26th Mar2021

ການດຳເນີນກອງປະຊຸມຄັ້ງປະຖົມມະລຶກຂອງສະພາແຫ່ງຊຸດທີ 9 ໃນວັນທີ 22 ມີນາ

by somchan

ການດຳເນີນກອງປະຊຸມຄັ້ງປະຖົມມະລຶກຂອງສະພາແຫ່ງຊຸດທີ 9 ໃນວັນທີ 22 ມີນາ 2021 ນີ້ ທີ່ຫໍສະພາແຫ່ງ ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ສະມາຊິກສະພາແຫ່ງຊາດແຕ່ລະເຂດເລືອກຕັ້ງໄດ້ພິຈາລະນາ ແລະ ປະກອບຄຳເຫັນ ຕໍ່ບົດລາຍງານກ່ຽວກັບການຈັດຕັ້ງປະຕິບັດ

 

 

ແຜນການເຄື່ອນໄຫວວຽກງານ 5 ປີ ນັບແຕ່ 2016-2020 ແລະ ທິດທາງແຜນການເຄື່ອນໄຫວວຽກງານ 5 ປີ ນັບແຕ່ 2021-2025 ຂອງອົງການໄອຍະການປະຊາຊົນສູງສຸດ ທີ່ສະເໜີ ໂດຍທານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ, ເຊິ່ງທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ທີ່ສະເໜີໂດຍ ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ, ເຊິ່ງໃນນີ້ ທ່ານ ໄຊຊະນະ ໂຄດພູທອນ ໄດ້ຍົກໃຫ້ເຫັນໄລຍະ 5 ປີ ຜ່ານມາ ວຽກງານໄອຍະການປະຊາຊົນ ແລະ ວຽກງານໄອຍະການທະຫານ ແຕ່ສູນກາງຮອດທ້ອງຖິ່ນ ໄດ້ມີການພັດທະນາ ແລະ ຫັນປ່ຽນໃນລະດັບໜຶ່ງ, ອັນພົ້ນເດັ່ນແມ່ນການປັບປຸງບູລະນະ ກົງຈັກການຈັດຕັ້ງ ການພັດທະນາຖັນແຖວບຸກຄະລາກອນ, ການພັດທະນາພື້ນຖານໂຄງລ່າງ ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ແລະ ສຳເລັດຕາມ 6 ຄາດໝາຍ 5 ແຜນງານ ແລະ 21 ໂຄງການທີ່ວາງໄວ້, ໄດ້ຊົນປະຕິບັດບັນລຸເປັນສ່ວນຫຼາຍ. ນອກນີ້ຍັງໄດ້ເອົາໃຈໃສ່ຕິດຕາມກວດກາ ການປະຕິບັດກົດໝາຍຂອງອົງການສືບສວນ-ສວນສອບສວນ ໂດຍສະເພາະການນຳໃຊ້ວິທີການສືບສວນ-ສອບສວນ ການນຳໃຊ້ມາດຕະການສະກັດກັ້ນ ດ້ວຍກົນໄກການປະສານສົມສົບ ແຕ່ຫົວທີ່ຢ່າງເປັນລະບົບ. ຜ່ານການຕິດຕາມກວດກາເຫັນໄດ້ວ່າ: ການປະຕິບັດກົດໝາຍ ແລະ ລະບຽບຫຼັກການດີຂຶ້ນ ຈາກຄຳສັ່ງ, ຄຳແນະນຳຕ່າງໆ. ກ່ຽວກັບການສືບສວນ-ສອບສວນຄະດີອາຍາ ໄດ້ຮັບການຈັດຕັ້ງປະຕິບັດຖືກຕ້ອງຕາມກົດໝາຍ ແລະ ລະບຽບຫຼັກການ. ສຳນວນຄະດີອາຍາທີ່ໄດ້ຮັບຈາກອົງການສືບສວນ-ສອບສວນ 49,181 ເລື່ອງ, ໄດ້ຮັບການແກ້ໄຂກວມເຖິງ 98% ລື່ນຄາດໝາຍທີ່ວາງໄວ້ 95%. ໃນນັ້ນກວມສ່ວນຫຼາຍ ແມ່ນຄຳຖະແຫຼ່ງ ແລະ ສັ່ງຟ້ອງໃຫ້ສານພິຈາລະນາກວມເຖິງ 63 %, ສົ່ງໃຫ້ດຳເນີນການສືບສວນ-ສອບສວນຄືນໃໝ່ 29 ສ່ວນຮ້ອຍ ແລະ ວຽກງານອື່ນໆ.

