30th Mar2021

ກອງສິລະປະກອນ ປກສ ມີຄວາມພ້ອມຮ້ອຍສ່ວນຮ້ອຍສະແດງສິລະປະເພື່ອກະກຽມໃຫ້ແກ່ການສະເຫຼີມສະຫຼອງວັນສ້າງຕັ້ງກຳລັງ ປກສ ຄົບຮອບ 60 ປີ

by somchan

ໃນວັນທີ 29 ມີນາ 2021 ນີ້ ກອງສິລະປະກອນ ກົມໂຄສະນາອົບຮົມ, ກົມໃຫ່ຍການເມືອງ ປກສ ໄດ້ສະແດງຜ່ານລາຍການສິນລະປະຂອງກອງສິລະປະກອນ ປກສ ເພື່ອກຽມສະແດງຮັບໃຊ້ສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ ໃນວັນທີ 5 ເມສາ 2021 ນີ້, ທີ່ຫໍວັດທະນະທໍາແຫ່ງຊາດ, ໂດຍການເຂົ້າຮ່ວມຮັບຊົມການສະແດງຂອງ ພົນໂທ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ລັດຖະມົນຕີກະຊວງ ປກສ, ມີບັນດາທ່ານຮອງລັດຖະມົນຕີ, ຫົວໜ້າກົມໃຫ່ຍ, ກົມ, ກອງເຂົ້າຮ່ວມ.

ການສະແດງສິລະປະ ຄັ້ງນີ້ມີທັງໝົດ 14 ລາຍການຄື: ບົດຟ້ອນປະສານຮ້ອງ, ບົດເພງ ແລະ ບົດຟ້ອນ. ນອກຈາກນີ້, ຍັງໄດ້ສະແດງຜ່ານລາຍການສິລະປະ, ກຽມສະແດງໃນມື້ໂຮມຊຸມນຸມມິດຕິງໃຫ່ຍ ມີທັງໝົດ 4 ລາຍການ.

ໃນພິທີບັນດາທ່ານແຂກເຂົ້າຮ່ວມຮັບຊົມ ພ້ອມດ້ວຍຄະນະພັກຄະນະນຳກະຊວງປ້ອງກັນຄວາມສະຫງົບ, ກໍໄດ້ສະແດງຄວາມຊົມເຊີຍຕໍ່ນາຍ ແລະ ພົນຕຳຫຼວດທີ່ໄດ້ສຸມທຸກສະຕິປັນຍາ, ເຫື່ອແຮງຂອງຕົນເຂົ້າໃນການຝຶກຊ້ອມ ແລະ ເຮັດໃຫ້ບັນດາລາຍການທີ່ສະແດງອອກມານັ້ນລ້ວນແຕ່ມີຄວາມຈົບງາມ ສ່ອງແສງໃຫ້ເຫັນການເຕີບໃຫ່ຍຂະຫຍາຍຕົວຂອງກຳລັງປ້ອງກັນຄວາມສະຫງົບ, ພ້ອມນີ້ຍັງໄດ້ເນັ້ນໜັກໃຫ້ຄະນະຮັບຜິດຊອບຈົ່ງເອົາໃຈໃສ່ປັບປຸງຈຸດທີ່ຍັງຄົງຄ້າງບາງອັນໃຫ້ອອກມາດີກວ່າເກົ່າເພື່ອເຮັດໃຫ້ການສະແດງໃນງານສະເຫຼີມສະຫຼອງວັນສ້າງຕັ້ງກຳລັງ ປກສ ຄົບຮອບ 60 ປີ ໃຫ້ມີຜົນສຳເລັດຕາມຄາດໝາຍທີ່ວາງໄວ້.

Off

Comments are closed.