30th Mar2021

ຫົວໜ້າກອງບັນຊາການ ປ້ອງກັນທີ່ຕັ້ງ ເຄື່ອນໄຫວພົບປະຢ້ຽມຢາມ ປກສ ແຂວງຫົວພັນ

by somchan

ວັນທີ່ 25 ມີນາ 2021 ພົຈວ ໄຊສີ ແກ້ວສະຫງ່າ  ຄະນະພັກກະຊວງ ຫົວໜ້າກອງບັນຊາການ ປ້ອງກັນທີ່ຕັ້ງ ກະຊວງປ້ອງກັນຄວາມສະຫງົບ ພ້ອມຄະນະ ໄດ້ເຄື່ອນໄຫວພົບປະຢ້ຽມຢາມ ແລະ ເຮັດວຽກຢູ່ກອງພັນປ້ອງກັນເຄື່ອນທີ່ ກອງບັນຊາການ ປກສ ແຂວງຫົວພັນ ໃຫ້ກຽດຕ້ອນຮັບໂດຍ ພັທ ສຸກັນລະຍາ ນາມວົງສາ ຫົວໜ້າກອງພັນປ້ອງກັນເຄື່ອນທີ່ ປກສ ແຂວງຫົວພັນພ້ອມດ້ວຍຄະນະ ຕະຫຼອດຮອດພະນັກງານ-ນັກຮົບ ເຂົ້າຮ່ວມ.

ພັທ ບຸນເສີມ ເພັດທອງຄຳ ຮອງກອງພັນປ້ອງກັນເຄື່ອນທີ່ ໄດ້ຜ່ານບົດສະຫຼຸບກ່ຽວກັບການຈັດຕັ້ງປະຕິບັດ ແລະ ເຄື່ອນໄຫວວຽກງານ ວິຊາສະເພາະ ໃນໄລຍະຜ່ານມາ ຄະນະພັກ-ຄະນະນຳກອງພັນປ້ອງກັນເຄ່ືອນທີ່ ໄດ້ເອົາໃຈໃສ່ຊີ້ນຳ-ນຳພາ ດ້ານວຽກງານວິຊາສະເພາະຂອງຕົນ ຢ່າງຕັ້ງໜ້າ ແລະ ເປັນປົກກະຕິ ໂດຍນຳພາກຳລັງລົງປະຈຳການ 11 ຈຸດຕາມການຕົກລົງຂອງກອງບັນຊາການ ປກສ ແຂວງຫົວພັນຄື: ຫ້ອງວ່າການປົກຄອງແຂວງ, ກອງບັນຊາການ ປກສ ແຂວງ, ສະພາປະຊາຊົນ ແຂວງ, ຫ້ອງການຄັງເງິນ ແຂວງ, ຫໍແກ້ວ, ທະນາຄານການຄ້າຕ່າງປະເທດ, ທະນາຄານພັດທະນາລາວ, ທະນາຄານສົ່ງເສີມກະສິກຳ, ທະນາຄານຮ່ວມພັດທະນາ, ທະນາຄານພັດທະນາລາວ, ທະນາຄານຮ່ວມພັດທະນາ JDB ທະນາຄານນະໂຍບາຍ ແລະ ພະແນກຖະແຫຼ່ງຂ່າວ-ວັດທະນະທຳ ແລະ ທ່ອງທ່ຽວແຂວງ ໃຫ້ມີຄວາມສະຫງົບ ມີຄວາມປອດໄພ.

ພົຈວ ໄຊສີ ແກ້ວສະຫງ່າ ໄດ້ໂອລົມ ແລະ ໃຫ້ທິດຊີ້ນຳ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ-ຄະນະນຳກອງພັນປ້ອງກັນເຄື່ອນທີ່-ທີ່ໄດ້ເອົາໃຈໃສ່ຊີ້ນຳ-ນຳພາພະນັກງານ-ນັກຮົບ ຕັ້ງໜ້າເຮັດໜ້າທີ່ວຽກງານວິຊາສະເພາະ ມີຜົນສຳເລັດຕະຫຼອດໄລຍະຜ່ານມາ, ພ້ອມທັງໄດ້ນັ້ນໜັກໃຫ້ສຸມໃສ່ເຮັດວຽກງານ ສຶກສາອົບຮົມດ້ານການເມືອງ-ແນວຄິດ ໃຫ້ພະນັກງານ-ນັກຮົບຢ່າງທົ່ວເຖິ່ງ, ຝືກຝົນຫຼໍ່ຫຼອມຕົນເອງໃຫ້ເປັນພະນັກງານທີ່ດີເຂັ້ມແຂງ ມີຄວາມຈົ່ງຮັກພັກດີຕໍ່ປະເທດຊາດ, ເອົາໃຈໃສ່ປັບປຸງຍົກລະດັບແບບແຜນ ວິທີນໍາພາ-ບັນຊາ ເຮັດໃຫ້ກຳລັງປ້ອງກັນເຄື່ອນທີ່ມີຄວາມເຂັ້ມແຂງຮອບດ້ານ ແລະ ກຽມພ້ອມສູ້ຮົບຕະຫຼອດ 24 ຊົ່ວໂມງ ເພື່ອເຮັດໃຫ້ແຂວງຫົວພັນ ມີຄວາມສະຫງົບ ແລະ ເປັນລະບຽບຮຽບຮ້ອຍທາງສັງຄົມ.

ພ້ອມນີ້ ພົຈວ ໄຊສີ ແກ້ວສະຫງ່າ ຍັງໄດ້ມອບ ຄອມພີວເຕີ 01 ຊຸດ ໃຫ້ແກ່ກອງພັນປ້ອງກັນເຄື່ອນທີ່ ປກສ ແຂວງຫົວພັນ ໃຫ້ກຽດຮັບໂດຍ ພັທ ສຸກັນລະຍາ ນາມວົງສາ ຫົວໜ້າກອງພັນປ້ອງກັນເຄື່ອນທີ່ ກອງບັນຊາການ ປກສ ແຂວງຫົວພັນ.

Off

Comments are closed.