29th Mar2021

ມອບ-ຮັບລະບົບໄຟເຍືອງທາງ 7 ເສັ້ນ ແລະ ລະບົບນ້ໍາພຸສວນປະຕູໄຊ

by somchan

ພິທີມອບ-ຮັບລະບົບໄຟເຍື່ອງທາງ 7 ເສັ້ນ ແລະ ລະບົບນໍ້າພຸສວນປະຕູໄຊ ພາຍໃຕ້ໂຄງການ ແສງສະຫວ່າງໃນເຂດເທດສະບານໃຈກາງຕົວເມືອງ ນະຄອນຫຼວງວຽງຈັນ ດ້ວຍທຶນຊ່ວຍເຫຼືອລ້າຈາກ ລັດຖະບານ ສປ ຈີນ ຈັດຂຶ້ນໃນວັນທີ 26 ມີນາ 2021 ນີ້ ທີ່ສວນສາທາລະນະປະຕູໄຊ ໂດຍການກ່າວມອບຂອງ ທ່ານ ຈຽງ ຈ້າຍ ຕົງ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈໍາລາວ ກ່າວຮັບໂດຍ ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມດ້ວຍການນໍາຂັ້ນສູງຝ່າຍລາວ ແລະ ຝ່າຍຈີນ ເຂົ້າຮ່ວມ.
ທ່ານ ຊົງເລົ່າ ຢົງນູ ຫົວຫນ້າຄະນະຮັບຜິດຊອບໂຄງການຝ່າຍລ່າວ ໄດ້ລາຍງານໃຫ້ຮູ້ວ່າ: ໂຄງການຍົກລະດັບລະບົບໄຟຟ້າ ໃນນະຄອນຫລວງວຽງຈັນ ແມ່ນໂຄງການຫນຶ່ງທີ່ນອນຢູ່ໃນກອບສັນຍາ ວ່າດ້ວຍການຮ່ວມມືດ້ານເສດຖະກິດ ແລະ ເຕັກນິກ ລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານແຫ່ງ ສປ ຈີນ ເຊິ່ງໄດ້ເລີ່ມປະຕິບັດແຕ່ວັນທີ 12 ກັນຍາ ເຖິງ ວັນທີ 27 ພະຈິກ ປີ 2020 ໄດ້ສໍາເລັດໂດຍພື້ນຖານດ້ານການກໍ່ສ້າງ-ຕິດຕັ້ງ ແລະ ສາມາດເປີດນໍາໃຊ້ໄດ້ທັນຕາມກໍານົດເວລາທີ່ສອງພັກ, ສອງລັດ ກໍານົດໂຄງການນີ້ ເປັນຂອງຂວັນຈາກລັດຖະບານ ແລະ ປະຊາຊົນຈີນ ມອບໃຫ້ແກ່ລັດຖະບານ ແລະ ປະຊາຊົນລາວ ເພື່ອຂໍ່ານັບຊົມເຊີຍວັນຊາດທີ 2 ທັນວາ ວັນສະຖາປານາ ສປປ ລາວ ຄົບຮອບ 45 ປີ ແລະ ຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ. ໂຄງການດັ່ງກ່າວໄດ້ປັບປຸງ ລະບົບນ້ໍາພຸສວນປະຕູໄຊ ຍົກລະດັບ ແລະ ປັບປຸງລະບົບແສງສະຫວາງໄຟເຍືອງທາງ 7 ເສັ້ນ ຢູ່ໃນເຂດໃຈກາງຕົວເມືອງນະຄອນຫລວງວຽງຈັນ ຄື: ຖະຫນົນລ້ານຊ້າງ, ຖະຫນົນ 23 ສິງຫາ, ຖະຫນົນຫນອງບອນ, ຖະຫນົນໄກສອນພົມວິຫານ, ຖະຫນົນເສດຖາທິລາດ- ແຄມຂອງ, ຖະຫນົນແຄມຂອງ ແລະ ຖະຫນົນເຈົ້າຟ້າງື່ມ. ນອກນີ້ ຍັງໄດ້ຕິດຕັ້ງລະບົບກ້ອງວົງຈອນປິດໃສ່ສວນປະຕູໄຊ ແລະ 7 ເສັ້ນທາງ ຈໍານວນ 22 ຈຸດ ລວມ 40 ຫນ່ວຍ ແລະ ປັບປຸງຫ້ອງຄວບຄຸມ, ຕິດຕັ້ງລະບົບຄວບຄຸມໄຟເຍືອງທາງແບບລວມສູນທີ່ທັນສະໄຫມ ຢູ່ຊັ້ນ 1 ຂອງຫ້ອງການຄຸ້ມຄອງ ແລະ ບໍລິການຕົວເມືອງນະຄອນຫລວງ ວຽງຈັນ.
ໃນໂອກາດນີ້, ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫລວວຽງຈັນ ໄດ້ ກ່າວສະ ແດງຄວາມຂອບໃຈ ຕໍ່ລັດຖະບານຈີນ ທີ່ໃຫ້ການຊ່ວຍເຫລືອໃນຄັ້ງນີ້, ນະຄອນຫລວງວຽງຈັນ ໄດ້ກໍານົດທິດທາງພັດທະນາ ໃຫ້ເປັນນະຄອນທີ່ຫນ້າຢູ່ ແລະ ຍືນຍົງ ຕາມຕົວຊີ້ວັດ 6 ສ, ໃນນັ້ນ ສ ສະຫ່ວາງຖືວ່າແມ່ນ ສ ຫນຶ່ງທີ່ສໍາຄັນ ຕໍ່ການພັດທະນານະຄອນຫລວງ ເຊິ່ງໂຄງການດັ່ງກ່າວ ໄດ້ປະກອບສ່ວນສໍາຄັນເຂົ້າໃນການຈັດຕັ້ງປະຕິບັດທິດທາງແຜນພັດທະນາ ນະຄອນຫລວງວຽງຈັນ ໃນ ໄລຍະໃຫມ່ ນອກຈາກນີ້ຍັງສະແດງເຖິງໄມຕີຈິດມິດຕະພາບ ແລະ ການຮ່ວມມື ລະຫວ່າງສອງພັກ, ສອງລັດ ລາວ-ຈີນ ອີກດ້ວຍ.

Off

Comments are closed.