16th Mar2021

ສາຍຮູບເງົາຮອບປະຖົມມະລຶກເທດສະການຮູບເງົາດີເດັ່ນລາວ-ຈີນ

by somchan

ກົມຮູບເງົາ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ຮ່ວມກັບ ວິທະຍຸສາກົນແຫ່ງປະເທດຈີນ (CRI) ໄດ້ສາຍຮູບເງົາຮອບປະຖົມມະລຶກເທດສະການຮູບເງົາດີເດັ່ນລາວ-ຈີນ ຂຶ້ນໃນວັນທີ 15 ມີນານີ້ ທີ່ຫໍວັດທະນະທໍາແຫ່ງຊາດ ໂດຍໃຫ້ກຽດເຂົ້າຮ່ວມຂອງ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີ ກະຊວງ ຖວທ, ມີຫົວໜ້າວິທະຍຸສາກົນແຫ່ງປະເທດຈີນ (CRI) ປະຈໍາລາວ, ມີບັນດານັກສ້າງຮູບເງົາ, ສິນລະປິນ, ນັກສະແດງ ແລະ ສື່ມວນຊົນ,ພະນັກງານທີ່ມາຈາກບັນດາກະຊວງເຂົ້າຮ່ວມ.

ທ່ານ ຄໍາເພົ້າ ວັນນະວົງ ຫົວຫນ້າກົມຮູບເງົາ ກະຊວງ ຖວທ ກ່າວວ່າ: ສປປ ລາວ ແລະ ສປ ຈີນ ກໍາລັງພ້ອມກັນກະກຽມ ແລະ ຈັດຕັ້ງກິດຈະກໍາຕ່າງໆ ເພື່ອສະເຫຼີມສະຫຼອງສາຍພົວພັນການທູດລະຫວ່າງ ສອງປະເທດ ຄົບຮອບ 60 ປີ, ງານເທດສະການສາຍຮູບເງົາດີເດັ່ນລາວ-ຈີນ ປະຈໍາປີ 2021 ໃນຄັ້ງນີ້ ກໍ່ເປັນກິດຈະກໍາຫນຶ່ງທີ່ທັງສອງປະເທດລາວ-ຈີນ, ຈີນ-ລາວ ໄດ້ຮ່ວມກັນຈັດຂຶ້ນເພື່ອ ສະເຫຼີມສະຫຼອງວັນແຫ່ງປະຫວັດສາດຂອງສາຍພົວພັນການທູດລະຫວ່າງສອງຊາດທີ່ໄດ້ມີມູນເຊື້ອ ການພົວພັນມິດຕະພາບມາຍາວນານ ທີ່ໄດ້ຮັບການປົກປັກຮັກສາ ເເລະ ສົ່ງເສີມຈາກສອງພັກ – ສອງລັດ ແລະ ປະຊາຊົນສອງຊາດຕະຫຼອດມາ. ງານເທດສະການສາຍຮູບເງົາດີເດັ່ນລາວ – ຈີນ ປີ 2021 ນີ້ຈະກາຍເປັນເວທີແຫ່ງການສົ່ງເສີມການພົວພັນ ແລະ ແລກປ່ຽນວັດທະນະທໍາລະຫວ່າງສອງຊາດ ໂດຍຜ່ານການຊົມຮູບເງົາຈີນທີ່ພາກເປັນພາສາລາວ. ຮູບເງົາທີ່ນຳມາສາຍປະກອບມີ 4 ເລື່ອງຄື: ນາທີຊີວິດ, ໜຸ່ມຈີນປີນຕາມຝັນ, ຈອມຍຸດ 7 ຂຸນເຂົາ, 40 ປີຂອງພວກເຮົາ ແລະ ຮູບເງົາດີເດັ່ນຂອງລາວອີກຈຳນວນໜຶ່ງ ແລະ ຍັງຈະມີການສາຍເຄື່ອນທີ່ໄປຍັງ 8 ແຂວງ ຂອງ ສປປ ລາວ ໃນລະຫວ່າງວັນທີ 15 ມີນາ ເຖິງ 6 ເມສາ 2021.

Off

Comments are closed.