26th Mar2021

ການດຳເນີນກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດຊຸດທີ 9 ໃນວັນທີ 25 ມີນາ

by somchan

ການດຳເນີນກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດຊຸດທີ 9 ໃນວັນທີ 25 ມີນາ 2021 ນີ້ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ. ສະມາຊິກສະພາແຫ່ງຊາດ ເຂດເລືອກຕັ້ງ ຕ່າງໆ ໄດ້ສືບຕໍ່ປະກອບຄຳເຫັນໃສ່ບົດລາຍງານການຈັດຕັ້ງປະຕິບັດການເຄື່ອນໄຫວວຽກງານ 5 ປີ ນັບແຕ່ ປີ 2016-2020 ແລະ ທິດທາງແຜນການເຄື່ອນໄຫວວຽກງານ 5 ປີ ນັບແຕ່ ປີ 2021-2025 ຂອງອົງການກວດສອບແຫ່ງລັດ, ສະມາຊິກສະພາແຫ່ງຊາດໄດ້ຜັດປ່ຽນກັນປະກອບຄຳເຫັນຢ່າງກົງໄປກົງມາ  ແລະ ເປັນຂະບວນຟົດຟື້ນ ແລະ ກວມເອົາຫຼາຍບັນຫາ ວຽກງານຂອງອົງການກວດສອບແຫ່ງລັດ ເປັນຕົ້ນ ການເອົາໃຈໃສ່ແກ້ໄຂຜົນການກວດສອບໃຫ້ດີຂຶ້ນກວ່າເກົ່າ, ການສ້າງບຸກຄະລາກອນ ດ້ານການກວດສອບຈັນຍາບັນ ຈັນຍາທຳ ເພື່ອເຮັດໃຫ້ການປະຕິບັດວຽກງານກວດສອບແຫ່ງລັດໄດ້ຮັບຜົນດີ ແລະ ອື່ນໆ.

ທ່ານ ສີຄຳ ບຸນມີໄຊ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ແຂວງຫົວພັນ ປະກອບຄຳເຫັນສະເໜີໃຫ້ພາກສ່ວນທີ່ກ່ຽວຂ້ອງ ເອົາໃຈໃສ່ເຮັດວຽກງານໃຫ້ດີຂຶ້ນກວ່າເກົ່າ  ເພາະຜ່ານມາ ເຫັນວ່າ ຍັງບໍ່ທັນໄດ້ດີ ກວດພົບເຫັນຜູ້ກະທຳຜິດເປັນຈຳນວນຫຼາຍ ແຕ່ແກ້ໄຂໄດ້ໜ້ອຍ ມີບາງກໍລະນີກວດພົບເຫັນຜູ້ກະທຳຜິດແລ້ວ ແຕ່ສຳພັດຍ້າຍຜູ້ກ່ຽວໄປເຮັດວຽກບ່ອນໃຫມ່ ໂດຍທີ່ບໍ່ມີມາດຕະການທີ່ເດັດຂາດ.

ສຽງ ສີຄຳ

ທ່ານ ຈັດຕະວາ ແກ້ວຄຳເພັດ ສະມາຊິສະພາແຫ່ງຊາດ ເຂດເລືອກຕັ້ງ ທີ 7 ແຂວງ ໄຊຍະບູລີ ໄດ້ມີຄຳເຫັນ ໃສ່ພາກທີ່ໜຶ່ງຂອງບົດລາຍງານການຈັດຕັ້ງປະຕິບັດ ແຜນການເຄື່ອນໄຫວວຽກງານ 5 ປີ ຜ່ານ ເຫັນໄດ້ວ່າ ຫຼາຍວຽກງານ ມີການປັບປຸງດີຂຶ້ນ ແລະ ມີວຽກງານທີ່ຕ້ອງໄດ້ສືບຕໍ່ເອົາໃຈໃສ່ແກ້ໄຂ ປັບປຸງໃຫ້ດີຂຶ້ນ.

