄຂຕົວຈິງຂອງແຕ່ລະຮາກຖານ, ກົມກອງຂອງຕົນຢ່າງມີຫົວຄິດປະດິດສ້າງ, ຕ້ອງເພີ່ມທະວີການນໍາພາຂອງພັກໃຫ້ເຂັ້ມແຂງກວ່າເກົ່າ ໂດຍເເມ່ນບັນດາສະຫາຍຄະນະພັກຕ້ອງເປັນຫຼັກແຫຼ່ງນໍາພາ, ຄະນະພັກແຕ່ລະຂັ້ນຕ້ອງມີຄວາມສາມັກຄີເປັນເອກະພາບຢ່າງຫນັກແຫນ້ນໃນການເຄື່ອນໄຫວຊີ້ນໍາ-ນໍາພາ ປະຕິບັດ ຫຼັກການລວມສູນປະຊາທິປະໄຕຢ່າງເຂັ້ມງວດ , ຄະນະພັກຕ້ອງເປັນເເບບຢ່າງນໍາຫນ້າພາທາງໃຫ້ແກ່ສະມາຊິກພັກ ແລະ ມະຫາຊົນຢ່າງແທ້ຈິງ.

 

Off

Comments are closed.