ສຽ: ທ່ານໄຊຊະນະ 24-3-2021

ທ່ານນາງ ວຽງທອງ ສີພັນດອນ ປະທານສານປະຊາຊົນສູງສຸດ ໄດ້ຍົກໃຫ້ເຫັນຜົນງານທີ່ພົ້ນເດັ່ນໃນ 5 ປີ ຜ່ານມາ ໂດຍສະເພາະແມ່ນການເອົາໃຈໃສ່ ສຶກສາອົບຮົມການເມືອງແນວຄິດ ຕິດພັນກັບການຍົກລະດັບຄວາມຮູ້ ຄວາມສາມາດທາງດ້ານທິດສະດີ ແລະ ວິຊາສະເພາະ ໃຫ້ແກ່ຜູ້ພິພາກສາ  ພະນັກງານບຸກຄະລາກອນສານ, ສ້າງ ແລະ ປັບປຸງກົດໝາຍ ການຂະຫຍາຍກົງຈັດການຈັດຕັ້ງ, ການປັບປຸງແບບແຜນວິທີເຮັດວຽກ, ພັດທະນາພື້ນຖານໂຄງລ່າງ ແລະ ວຽກງານອື່ນ. ແມ່ນມີຜົນສຳເລັດຫຼາຍດ້ານ ສະແດງອອກ ເອົາໃຈໃສ່ຕັດສິນ ແລະ ພິພາກສາຄະດີດ້ວຍຄວາມຮັບຜິດຊອບສູງ 5 ປີຜ່ານມາ ຄະດີເຂົ້າສານປະຊາຊົນ ແລະ ສານທະຫານແຕ່ສູນກາງຮອດທ້ອງຖິ່ນ ຈຳນວນ 44,521 ເລື່ອງ, ຄ້າງມາ 1,106 ເລື່ອງ ລວມ 46,127 ເລື່ອງ, ແກ້ໄຂໄດ້ 43,559 ເລື່ອງເທົ່າກັບ 94 % ທຽບໃສ່ 5 ປີ ຜ່ານມາ ເຫັນວ່າຄະດີ ເພີ່ມຂຶ້ນ.

ສຽງ: ທ່ານ ນ ວຽງທອງ

ພາຍຫຼັງອົງການໄອຍະການປະຊາຊົນສູງສຸດ, ສານປະຊາຊົນສູງສຸດ ສຳເລັດການລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ 5 ປີ 2016-2020 ແລະ ທິດທາງແຜນການເຄື່ອນໄຫວ 5 ປີ 2021-2025 ຂອງວຽກງານໄອຍະການປະຊາຊົນສູງສຸດ ແລະ ສານປະຊາຊົນສູງສຸດ. ແລ້ວ ທ່ານ ຄຳແພງ ວິລະພັນ ຕາງໜ້າຄະນະປະຈຳສະພາແຫ່ງຊາດ, ປະທານກຳມະທິການຍຸດຕິທຳ ໄດ້ປະກອບຄຳເຫັນຕໍ່ບົດລາຍງານຂອງໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ໂດຍຊີ້ໃຫ້ເຫັນວ່າ ຜ່ານການເຄື່ອນໄຫວວຽກງານຂອງສອງອົງການໃນ 5 ປີ ຜ່ານມາ ເຖິງວ່າຍາດໄດ້ຜົນງານທີ່ພົ້ນເດັນຫຼາຍດ້ານ ແຕ່ຄະນະປະຈຳສະພາແຫ່ງຊາດ ເຫັນບາງບັນຫາຄວນເອົາໃຈໃສ່ສືບຕໍ່ເປັນຕົ້ນ: ການຕິດຕາມ ການກວດກາ ການເຄົາລົບລັດຖະທຳມະນູນ, ການປະຕິບັດກົດໝາຍ ແລະ ການອອກນິຕິກຳ ໃຕ້ກົດໝາຍຂອງບັນດາກະຊວງ, ອົງການປົກຄອງທ້ອງຖິ່ນ ພົນລະເມືອງ ຍັງບໍ່ທັນເປັນປົກກະຕິ, ຕໍ່ເນື່ອງ, ສະຕິເຄົາລົບກົດໝາຍ ຂອງພະນັກງານ, ທະຫານຕຳຫຼວດ ແລະ ປະຊາຊົນຈຳນວນໜຶ່ງ ບໍ່ທັນສູງ ລວມທັງການລະເມີດກົດໝາຍ ໃນບັນດາອົງການ ທີ່ມີສິດອຳນາດ ໃນການດຳເນີນຄາດຄະດີ, ຂະບວນການຍຸດຕິທຳ ແລະ ອື່ນໆ.