ສຽງ ທ່ານ ຈັດຕະວາ

ພາຍຫຼັງສະມາຊິກສະພາແຫ່ງຊາດປະກອບເຫັນສຳເລັດ, ຕາງໜ້າອົງການກວດສອບແຫ່ງລັດ ໄດ້ອະທິບາຍຊີ້ແຈ້ງ ຕໍ່ການປະກອບຄຳເຫັນ ຫຼື ຄຳສະເໜີຂອງສະມາຊິກສະພາແຫ່ງຊາດ, ຈາກນັ້ນ ທ່ານໄຊສົມພອນ ພົມວິຫານ ປະທານສະພາແຫ່ງຊາດ ປະທານກອງປະຊຸມ ໄດ້ມີຄຳເຫັນສະຫຼຸບສັງລວມການປະກອບຄຳເຫັນຂອງສະມາຊິກສະພາແຫ່ງຊາດ ຕໍ່ວຽກງານອົງການກວດສອບແຫ່ງລັດ.

ພ້ອມນີ້ ທ່ານ ຄຳພັນ ພົມມະທັດ ປະທານອົງການກວດກາແຫ່ງລັດ ໄດ້ຜ່ານບົດລາຍງານການຈັດຕັ້ງປະຕິບັດການເຄື່ອນໄຫວວຽກງານ 5 ປີ ແຕ່ 20216-2020 ແລະ ທິດທາງແຜນການ ເຄື່ອນໄຫວວຽກງານ 5 ປີ ແຕ່ 2021-2025 ຂອງອົງການກວດກາແຫ່ງລັດ, ທ່ານໄດ້ຍົກໃຫ້ເຫັນຜົນງານທີ່ພົ້ນເດັ່ນຫຼາຍດ້ານ ໃນ 5 ປີ ຜ່ານມາ ອົງການກວດກາແຫ່ງລັດ ໄດ້ກວດກາເປົ້າໝາຍໄດ້ 4,129 ເປົ້າໝາຍ, ໄດ້ເກັບກຳ ແລະ ໄລ່ລຽງມູນຄ່າການລົງທຶນລັດຈຳນວນ 4,601 ໂຄງການ, ນອກນີ້ ກວດກາສຳເລັດ 692 ໂຄງການ, ພົບເຫັນຜົນເສຍຫາຍ 5,680 ຕື້ກວ່າກີບ, 31 ລ້ານກວ່າໂດລາ ແລະ 36 ລ້ານບາດ, ກວດກາຈັດຕັ້ງປະຕິບັດຄຳສັ່ງເລກທີ 15 ຂອງນາຍົກລັດຖະມົນຕີ ພົບເຫັນຜູ້ລະເມີດກົດໝາຍ 1,109 ຄົນ, ໄດ້ຮັບຄຳຮ້ອງ ຄຳສະເໜີ 4,817 ສະບັບ, ແກ້ໄຂແລ້ວ 120 ສະບັບ.

ພ້ອມນີ້ທ່ານຍັງໄດ້ຍົກໃຫ້ເຫັນຈຸດອ່ອນຂໍ້ຄົງຄ້າງ, ກໍ່ຄືສິ່ງທ້າທາຍທີ່ອົງການກວດກາແຫ່ງລັດ ຈະຕ້ອງໄດ້ສືບຕໍ່ປັບປຸງແກ້ໄຂ ລວມເຖິງທິດທາງແຜນການເຄື່ອນໄຫວວຽກງານ 5 ປີ ຕື່ມອີກ.

ສຽງ ທ່ານຄຳພັນ

ຫຼັງຈາກນັ້ນ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ ຕາງໜ້າຄະນະປະຈຳສະພາແຫ່ງຊາດ ປະທານກຳມະທິການຍຸທິຕິທຳ ໄດ້ປະກອບຄຳເຫັນ ຂອງຄະນະປະຈຳສະພາແຫ່ງຊາດ ຕໍ່ບົດລາຍງານອົງການກວດກາແຫ່ງລັດ. ໃນ 5 ປີ ຜ່ານມາ ເຖິງແມ່ນວ່າຈະສ້າງຜົນງານອັນພົ້ນເດັນຫຼາຍດ້ານ, ແຕ່ຄະນະປະຈຳສະພາແຫ່ງຊາດ ເຫັນວ່າມີບາງບັນຫາທີ່ຈະຕ້ອງໄດ້ສືບຕໍ່ປັບປຸງແກ້ໄຂ ເປັນຕົ້ນການຜັນຂະຫຍາຍແຜນຍຸດທະສາດສະກັດກັ້ນ ແລະ ຕ້ານການສໍ້ລາດບັງຫຼວງ ຍັງຊັກຊ້າ, ການສຶກສາອົບຮົມ, ຜົນຮ້າຍຂອງການສໍ້ລາດບັງຫຼວງຕໍ່ເປົ້າໝາຍຕ່າງໆ ໃນທົ່ວສັງຄົມຍັງບໍ່ເລິກເຊິ່ງ ແລະ ບັນຫາ ອື່ນໆ.

ພົນໂທ ສຸວອນ

ພາຍຫຼັງຕາງໜ້າຄະນະປະຈຳສະພາແຫ່ງຊາດ ໄດ້ມີຄຳເຫັນຕໍ່ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 5 ປີ ແລະ ທິດທາງແຜນການເຄື່ອນໄຫວ ວຽກງານ 5 ປີ ຂອງອົງການກວດກາແຫ່ງລັດ ປະທານກອງປະຊຸມ ໄດ້ມີຄຳເຫັນເຈາະຈິ້ມ ແລະ ໃຫ້ທິດຊີ້ນຳໃນການຄົ້ນຄວ້າ ປະກອບຄຳເຫັນຂອງສະມາຊິກສະພາແຫ່ງຊາດ ຕໍ່ບົດລາຍງານທັງສອງພາກ ສອງອົງການກວດກາແຫ່ງລັດ. ໂດຍເລີ່ມຈາກນາງ ຫົງຄຳ ໄຊຍະຄົມ ສະມາຊິສະພາແຫ່ງຊາດ ຈາກເຂດເລືອກທີ 13 ແຂວງສະຫວັນນະເຂດ. ມີຄຳເຫັນວ່າ: ເພື່ອເຮັດໃຫ້ວຽກງານກວດກາແຫ່ງລັດ ມີຄວາມໜັກແໜ້ນເຂັ້ມແຂງ ແລະ ເຮັດວຽກງານດ້ວຍຄວາມບໍລິສຸດສັດຊື່ ຕ້ອງໄດ້ເອົາໃຈໃສ່ປັບປຸງການຈັດຕັ້ງ  ແລະ ມີນິຕິກຳທີ່ເປັນພື້ນຖານ ໃນການເຄື່ອນໄຫວວຽກງານ ວິຊາສະເພາະ

ສຽງ: ນາງຫົງຄຳ

ຫຼັງຈາກສະມາຊິກສະພາແຫ່ງຊາດ ໄດ້ມີຄຳເຫັນໃຫ້ບົດລາຍງານການຈັດຕັ້ງປະຕິບັດການເຄື່ອນໄຫວວຽກງານ 5 ປີ ແລະ ທິດທາງແຜນການການເຄື່ອນໄຫວ 5 ປີ ຂອງອົງການກວດສອບແຫ່ງລັດ ແລະ ອົງການກວດກາແຫ່ງລັດສຳເລັດ ປະທານກອງປະຊຸມໄດ້ສະຫຼຸບສັງລວມ ການປະກອບຄຳເຫັນຂອງສະມາຊິກສະພາແຫ່ງຊາດ ຕໍ່ວຽກງານກວດສອບແຫ່ງລັດ, ວຽກງານອົງການກວດກາແຫ່ງລັດ.

ພ້ອມນີ້ ຫົວໜ້າກອງເລຂານຸການກອງປະຊຸມໄດ້ຜ່ານຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 5 ປີ ຜ່ານມາ ແລະ ທິດທາງແຜນການເຄື່ອນໄຫວ 5 ປີ ຕໍ່ໜ້າຂອງການກວດສອບແຫ່ງລັດ ແລະ ອົງການກວດກາແຫ່ງລັດ ຈາກນັ້ນປະທານກອງປະຊຸມ ໄດ້ສະເໜີໃຫ້ສະມາຊິກສະພາແຫ່ງຊາດ ລົງຄະແນນສຽງຮັບຮອງເອົາສອງມະຕິ ດ້ວຍຄະແນນສຽງເຫັນດີເປັນສ່ວນຫຼາຍ.

 

 

Off

Comments are closed.