ສຽງ: ທ່ານ ຄຳແພງ

ຈາກນັ້ນສະມາຊິກສະພາຈາກເຂດເລືອກຕັ້ງຕ່າງໆ ໄດ້ສຸມໃສ່ປະກອບຄຳເຫັນຕໍ່ບົດລາຍງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ດ້ວຍຄວາມຮັບຊິບຜິດສູງ. ເພື່ອຮັບປະກັນໃຫ້ບົດລາຍງານຂອງສອງອົງການນີ້ ສາມາດຮັບຮອງໄດ້ໃນກອງປະຊຸມໃນຄັ້ງນີ້.

ທ່ານ ແກ້ວລັດຕະນະ ສີຫາວົງ ສະມາຊິກສະພາແຫ່ງຊາດເຂດເລືອກຕັ້ງ ທີ 15 ແຂວງຈຳປາສັກ ໄດ້ປະກອບກ່ຽວກັບການຍົກສູງຄວາມສາມາດຂອງໄອຍະການປະຊາຊົນສູງສຸດ ໃນການຕິດຕາມກວດກາການປະຕິບັດກົດໝາຍຂອງອົງການພາກລັດ ເພື່ອກຳນົດກົນໄກປະສານງານ ຈັດຕັ້ງປະຕິບັດວຽກງານ ການຕິດຕາມກວດກາຢ່າງເໝາະສົມ ແນ່ໃສ່ເຮັດໃຫ້ການເຄື່ອນໄຫວວຽກງານມີປະສິດທິພາບດີຂຶ້ນກວ່າເກົ່າ.

ສຽງ: ທ່ານ ແກ້ວລັດຕະນະ

ພ້ອມນີ້ ຫົວໜ້າອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ໄດ້ໃຫ້ຄວາມກະຈ່າງແຈ້ງ ຕໍ່ຄຳເຫັນຂອງສະມາຊິກສະພາແຫ່ງຊາດ ໃນຂົງເຂດວຽກງານດັ່ງກ່າວ ພາຍຫຼັງສຳເລັດແລ້ວ ປະທານກອງປະຊຸມ ໄດ້ສະຫຼຸບສັງລວມການປະກອບຄຳເຫັນ ຂອງສະມາຊິກສະພາແຫ່ງຊາດ ຕໍ່ວຽກງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງຸສຸດ.  ຈາກນັ້ນ, ຫົວໜ້າກອງເລຂານຸການກອງປະຊຸມ ໄດ້ຜ່ານຮ່າງມະຕິກອງປະຊຸມສະພາແຫ່ງຊາດ 2 ສະບັບ ຄືຮ່າງມະຕິກອງປະຊຸມສະພາແຫ່ງຊາດວ່າດ້ວຍ ການຮັບຮອງເອົາບົດລາຍງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ກ່ຽວກັບການເຄື່ອນໄຫວວຽກງານ 5 ປີ 2016-2020 ແລະ ທິດທາງແຜນການເຄື່ອນໄຫວ ວຽກງານ 5 ປີ 2021-2025 ພາຍຫຼັງສະມາຊິກສະພາແຫ່ງຊາດ ມີຄຳເຫັນ ຕໍ່ສອງມະຕິສຳເລັດແລ້ວ, ປະທານກອງປະຊຸມໄດ້ສະເໜີໃຫ້ສະມາຊິກສະພາແຫ່ງຊາດ ລົງຄະແນນສຽງຮັບຮອງມະຕິທັງສອງສະບັບ ດ້ວຍຄະແນມສຽງເຫັນດີ ເປັນສ່ວນຫຼາຍ.

Off

Comments are closed.